ކޮންމެ މީހަކުވެސް ޒަވާޖީ ޙަޔާތެއް ފަށަނީ އެތައް އުއްމީދަކާއި ހުވަފެންތަކެއް ދެކެމުންނެވެ. ފާގަތިކަމާއި އާރޯކަމުން އުޖާލާ މުސްތަޤުބަލެއްގެ އުއްމީދުގައެވެ. މުޅި ޙަޔާތް އެމީހަކާއެކީ ހޭދަކުރުމަށް ޤަބޫލުކޮށް، ހިތާއި ޒަމީރުގެ ރުހުން ހޯދައެވެ. މުޅި ދިރިއުޅުން ބައްޓަންކުރާނެ އެ ނިންމުން ނިންމާ ކަނޑައަޅަނީ، ނުހަނު ވިސްނުންތެރިކަމާއެކުގައެވެ. މިކަމުގެ ތެރެއިން، ރަނގަޅު ޙަޔާތުގެ ބައިވެރިއެއް އިޙްތިޔާރު ކުރާއިރު ރަނގަޅު އާއިލާއެއް އިޙުތިޔާރުކުރުން މުހިންމެވެ. ސަބަބުތަކެއް ނެތިއެއްވެސް ނޫނެވެ.
ކައިވެންޏެއް ކުރުމުން އުފެދެނީ ހަމައެކަނި ދެމަފިރިންގެ ގުޅުމެއް ނޫނެވެ. ދެ އާއިލާއެއްގެ މެދުގައިވެސް އައު އާއިލީ ގުޅުމެއް އުފެދެއެވެ. އަނބިމީހާއަށާއި ފިރިމީހާއަށް އައު އާއިލާއެއް ލިބިގެންދެއެވެ. އެ އާއިލާއަކީ ދެމަފިރިންނަށް ހެޔޮ، ދެމަފިރިންނަށް ރަނގަޅު އާއިލާއެއްތޯ ވިސްނާލުން ބުއްދިވެރިއެވެ. މުސްތަޤުބަލުގައި ލިބޭ ދަރިންގެ އާއިލާއަށްވެސް ވާނެ ބަޔަކީ އެއީއެވެ. ކާފަ މާމައަށް ވާންތިބީ އެ މީހުންނެވެ. ބޮޑުދައިތައާއި ބޮޑުބޭބެމެންނަށް ވާންވެސް ތިބީ އެމީހުންނެވެ. މަންމަ ފަރާތުންނާއި ބައްޕަ ފަރާތު އާއިލާއަށް ވާނީ އެވެރިންނެވެ. އެ އާއިލާތަކުގައި ގެންގުޅޭ ސުލޫކުތަކާއި، މީހުންނާއި ދޭތެރޭ ކަންތައްތައް ބަހައްޓާ ގޮތުގެ އިތުރުން، ޢަމަލުތައް ބައްޓަންކުރާ ގޮތަކީ އެކުދިންގެ ދިރިއުޅުމަށް އޭގެ އަސަރުކުރާނެ ކަންކަމެވެ. ދަރިންގެ މެދުގައި ތަފާތުކުރުންތައް ގެންގުޅޭ އާއިލާއެއް ނަމަ، އެ ތަފާތުކުރުންތަކުގެ ސަބަބުން ދަރިންގެ ނާޒުކު ހިތްތަކަށް ފުން އަސަރެއް ކުރާނެއެވެ. ތުއްތު ދުވަސްވަރު، ފާރުނުހިކޭ ޒަޙަމްތަކެއް އެ ހިތްތަކުގައި ބިންވަޅުނެގެން ފަށާނެއެވެ. އެއް ކުއްޖަކަށް ލޯބިދީ ބޮސްދީ ހަދާއިރު، އޭގެ ޒައްރެއްގެ މިންވަރުންވެސް އެހެން ކުދިން މަހުރޫމުވެފައި ތިބެއެވެ. އެއް ކުދިންތަކެއް ގޮވައިގެން އަބަދުމެ އުޅޭތަން ފެންނާނެއެވެ. އަނެއް ކުދިންގެ މޫނުވެސް ދެކި ނުލާތާ އެތައް ދުވަހެކެވެ. އަޅާލުމާއި އޯގާތެރިކަމުގެ ގޮވެތިން އެއް ކުދިންނެއް މުއްސަނދިވެފައި ވާއިރު، ހަމަ އެ އާއިލާއަށް ނިސްބަތްވާ އެހެން ކުދިން، އެ ލޯތްބާއި އޯގާތެރިކަމަށް ސަލާންޖަހަން ޖެހުމަކީ އިންސާފެއް ހެއްޔެވެ؟ ކުދިންނަށް މިކަންކަން މީހަކު ބުނެދޭކަށް ނުޖެހެއެވެ. ކަންތައް ކުރަމުން އަންނަ ގޮތް، އެ ސިކުނޑިތަކަށްވެސް ނަގައިގަނެވޭނެއެވެ. ކުޑައިރުގައި އެންމެ ރަނގަޅަށް ކަންތައްތައް ފަހުމު ނުވިކަމުގައިވިޔަސް، ބޮޑުވަމުން އަންނަ ވަރަކަށް އަމިއްލައަށް އެކަންކަން ނަގައި ގަންނާނެއެވެ. ވާނުވާ އެނގެންފަށާނެއެވެ. މަންޒަރު ސާފުކޮށް ކުލަވާނެއެވެ. ތުއްތުއިރުއްސުރެ މިފަދަ މަންޒަރުތަކާއި ޢަމަލުތައް ފެނި އެކަން ތަޖުރިބާކުރާ ނަމަ، އެކަންކަމަށް ދަރިން ހޭނިދާނެއެވެ. އެކަމަށް އާދަވެސް ވެދާނެއެވެ. ނަމަވެސް އޭގެ އަސަރު ދިރިއުޅުމުގެ އެކި ހިސާބުތަކުން އެކުދިންނަށް ކުރާނެއެވެ. ކިތަށްމެ ހޭނިފައި ނުވަތަ އާދަވެފައި ހުއްޓަސް، ދިރިއުޅުމުގެ އެކި ހާލަތްތަކުގައި އެކަމާމެދު ވިސްނާނެއެވެ. ދެރަވާނެއެވެ. އެކަމާ ހިތުގައި ޖެހޭނެއެވެ. އެބަޔަކާ ގުޅުމެއް ބާއްވަން ބޭނުންނުވާ ހިސާބަށް ކަންތައް ދިއުމަކީވެސް ވެދާނެކަމެކެވެ. މިއީ ދުނިޔެއިން ފެންނަ ހަޤީޤަތެވެ.
