ލޮނުމެދަކީ ކާއެއްޗެހީގެ ރަހަ މީރު ކުރުމަށް ބޭނުން ކުރާ އެއްޗަކަށްވީއިރު، ބައެއް މީހުން ހުހަށްވެސް މި ކައި އުޅެއެވެ. މިއީ ރަހަގަދަ، އަދި ވަރަށް ތަފާތު ވަހެއް ހުންނަ އެއްޗަކަށްވީއިރު، މިއީ އެކި ކަހަލަ ސިއްހީ މައްސަލަތައް ހައްލު ކުރުމަށްވެސް މީހުން ބޭނުން ކޮށްއުޅޭ އެއްޗެކެވެ. ހެނދުނު ހެނދުނާ ރޯ ލޮނުމެދު ކެއުމުން ހަމުގެ މައްސަލަތައް ހައްލުވެ ހަންގަނޑު ރީތިވާކަމަށް ބައެއް މީހުން ބުނެއެވެ.
އެކަމަކު މިހެން ހެނދުނު ހޭލާގޮތަށް ހުސް ބަނޑާ ހުރެ ލޮނުމެދު ކެއުމުން ކުއްލިއަކަށް ހަމުގެ މައްސަލަތަކެއް ހައްލެއް ނުވާނެއެވެ. ނަމަވެސް މިއީ ތަފާތު އެކިކަހަލަ ނިއުޓްރިއެންޓުތަކާއި، ހަންގަނޑަށް ފައިދާހުރި މާއްދާތައް އެކުލެވޭ އެއްޗެއް ކަމުން މި ކާން އާދަ ކޮށްފި ނަމަ، ހަންގަނޑަށް ބަދަލުތަކެއް އައިސް ހަންގަނޑު ރީތިވާން އެހީވެދެއެވެ.
ލޮނުމެދުގައި ހިމެނޭ ނިއުޓްރިއެންޓުތައް
އެލިސިނިން: މިއީ ސަލްފާ އެކުލެވިގެންވާ މާއްދާއަކަށް ވީއިރު، މީގައި އެކިކަހަލަ އެންޓި-އިންފްލެމޭޓަރީ، އެންޓި-މައިކްރޯބިއަލް އަދި އެންޓި-އޮކްސިޑެންޓުތަކުގެ ސިފަތައް ހިމެނެއެވެ.
ވިޓަމިން ސީ: މިއީ ހަށިގަނޑުގައި ކޮލަޖެން އުފައްދައި ދިނުމަށް އެހީވެދޭ މާއްދާއެކެވެ.
ވިޓަމިން ބީ6: މިއީ ހަށިގަނޑުގައި އާ ސެލްތައް އުފައްދައި ދިނުމަށް އެހީވެދޭ މާއްދާއެކެވެ.
ލޮނުމެދު ކެއުމުން ހަންގަނޑަށް ލިބޭ ފައިދާތައް
ލޮނުމެދަކީ އެންޓި-އިންފްލެމޭޓަރީ ޕްރޮޕަޓީތަކެއް ހިމެނޭ އެއްޗެއް ކަމުން މި ކެއުމުން ހަށިގަނޑު ދުޅަވުން ކުޑަކޮށްދެއެވެ. އަދި އޭގެ ސަބަބުން ތަފާތު އެކި ކަހަލަ ހަމުގެ މައްސަލަތަކުން މީހާ ދުރުވެއެވެ.
މިއީ އެންޓި-ބެކްޓީރިއަލް އަދި އެންޓި-ފަންގަލް ސިފަތަކެއް އެކުލެވޭ އެއްޗެއް ކަމުން މި ބޭނުން ކުރުމުން ހަންގަނޑުގައި ހުންނަ ޖަރާސީމުތައް ފިލައެވެ. އަދި އޭގެ ސަބަބުން ހަންގަނޑުގައި ބިހި ނެގުން ހުއްޓުވައި ދެއެވެ.
ލޮނުމެދަކީ ތަފާތު އެކިކަހަލަ އެންޓި-އޮކްސިޑެންޓުތައް ހިމެނޭ އެއްޗެއް ކަމުން މި ކެއުމުން ފްރީ ރެޑިކަލްތަކާ ދެކޮޅަށް މަސައްކަތް ކޮށް، ހަންގަނޑުން މުސްކުޅި ވުމުގެ އަލާމާތްތައް ފެނުމުން ދުރުކޮށްދެއެވެ.
މަތީގައި ހިމަނާފައިވާ ނުގުތާތަކުން މިއީ ހަންގަނޑަށް ވަރަށް ފައިދާހުރި އެއްޗެއް ކަން އެނގެއެވެ. ނަމަވެސް އެއްފަހަރާ މާގިނައިން ލޮނުމެދު ބޭނުން ކުރާނަމަ ހަޖަމުގެ މައްސަލަތައް ޖެހުމުގެ ފުރުސަތު ބޮޑުވެއެވެ. އެހެންކަަމުން މި ބޭނުން ކުރަން ގަސްތު ކުރާނަމަ މަދުމަދުން ބޭނުން ކުރުމަށް ސަމާލު ވާން ޖެހެއެވެ.
