އެމެރިކާގެ ލޮސް އެޖެންލިސްގެ ޕެސިފިކް ޕެލިސޭޑްސްގައި ރޯވި އަލިފާންގަނޑު ގަދަވަމުން ދަނިކޮށް ”ފަޔާ ޓޯނޭޑޯ“ އެއް އަރައިފިއެވެ.
ސެން ފެނާންޑޯ ވާދީގެ މަތިން މި އަލިފާނުގެ ނަގޫރޯޅިއަރަމުންދާ މަންޒަރު ދައްކުވައިދޭ ވީޑިއޯއެއް މީސް މީޑިއާގައި ވަނީ އާންމުވެފައެވެ. އެއީ ހެލިކޮޕްޓަރެއްގައި އިން މީހަކު ނަގާފައިވާ ވީޑިއޯއެެކެެވެ. އާއްމުކޮށް އަލިފާނުގެ ބޮޑު ހާދިސާތަކާއި ގުޅިގެން މި މަންޒަރު ފެންނަ ކަމަށް ވެއެވެ.
އެމެރިކާގެ ލޮސް އެންޖެލިސްގައި މިވަގުތު ހަ ބޮޑު އަލިފާނުގެ ހާދިސާއެއް ހިނގަމުންދާއިރު، އެތައް ސަތޭކަ ގެއެއް ހަލާކުވެ، 11 މީހުން ވަނީ މަރުވެފައެވެ. ޕެލިސޭޑްސް އަލިފާނުގެ ހާދިސާގެ މިސްރާބު ބަދަލުވުމާ ގުޅިގެން ބްރެންޓްވުޑް އަވަށުގެ ބޮޑު ސަރަހައްދަށާއި ސެން ފެނާންޑޯ ވާދީން މީހުން ހުސްކުރުމުގެ އާ އަމުރެއް މިދިޔަ ހުކުރު ދުވަހު ވަނީ ނެރެފައެވެ.
އެލްއޭ ޑިޕާޓްމަންޓް އޮފް ޕަބްލިކް ހެލްތުގެ އޮފިޝަލުން ވަނީ އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާންކޮށްފައެވެ. މިއީ ”މިހާރު ހިނގަމުންދާ އަލިފާނުގެ ހާދިސާތަކާއި ވައިގަދަވުމުގެ ސަބަބުން ބޮޑެތި ގެއްލުންތަކެއް ލިބެމުންދާތީ“ ނެރުނު ހާލަތެއް ކަަމަށް ބުނެފައި ވެއެވެ.
އެ ޑިޕާޓްމަންޓުން ހުކުރު ދުވަހު ނެރުނު އިއުލާނެއްގައި ބުނީ އަލިފާނުގެ ހާދިސާތަކާއި ވައިގަދަވުމުގެ ސަބަބުން ނުރައްކާތެރި ދުމާއި ވައިގެ ކޮލިޓީ ވަރަށް ބޮޑަށް ދަށަށް ގޮސް، އާންމު ސިއްހަތަށް ވަގުތުން އަދި ދިގު މުއްދަތަކަށް ނުރައްކާވެފައިވާ ކަމަށެވެ.
