ގިނަ އަދަދެއްގެ މިޔަރުމަސް ރާއްޖޭން ބޭރުކުރަން އުޅުނު ކުންފުނީގެ ނަން ކަސްޓަމްސްއިން ހާމަކޮށްފިއެވެ.
ކަސްޓަމްސްއިން މިރޭ ބުނެފައިވަނީ މިދިޔަ އަހަރުގެ ނޮވެމްބަރު 7 ވަނަ ދުވަހު ކަސްޓަމްސްއިން ބަލާފާސްކުރި މުދާ ޝިޕްމެންޓެއްގެ ތެރެއިން މިޔަރު މަހާއި މަޑި މަސް ހުރި 45 ފޮށިގަނޑު (ޖުމުލަ 582 ކިލޯ) ފެނިފައިވާ މައްސަލައެއް ކަސްޓަމަސްއިން ދަނީ ތަހުގީގު ކުރަމުންކަމަށެވެ.
އަދި އެ ޝިޕްމެންޓް ކަސްޓަމްސްއަށް ޑިކްލެއަރ ކޮށްފައިވަނީ ”ދަ ކްރިސްޓަލް ކޮންޕެނީ ޕްރައިވެޓް ލިމިޓެޑް“ ނަމަކަށް ކިޔާ ކުންފުންޏަކުންކަމަށް ކަސްޓަމްސްއިން ވަނީ ބުނެފައެވެ.
އެކަމާ ގުޅިގެން ކަސްޓަމްސްއާއި ކަމާބެހޭ އެހެން އިދާރާތަކުން ބަލަންޖެހޭ ބެލުންތައް ބެލުމަށްފަހު، ފުރިހަމަ ކުރަންޖެހޭ އިޖުރާއަތުތައް ފުރިހަމަކުރުމަށްފަހު މިދިޔަ އަހަރުގެ ޑިސެންބަރު 22 ގައި އެ ތަކެތި ވަނީ ނައްތާލާފައިކަމަށް ވެސް ކަސްޓަމްސްއިން މިރޭ އެކްސްގައިވަނީ ބުނެފައެވެ.
ކަސްޓަމްސްއިން މި މައުލޫމާތު އެކްސްގައި ހާމަކޮށްފައި މިވަނީ، އެ މައްސަލާގައި ހިމެނޭ ކުންފުނީގެ މައުލޫމާތު ހޯދަން އޮންލައިން ނޫހަކުން ހުށަހެޅުމުން، ބަލަމުންދާ މައްސަލައެއްކަމަށްބުނެ އެ ކުންފުނީގެ ނަން ހާމަކުރުމަށް އޭރު ދެކޮޅު ހެދުމަށްފަހުއެވެ.
ކަސްޓަމްސްއިން ބުނެފައިވާގޮތުގައި އެ ކުންފުނިން ބޭރުކުރަން އުޅުނު ތަކެތި މެރިން ރިސަރޗް ސެންޓަރުން ވަނީ ޓެސްޓުކޮށްފައެވެ. އަދި ޓެސްޓަށްފަހު، އޭގައި ހުރީ މިޔަރުމަހާއި މަޑި މަސްކަމަށް އެ ސެންޓަރުން ޔަގީންކޮށްދީފައިވާކަމަށް ވަނީ ބުނެފައެވެ.
ނެތިދިއުމުގެ ބިރުހީވެފައިވާ ދިރޭތަކެތީގެ ބައިނަލްއަގްވާމީ ވިޔަފާރި ކޮންޓްރޯލް ކުރުމުގެ ގާނޫނުގެ ދަށުން އެފަދަ ތަކެއްޗަކީ ހިފާ، އެތަކެތީގެ ބާވަތްތައް ވިޔަފާރި ކުރުން މަނާ ތަކެއްޗެވެ.
