ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިހާރު ގއ, ގދ އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން ފެނިގެން ދިޔައީ އެމަނިކުފާނުގެ ހިތުގައި ރައްޔިތުންނަށް އޮތް ލޯތްބާއި އިހުތިރާމެވެ.
ދިވެހިރާއްޖޭގައި މީހުން ދިރިއުޅޭ ހުރިހާ ރަށަކަށް ވަޑައިގެން، ރައްޔިތުންނާ ބައްދަލުކުރައްވައި، އެ ރައްޔިތުންގެ އަޑު އައްސަވައި، ރައްޔިތުން ބޭނުންވާ ކަންކަން އޮޅުންފިލުއްވުމަށް އެ މަނިކުފާނު ފަށްޓަވައިގެން ކުރިއަށް ގެންދަވާ ސިލްސިލާ ދަތުރުފުޅުތަކުގެ ތެރެއިން މިހާރު ވަނީ ގއ އަދި ގދ އަތޮޅަށް ވަޑައިގެންފަ އެވެ. ރައްޔިތުންނާ ގާތުން ރައްޔިތުންގެ އަޑު އައްސަވާ ރައްޔިތުން ބޭނުންވާގޮތަށް ތަރައްގީ ގެނެސްދެއްވާނެ ކަމަށް އެމަނިކުފާނުވަނީ ވައުދުވެވަޑައިގެންފަ އެވެ. ވެރިކަމަށް 1 އަހަރު ވީ އިރު ރާއްޖޭގެ ހުރިހާ ކައުންސިލަކާ ރައީސުލްޖުމްހޫރިއްޔާ ވަނީ ބައްދަލުކުރައްވާފަ އެވެ.
ރައީސް ޑރ. މުއިއްޒު މިހާރު ހުވަދު އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ފެނިގެން ދިޔައީ ތަފާތު މަންޒަރުތަކެކެވެ. އެމަނިކުފާނުގެ ހިތުގައި ރައްޔިތުންނަށް އޮތް ލޯތްބާ އިހުތިރާމް ރަނގަޅަށްވެސް ދައްކުވައިދިނެވެ.
އެގޮތުން އެމަނިކުފާނު ގދ. ކަނޑުހުޅުދޫ އަށް ވަދައިގެން ބަނދަރު ސަރަހައްދަށް އެއްވެފައި ތިބި ރައްޔިތުންނާ ސަލާމް ކުރައްވަމުން ދަނިކޮށް ކުޑަކުއްޖަކު ދިއްކޮށްލީ، ކަރުދާސްކޮޅެކެވެ. އާޔަލް ބިން އަލީ ސައީދު ރައީސް އަށް ދިއްކޮށްލި ކަރުދާސް ކޮޅުގައި ލިޔެފައިވަނީ އޭނާގެ ބައްޕަ މަތިން ހަނދާންވާ ވާހަކަ އެވެ. އާޔަލްގެ ބައްޕަ ސާޖަންޓު އަލީ ސައީދަކީ ގދ. ފަރެސްމާތޮޑާ ޕޮލިސް ސްޓޭޝަންގައި މަސައްކަތްކުރާ ފުލުހުކެވެ. އާޔަލްގެ އެ އެދުން ހަގީގަތަކަށް ހައްދަވައިދެއްވުމަށް ރައީސް ބޭނުންފުޅުވެލެއްވި އެވެ. އަދި ކުޑަވަގުތު ކޮޅެއްގެ ތެރޭގައި ސާޖަންޓު އަލީ ސައީދަށް ކަނޑުހުޅުދޫއަށް އާދެވޭނޭ އިންތިޒާމު ރައީސް ހަމަޖައްސަވައިދެއްވި އެވެ.
ކުޑަ ވަގުތުކޮޅެއްގެ ތެރޭގައި ސާޖަންޓު އަލީ ސައީދު ކަނޑު ހުޅުދޫއަށް އައުމާއި އެކު އާޔަލް ދުވެފައި ގޮސް ބައްޕަގެ ގައިގައި ބައްދާލި އެވެ.
މިކަމުން ހާމަވެގެންދިޔައީ އެމަނިކުފާނަކީ ރައްޔިތުންނާ މެދު ވިސްނާ ރައްޔިތުން ދެކެ ލޯބިވާ ވެރިއެއްކަމެވެ.
އަނެއްކަމަކަށް ފަހަގަވެގެން ދިޔައީ ކަނޑުހުޅުދޫ އަށް ވަޑައިގެން ރަށުގެ ރައްޔިތުންނާ ސަލާމް ކުރައްވަމުން ގެންދަވަނިކޮށް ސަފުގައި ތިބި ކުޑަ ކުދިންތަކެއް ވަނީ ރައީސްގެ ސޮއި ހޯއްދެވުމަށް އެދިފަ އެވެ. އެކުދިން އެދުނީ ރައީސްގެ ކަނާތުން ސޮއިކުރެއްވުމަށެވެ. ރައީސް މުއިއްޒުއަކީ ވާތްތެރި ބޭފުޅެކެވެ.
ސަފުގައި އެތުރިގެން ތިބި ކުޑަކުދިންތައް، ރައީސް އަރާހަމަވެވަޑައިގެންނެވުމުން ކަރުދާސްކޮޅަކާއި ގަލަމެއް ދީ، ކަނާތުން ސޮއިކުރެއްވުމަށް އެދުނެވެ.ސަމާސާ ގޮތަކަށް ހިނިތުންވެވަޑައިގެން ކަނާއަތުން ސޮއިކުރެއްވުމަށް ފަހު ރައީސް ވަނީ ”ރަނގަޅުތޯ“ އެ ކުދިންގެ ކިބައިން ސުވާލުކުރައްވާފަ އެވެ.
ސޯޝަލް މީޑިއާގައި ދައުރުވަމުން އަންނަ އެ ވީޑިއޯއަށް ގިނަ ބައެއްގެ ތައުރީފް ލިބެމުންދެއެވެ. އަދި ރައީސްގެ އޯގާތެރި ކަމަށް ގިނަ ބަޔަކު ތައުރީފްކުރަމުންދެ އެވެ. އަދި ރައީސް ޑރ މުޢިއްޒުއަކީ ރާއްޖޭގައި މިހާތަނަށް ވެރިކަން ކުރެއްވި އެހެން ރައީސުންނާ ތަފާތު ބޭފުޅެއް ކަމަށާއި އެމަނިކުފާނަކީ އަޚްލާގު ރަނގަޅު ހިއް ހެޔޮ އޯގާތެރި ވެރިއެއް ކަމަށް ބައެއް މީހުން ބުނަމުން ދެއެވެ.
ރައީސް ހުވަދު އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ގެންދަވަނީ އެރަށްރަށުގެ ކައުންސިލްތަކާއި ރައްޔިތުންނާ ބައްދަލުކޮށް، ރަށަށް ބޭނުންވާ ކަންތައްތަކާ ބެހޭގޮތުން މަޝްވަރާކުރައްވަމުންނެވެ.
