އިސްރާއީލުން ފަލަސްތީނުގެ ޣައްޒާއަށް ދެމުންގެންދާ ހަމަލާތައް ހުއްޓުމަށް، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ ކެބިނެޓް ދެކޮޅު ކަމަށް ނިންމައިފިއެވެ.
ނަތަންޔާހޫގެ ކެބިނެޓް ދެކޮޅު ހަދާފައިވަނީ ހަމާސް ޖަމާއަތާއި އިސްރާއީލް ސަރުކާރާ ދެމެދު ހަމަލާތައް ހުއްޓުމަށް އިއްޔެ އެއްބަސްވުމަކަށް އައިސްފައިވަނިކޮށެވެ.
ނަތަންޔާހޫގެ އޮފީހުން މިއަދު ވަނީ އެއްބަސްވުމަށް އަމަލުކުރުމާ ގުޅޭގޮތުން ކެބިނެޓުގައި ނަގަން ހަމަޖެހިފައި އޮތް ވޯޓު ހުއްޓުވައިފައެވެ. އަދި ވޯޓު ހުއްޓުވި ސަބަބެއް ވެސް ހާމަކޮށްފައެއް ނުވެއެވެ.
އިސްރާއީލުން ހަމަލާތައް ބަދަލުކުރުން ހުއްޓާލުމަށް އެއްބަސްވިކަން އިއުލާނުކުރުމަށްފަހު ވެސް އިސްރާއީލު ސިފައިން ވަނީ ޣައްޒާއަށް ހަމަލާތަކެއް ފޮނުވާލައިފައެވެ.
ޣައްޒާ ސިވިލް ޑިފެންސްއިން ރިޕޯޓުކޮށްފައިވާ ރޭ ދިން ހަމަލާގައި 73 މީހަކު ޝަހީދުކޮށްލާފައިވެއެވެ. އަދި 200 މީހުންނަށް ވަނީ ހަމަލާތަކުގައި ޒަހަމްވެފައެވެ. ޣައްޒާ ސިޓީގެ ޝެއިހް ރަދުވާން އަވަށުން ޝަހީދުވެފައިވާ 12 މީހެއްގެ ހަށިގަނޑު ފެނިފައިވާ ކަމަށް ފަލަސްތީނުގެ ސިވިލް ޑިފެންސް އިން ހާމަކޮށްފައިވެއެވެ.
އިސްރާއީލުން މި ހަމަލާތައް ދީފައިވަނީ ޣައްޒާއަށް ދެމުންދާ ހަމަލާތައް ހުއްޓާލުމަށާއި ހަމާސް އިން ރަހީނުކޮށްފައިވާ އިޒްރޭލު މީހުން މިނިވަންކުރުމަށް ދެ ފަރާތުން އެއްބަސްވިކަން އިއުލާންކުރުމުން ފަލަސްތީނުގެ ރައްޔިތުން އުފާފާޅުކުރި ވަގުތުގައެވެ. ޣައްޒާ ހަނގުރާމަ ހުއްޓާލަން ނިންމާފައިވަނީ ގަތަރު މެދުވެރިއެއްގެ ދައުރު އަދާކޮށްގެން ކުރިއަށްގެންދިޔަ މަޝްވަރާތަކުގައި އިޒްރޭލާއި ހަމާސް އިން ވެސް އެއްބަސްވުމަކަށް އައިސްގެންނެވެ.
އިސްރާއީލުން ފަލަސްތީނުގެ ޣައްޒާއަށް ދެމުންދާ ހަމަލާތަކުގައި 7 އޮކްޓޫބަރު 2023 އިން ފެށިގެން މިހާތަނަށް 46،707 އަށްވުރެ ގިނަ މީހުން ޝަހީދު ކޮށްލާފައިވާ އިރު، އެތައްހާސް ބަޔަކު ވަނީ ޒަހަމްވެފައެވެ.
