ރަޝިޔާގައި އާބާދީ އިތުރުކުރުމަށް ހާއްސަ ބްރޭކެއް އޮފީސްތަކުގައި ދޭން ޕޫޓިން ނިންމައިފި
ދެންމެ | 05 ޑިސެމްބަރ 2024

އާބާދީ އިތުރުކުރުމަށް މަގުފަހިވާނޭ ބްރޭކެއް ރަޝިޔާގެ ވަޒީފާގެ މާހައުލުގައި ހަމަޖައްސައިދިނުން ކޮންމެހެން މުހިންމު ކަމަށް އެ ގައުމުގެ ރައީސް ވްލަޑިމިއާ ޕޫޓިން ވިދާޅުވެއްޖެއެވެ.

ރަޝިޔާގެ ނޫސް އިދާރާތަކުން ހާމަކުރާގޮތުގައި ޔޫކްރޭންގައި ހިނގަމުންދާ ހަމަނުޖެހުންތަކުގެ ސަބަބުން އެއް މިލިއަނަށް ވުރެ ގިނަ ޒުވާނުން އެ ގައުމު ދޫކޮށް ޔޫރަޕްގެ އެހެނިހެން ހިސާބުތަކަށް ހިޖުރަކުރުމުން މިހާރު ވަނީ އެ ގައުމުގެ އާބާދީ ބޮޑުތަނުން ދަށަށްދާން ފަށާފައެވެ.

އެހެންކަމުން ރަޝިޔާގައި އުފަންވާ ކުދިންގެ ނިސްބަތް ދަށްވަމުންދާތީ އެކަމުގެ ކަންބޮޑުވުން އެ ގައުމުގެ މީޑިއާތަކުގައި ފާޅުކުރަމުން ޕޫޓިން ބުނެފައިވަނީ ވޯކް ބްރޭކްތަކުގައި ވެސް އާބާދީ އިތުރުކުރުމުގެ މަސައްކަތަށް ރަޝިޔާގެ މީހުން ސަމާލުކަން ދިނުމަށް އޭނާ އެދޭކަމަށާ، އެކަމަށް ބޭނުންވާ މުއައްޒަފުންނަށް ހާއްސަ ބްރޭކެއް ހަމަޖެއްސުން މުހިއްމުކަމަށް ވީހިނދު ރަޝިޔާގެ ކުރިއެރުމާއި ތަރައްގީ ބިނާވެފައިވަނީ ވެސް އެކަމުގެ މައްޗަށް ކަމަށެވެ.

އަދި މީގެ އިތުރުން ރަޝިޔާގެ އާބާދީ އިތުރުކުރުމަށް ޕޫޓިން ބޭނުންފުޅުވާ އަނެއް ސަބަބެއް ކަމަށް މީޑިއާތަކުން ބުނަނީ ރަޝިޔާގެ އަސްކަރިއްޔާ ފުޅާކުރުމަށް ރައީސް ޕޫޓިން ރާވާފައި ވުން ކަމަށާ، ސިފައިންގެ އަދަދު މިހާރު ހުރިވަރަށް ވުރެ 180،000 އިތުރުކުރުމަށާއި އަސްކަރީންގެ ޖުމްލަ 2.38 މިލިއަނަށް އެރުވުމަށް ޕޫޓިން އަމާޒު ހިފާފައިވާ ކަމަށެވެ.

”ރަޝިޔާގެ ރައްޔިތުންގެ ކުރިއެރުމާއި ރައްކާތެރިކަމަށް ސަމާލުވެ، ގައުމުގެ އާބާދީ ބޮޑުކުރުމަކީ ގައުމީފެންވަރުގައި އިސްކަމެއް ދީގެން އަޅުގަނޑުމެން ސަމާލުވާންޖެހޭ އެންމެބޮޑު ޒިންމާ، ރަޝިޔާގެ ނަސީބު ބަރޯސާވެފައި އޮތީ ވެސް ހަމަ އާބާދީ އިތުރުވުމުގެ މައްޗަށް“ ރައީސް ޕޫޓިން އެ ގައުމުގެ ބައެއް މީޑިއާތަކުގައި ބުނެފައިވެއެވެ.

އަދި ރަޝިޔާގެ ހެލްތު މިނިސްޓަރު ޑރ.ޔެވްގޭނީ ޝެސްޓޮޕަލޯވް ވެސް މި ހިޔާލަށް ގެންދަވަނީ ތާއީދު ކުރައްވަމުންނެވެ. ޑރ.ޔެވްގޭނީ މީޑިއާގައި ބުނެފައިވަނީ ބިޒީ މަސައްކަތުގެ ޝެޑިއުލްތަކަކީ އާބާދީ އިތުރުކުރުމުގެ މަސައްކަތަށް ހުރަހަކަށް ވެގެން ނުވާނޭ ކަމަށާއި އާބާދީ އިތުރުކުރުމަށް ޝައުގުވެރިވާފަދަ ބްރޭކެއް މުއައްޒަފުންނަށް ހަމަޖައްސައި ދީފި ނަމަ އެ ބްރޭކް ގަޑީގައި ވެސް ހަމަ ދަރިން ލިބިދާނެ ކަމަށެވެ.

ޕޫޓިންގެ މިފަދަ ސިޔާސަތު ތަކުގެ ތެރޭގައި ގުދުރަތީ ވިހެއުމަކުން ވިހެއުމުގެ ނިސްބަތް އިތުރުކުރުމަށް ވެސް ފިޔަވަޅުތަކެއް އަޅަމުންދާ ކަމަށް އޭނާ ބުނެފައި ވާއިރު، މާބަނޑުތޯ ބެލުމަށް ހަދާ ޓެސްޓްގެ ހިދުމަތް ރަޝިޔާގެ ވެރިރަށް މޮސްކޯގައި ހިލޭ ދަނީ ފޯރުކޮށް ދެމުންނެވެ. މީގެއިތުރުން ފުރަތަމަ ދަރިފުޅު ވިހެއުމާގުޅިގެން ޗެލިއަބިންސްކް ސަރަހައްދުގެ އަންހެނުންނަށް މާލީ އިނާޔަތެއް ދޭއިރު، ގޭގައި ދަރިން ވައްޓާލުމުގެ ފުރުސަތު ވެސް ޗެލިއަބިންސްކް ގައި ވަނީ ބޮޑުތަނުން ހަނިކޮށްފަ އެވެ. އަދި ވަރިކޮށްފިނަމަ ދައްކަންޖެހޭ ޖޫރިމަނާ ފީ ވެސް އެ ސަރަހައްދުގައި ވަނީ ބޮޑު ވެސް ކޮށްފައި ކަމަށް ބައިނަލްއަގުވާމީ މީޑިއާތަކުން ރިޕޯޓްކުރެއެވެ.

ގުޅުންހުރި ލިޔުންތައް

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!