އާއިލާއަކީ ދެމަފިރިންނަށް ހެޔޮ އާއިލާއެއް ނޫންނަމަ، ދަރިންނަށް ހެޔޮވާނެ ހެއްޔެވެ؟ އެ ހިތްތަކުގައި ކުއްޖާގެ މަންމައާއި ބައްޕައަށް ނެތް ކުލުނާއި ލޯތްބެއް، ކުއްޖާއަށް އޮންނާނެކަމަށް ޤަބޫލު ކުރެވޭ ހެއްޔެވެ؟ އަނބިމީހާ ނުވަތަ ފިރިމިހާއަށް އާއިލާ މީހުންގެ ގަދަރާއި އިހްތިރާމް ނުލިބޭނަމަ، އުފަލުގައި ހަމަޖެހިގެން އުޅުމަކީ އުނދަގޫ ކަމެކެވެ. ނަފްސާނީ ގޮތުންނާއި ޖަޒުބާތީ ގޮތުން މީހާ ބަލިކަށިވާފަދަ މާހައުލެއްގައި އުޅެން ވެއްޖެނަމަ، ދުޅަހެޔޮ އަދި އުފާވެރި އާއިލާއެއް ބިނާކުރުމަށް ހުރަސް އެޅޭނެއެވެ. ފާގަތި މުސްތަޤުބަލަކަށް ކުރި އުއްމީދުތައް ފުނޑުވެދާނެއެވެ. ދެކެފައިވާ ހުވަފެންތައް ބިލާހެއްގެ ގޮތުގައި ނިމިގެން ހިނގައިދާނެއެވެ.
އަލަށް ލިބޭ އާއިލާއާއި މެދުގައި އަހަރުމެންވެސް ހެޔޮ ވާންޖެހޭނެއެވެ. ލޯތްބާއި އަޅާލުން އެ މީހުންނަށް، އަހަރުމެންގެ ފަރާތުންވެސް ލިބެންޖެހޭނެއެވެ. އާއިލާއަށް ގަދަރާއި އިޙްތިރާމް ކުރަން ޖެހޭނެއެވެ. އެއީ ދެކޮޅަށް ދެމޭ ކޯރެއް ފަދައެވެ. އާއިލާގެ ފަރާތުން ދެމަފިރިންނަށް އެކަންކަން ހައްޤެވެ. ދެމަފިރިންގެ ފަރާތުން އާއިލާއަށްވެސް އެކަން ހައްޤެވެ. އެކުވެރިކަމާއި ސުލްޙަވެރިކަމާއެކުގައި އުޅެވޭނީ އިންސާފުވެރިކަމާއި، ގުޅުންތައް ދެމެހެއްޓުމަށް އިސްލާމްދީން ބާރުއަޅާ މިންވަރާއި އިސްލާމްދީނުގައި ބަޔާންވެގެންވާ ގޮތް އެންމެން ދަންނަނަމައެވެ. އަނބިމީހާއާއި ފިރިމީހާގެ ފަރާތުން އާއިލާއަށް ލޯތްބާއި އޯގާތެރިކަމެއް ނުލިބޭ ނަމަ، އާއިލާގެ ފަރާތުން ލޯތްބާއި އޯގާތެރިކަން ނުލިބިގެން ކުރެވޭނެ ޝަކުވާއެއް ނޯންނާނެއެވެ. ހަމައެފަދައިން، އާއިލާގެ ފަރާތުން ތަފާތުކުރުމާއި، ބަދުބަސް ރައްދުވާނަމަ، އަނބިމީހާ ނުވަތަ ފިރިމީހާ އެ އާއިލާއާއެކު ގުޅުން ބަދަހިކުރަން މަސައްކަތް ނުކޮށްގެން ކުރެވޭނެ ޝަކުވާއެއްވެސް ނޯންނާނެއެވެ.
އިހުތިޔާރުކުރާ އާއިލާގެ އަސަރު، އަނބިމީހާއާއި ފިރިމީހާގެ އިތުރުން ދަރިންނަށްވެސް ކުރާނެއެވެ. ހެޔޮ އާއިލާއެއްނަމަ، ރަނގަޅު ހެޔޮ އަސަރުތަކެވެ. ގޯސް ނުވަތަ ބަލައިނުގަނެވޭ ފަދަ ޢަމަލުތަކެއް އެބައެއްގެ ފަރާތުން ފެންނަ އާއިލާއެއްނަމަ، ގޯސް އަސަރުތަކެވެ. ޒަވާޖީ ޙަޔާތެއް ފަށާއިރު، ރަނގަޅު ޙެޔޮ އާއިލާއެއް އިޙްތިޔާރުކުރުން މުހިންމުވަނީ މިހެންވެއެވެ. މިފަދަ އެތައް ސަބަބަކާއި ލައިގެންނެވެ.
