އާސަންދަ މެދުވެރިކޮށް ބޭސް ލިބުމުގައި ހުރި ދަތިތައް ހައްލުކުރަން މަސައްކަތް ކުރަމުންދާ ކަމަށް އާސަންދަ ކުންފުނިން މިއަދު ބުނެފި އެވެ.
ވީ ކިހިނެއް؟ – އާންމުކޮށް ބޮޑެތި އަދި ދާއިމީ ބަލިތަކަށް ފަރުވާ ހޯދާ މީހުންނަށް އާސަންދަ މެދުވެރިކޮށް ބޭސް ގަންނަން ނުލިބުމާއި މީގެ ކުރިން އާސަންދަ އިން ލިބުނު ބޭސްތައް މިހާރު އެ ސްކީމުގެ ދަށުން ނުލިބޭކަމުގެ ޝަކުވާ ގިނަ އެވެ.
ތަފްސީލް – އާސަންދަ އިން ވަނީ، އެ ސްކީމުގެ ދަށުން ބޭސް ލިބުމުގައި ހުރި ކަންބޮޑުވުންތައް ރިޕޯޓު ކުރުމަށް ހާއްސަ ހޮޓްލައިނެއް ގާއިމްކޮށްފަ އެވެ.
އެ ކުންފުނީގެ ސޯޝަލް މީޑިއާ އެކައުންޓުތަކާއި އާސަންދައިގެ ދަށުން ބޭސް ދޫކުރާ ފާމަސީތަކުގައި ވެސް އެކަމާ ގުޅޭ ޕޯސްޓަރުތައް ވަނީ ބަހައްޓައިފަ އެވެ. އެގޮތުން، އާސަންދައިގެ ދަށުން ބޭސް ނަގާއިރު އަަމިއްލަ އަތުން ފައިސާ ދައްކަން ޖެހިއްޖެ ނަމަ ނުވަތަ އެ ބޭހެއް ނުލިބިއްޖެ ނަމަ އެކަން ރިޕޯޓު ކުރުމަށް ވަނީ އެދިފަ އެވެ.
ބުނީ ކީކޭ؟ – އާސަންދައިގެ ދަށުން ބޭސް ލިބުމުގައި ހުރި ދަތިތަކާ ގުޅޭ ގޮތުން އެ ކުންފުނީގެ މެނޭޖިން ޑިރެކްޓަރު އާމިނަތު ޒީނިޔާ މިއަދު ވިދާޅުވީ ވަކި ބޭހެއް އާސަންދަ ސްކީމުގެ ދަށުން ނުލިބޭ ގޮތް ހަދާފައި ނުވާނެ ކަމަށެވެ.
”ވަރަށް އަގުބޮޑުކޮށް ހުރި 250 ވަރަކަށް ބޭހުގެ އަގު މި ރިވައިޒް ކުރީ. އެއީ މީހުން ގަނެފައި ހުންނަ ބޭހުގެ އިންވޮއިސްތަކަށް ބަލާފައި އެއަށް ޕަސެންޓޭޖުތަކެއް ލައިގެން،“ އޭނާ ވިދާޅުވި އެވެ.
ޒީނިޔާ ވިދާޅުވީ ކުރިން އާސަންދައިގެ ދަށުން ވިއްކި ބޭސްތައް މިހާރު ބައެއް ފާމަސީތަކުން އާސަންދަ ސްކީމުން ދޫނުކުރާކަން ފާހަގަ ވެފައިވާ ކަމަށެވެ.
”އެ ޝަކުވާތައް ހުށަހަޅަން އަޅުގަނޑުމެން ވާނީ ކޮންމެ ފާމަސީއެއްގައި ވެސް ޕޯސްޓަރެއް ވެސް ތަތްކޮށްފައި،“ ޒީނިޔާ ވިދާޅުވި އެވެ.
އެ ޝަކުވާތައް ލިބޭ ވަރަކުން ބަލަމުންދާ ކަމަށް އޭނާ ވިދާޅުވި އެވެ.
މީގެ ކުރިން އާސަންދަ އިން ލިބުނު ބޭސްތައް އެ ސްކީމުގެ ދަށުން ދޫކުރާ ނަމަ ބޭސްފިހާރައަށް ގެއްލުންވާ ކަމަށް ބުނެ، ބައެއް ބޭސްފިހާރަތަކުން އާސަންދަ އިން އެ ބޭސްތައް ދޫކުރުން ވަނީ ހުއްޓާލައިފަ އެވެ. އެފަދަ ހާލަތްތަކުގައި އެ ބޭސް ގަންނަން ޖެހެނީ އަތުން ހަރަދުކޮށްގެންނެވެ.
މީގެ އިތުރުން، އާސަންދަ އިން ކަނޑައަޅާފައި އޮންނަ އަގު އެ ސްކީމުގެ ދަށުން ކަވަރު ކުރުމަށް ފަހު ބާކީ ފައިސާ އަމިއްލަ އަތުން ދައްކާ ގޮތަށް ވެސް ބައެއް ފާމަސީތަކުން ބޭސް ދޫކުރެ އެވެ.
”ބަލްކު ޕްރޮކިއުމެންޓުގެ ތެރެއިން އަގު ކުޑަކޮށްފައި މި ގެންނަ ބޭސްތަކުގައި އޭގައި ބަލްކުގެ ބްރޭންޑުތަކުގެ އިތުރުން މި ހުރި ބްރޭންޑުތަކުން [އަގުގެ] ތަފާތު ނެގިދާނެ. އެކަމަކު އެއްވެސް އެއްޗެއް އަތުން ނުދައްކާ އެ ބޭސްތައް ލިބޭނެ އެސްޓީއޯ ފާމަސީތަކުން،“ ޒީނިޔާ ވިދާޅުވި އެވެ.
އެސްޓީއޯގެ ބޭސްފިހާރަތަކުން ބޭސް ހުސްނުވެ ލިބޭނެ އިންތިޒާމު ހަމަޖެއްސުމަށް އަބަދުވެސް އެސްޓީއޯއާ އެކު މަސައްކަތް ކުރަމުންދާ ކަމަށް ވެސް އާސަންދައިގެ އެމްޑީ ވިދާޅުވި އެވެ.
