ބޭނުމަކީ މާލޭގަ އަރާމުގަ ތިބުމުގެ ބަދަލުގައި ވަޒީރުންނާއެކު ރަށްރަށަށްގޮސް، ކައުންސިލްތަކާއި މުއައްސަސާތަކުގެ ޒިންމާދާރުވާ ބޭފުޅުންނާނެއެކު އިށީނދެ، މައްސަލަތައް ދެނެގަނެ އެކަމަށް ހައްލުތައް މަޝްވަރާކުރެވި ކަންކަން ހަމަޖެހިގެން ދިއުން ކަމަށް ރައީސުލްޖުމްޙޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ ހއ އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިންމިއަދު ހއ. މާރަންދޫ ރައްޔިތުންނާ ބައްދަލުކުރައްވާ ރައީސް ވިދާޅުވީ، މިފަދަ މަސައްކަތު ބައްދަލުވުންތައް ކޮންމެ ރަށެއްގައިވެސް ބޭއްވުމުން، ތަރައްޤީގެ އެކި އެކި މަޝްރޫޢުތައް ބާރު ސްޕީޑްގައި ކުރައަށް ދާނެކަމަށެވެ. އަދި ރައްޔިތުންނާއި ބައްދަލުކުރައްވާ، ވާހަކަފުޅުދެއްކުމަކީ އެމަނިކުފާނު ކަންކަން ކުރަން ގަސްތުކުރައްވާ ގޮތާއި، ރައްޔިތުންގެ ކިބައިން އެދޭ ކަންކަން ކުރާނެ ގޮތް ހިއްސާކުރެއްވުމަށް ކަމަށެވެ.
އަޅުގަނޑު ބޭނުންވަނީ މާލޭގަ އަޅުގަނޑުމެން އަރާމުގަ ތިބުމުގެ ބަދަލުގަ ވަޒީރުން އަޅުގަނޑާއެކީ ރަށްރަށަށް އައިސް ކަމާ ގުޅޭ ހުރިހާ ދާއިރާތަކެއްގެ ވަޒީރުން ކައުންސިލާއި މުވައްސަސާތަކުގެ ޒިންމާދާރު ބޭފުޅުންނާއެކީ އިށީންދެގެން ކޮން ކަމެއްގަ އޮތީ ކޮން މައްސަލައެއްތޯ އަދި އެއަށް ގެނެވޭނީ ކޮން ހައްލެއްތޯ ދެ ފަރާތުން މަޝްވަރާކުރެވި ކަންކަން ހަމަޖެހިގެންދާން. އޭރުން ބާރަށް ހިނގާނީ ކަންކަން.
އެހެންކަމުން މިފަދަ ދަތުރުފުޅުތައް ކުރާތީ، ބޭކާރު ޚަރަދުކުރަނީ ކަމަށް ފާޑުކިޔުން ރައްދުވިނަމަވެސް، މިދަތުރުތަކަކީ ރަށްރަށުގެ ތަރައްޤީއަށް ހޭދަކުރެވޭ ސީރިއަސް ވަގުތުތަކެއް ކަމަށް ރައީސް ވިދާޅުވިއެވެ. އަދި މިއަހަރުގެ ތެރޭގައި ރަށްރަށުގެ ތަރައްޤީގެ ގިނަ މަޝްރޫޢުތަކުގެ އަމަލީ މަސައްކަތް ފަށާނެކަމުގެ ޔަޤީންކަން ރައީސް ވަނީ ދެއްވާފައެވެ.
އެގޮތުން، މާރަންދޫ ބަނދަރު މަޝްރޫޢުގެ އަމަލީ މަސައްކަތްތައް ރޯދަމަހަށްފަހު ފެށޭނެކަމަާއި، މި މަޝްރޫޢުއާއި ގުޅިގެން ރަށްގިރުމާއި ތުނޑި ހިމާޔަތްކުރުމުގެ މަސައްކަތް ފަށާނެ ކަމުގެ ޔަޤީންކަން ރައީސް ވަނީ ދެއްވާފައެވެ. އަދި، އެ ރަށު ސްކޫލުގެ ޖާގަ އިތުރުކުރުމަށް މިދިޔަ ސަރުކާރުން ފެށެ ހުއްޓުނު މަޝްރޫޢު އަލުން ފެށޭނެ ކަމަށާއި، އެ ރަށުގެ ފުޓުބޯޅަ ދަނދު ތަރައްޤީކޮށް އައު ފުޓްސެލް ދަނޑެއް އެޅާނެކަމަށް ރައީސް ވަނީ ވިދާޅުވެފައެވެ.
މިއާއެކު، ސިއްހީ ދާއިރާ ތަރައްޤީކުރުމަށް އެ ރަށުގައި ލެބޯޓަރީއެއް ޤާއިމުކޮށް، ސިއްހީ މަރުކަޒުގެ މުވައްޒަފުން މަދުވުމުން ދިމާވާ ދަތިތަކަށް ހައްލެއް ހޯދައިދީ، މުޅި ސިއްހީ ދާއިރާއަށް ރަނގަޅު ކުރިއެރުންތަކެއް ގެނެސްދިނުމަށް ކަނޑައޅާކަމަށް ރައީސް ވިދާޅުވިއެވެ. އަދި ރޯދަ މަހުގެ ކުރިން ދަތުރުފަތުރު ކުރުމުގެ ތަކްލީފު ލުއިކޮށްދެއްވުމަށް، ވަކި ތާވަލެއްގެ ތެރެއިން އާރްޓީއެލްގެ ޚިދުމަތްތައް އެ ރަށަށަށް ލިބޭނެކަމަށް ރައީސް ވަނީ ވިދާޅުވެފައެވެ.
ރާއްޖޭގެ އެކި ކަންކޮޅުތަކުގައި ދިރިއުޅެމުންދާ ރައްޔިތުންގެ ގާތަށް ވަޑައިގެން އެ ރައްޔިތުންގެ އަޑު އައްސަވައި، ކަންކަން ޙައްލު ކޮށްދެއްވުމަށް އެ މަނިކުފާނު އިސްނަންގަވައިގެން ފައްޓަވާފައިވާ ސިލްސިލާ ދަތުރުފުޅުތަކުގެ ތެރެއިން ހއ. މާރަންދޫއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރެއްވި ރަސްމިއްޔާތުގައި، ބޭންކް އޮފް މޯލްޑިވްސްއިން މާރަންދޫގައި އޭ.ޓީ.އެމް ބެހެއްޓުމުގެ، މަސައްކަތް މާރަންދޫ ކައުންސިލާ ހަވާލުކުރެއްވުންވެސް އޮތެވެ.
