މިސަރުކާރުން ފައިސާ ޗާޕެއް ނުކުރާނެ، އެކަން ކުރީ އެމްޑީޕީ: ފަލާހް
ދެންމެ | 11 މާރޗް 2025

ފައިސާ ޗާޕުކުރީ އެމްޑީޕީއިންކަމަށާއި، މި ސަރުކާރަކުން ފައިސާ ޗާޕު ނުކުރާނެކަމަށް ރައްޔިތުންގެ މަޖިލީހުގެ މެޖޯރިޓީ ލީޑަރު، އިނގުރައިދޫ ދާއިރާގެ މެންބަރު އިބްރާހިމް ފާލާހު ވިދާޅުވެއްޖެއެވެ.

ފަލާހު މިހެން ވިދާޅުވީއިރު، ސަރުކާރުން އަންގައިގެން މޯލްޑިވްސް މޮނިޓަރީ އޮތޯރިޓީ (އެމްއެމްއޭ) އިން 15 ބިލިއަން ރުފިޔާ ޗާޕްކިރަން އުޅޭކަމަށް އެމްޑީޕީގެ ސަރުކާރުގެ ފިނޭންސް މިނިސްޓަރ އިބްރާހިމް އަމީރު ވަނީ ވިދާޅުވެފައެވެ.

ޓޫރިޒަމް ގާނޫނަށް ހުށައަޅާފައިވާ އިސްލާހަށް ބަހުސް ކުރައްވަމުން ފަލާހު ވިދާޅުވީ، ރައްޔިތުންގެ މަޖިލީހުން ގާނޫނުތަކާއި، ގަވާއިދުތަކާއި އަދި ގާނޫނު އަސާސީއަށް ގެންނަ ބަދަލުތަކަކީ ގައުމުގެ އިގްތިސާދީ ހާލަތާއި، މީހުންގެ ވައްޓަފާޅިއާއި ގައުމަށް އަންނަމުންދާ ބަދަލުތަކަށް ބަލާފައިކަމަށެވެ. މިއީ ދުނިޔެ އޮތް ދުވަހަކު ނިމުން އަންނާނެ ކަންތައްތަކެއް ނޫންކަމަށް ފަލާހު ވިދާޅުވިއެވެ.

އެގޮތުން ފަލާހު ފާހަގަކުރެއްވީ މަސްތުވާތަކެއްޗާއި ބެހޭ ގާނޫނެވެ. މަސްތުވާތަކެތި ބޭނުން ކުރާ މީހުންނަށް އަންނަމުންދާ ބަދަލުތަކާއިއެކު ގާނޫނަށްވެސް ބަދަލުތައް ގެންނާނެކަމަށް ފަލާހު ވިދާޅުވިއެވެ.

ފަތުރުވެރިކަމަކީ ރާއްޖޭގެ އިގްތިސާދުގެ ލޭނާރުކަމަށާއި، ފަތުރުވެރިކަމަކީ ރާއްޖޭގެ މައި ދޮރާށިކަމަށްވީއިރު، މި ގާނޫނަށް ގެނެވޭ އިސްލާހުތަކާއި ގުޅިގެން އިދިކޮޅުން އޮލުވާލަމުން ދިޔުމަކީ ކަންބޮޑުވުމެއްކަމަށް ފަލާހު ވިދާޅުވިއެވެ.

ރާއްޖޭގެ އިގްތިސާދީ ހާލަތު އެމްޑީޕީއިން ވައްޓާލާފައިވަނީ ބަޔަކަށް ނަގާ ނުގަނެވޭ ވަރުގެ ފުން އަނދަވަޅަކަށްކަމަށް ފަލާހު ވިދާޅުވިއެވެ. އެމްޑީޕީއިން ވެރިކަމަށް އަންނަ ކޮންމެ ފަހަރަކު މިކަން މިގޮތަށް ކުރާކަމަށާއި، އެބޭފުޅުން ގާނޫނުތަކާއި ގަވާއިދުތައް ހަދާފައި ހުންނަނީ އިންސާނުން ގާނޫނު ހަދާ ގޮތަށް ނޫންކަމަށް ފާހަގަކޮށް ފަލާހު ފާހަގަކުރެއްވީ އެމްޑީޕީއިން އެކުލަވާލި އެންޓި ޑިފެކްޝަން ގާނޫނެވެ.

އެމްޑީޕީއަށް މައްސަލައަކަށް ވެގެން އުޅެނީ ގާނޫނުތަކަށް ގެންނަ އިސްލާހުތައް ނޫންކަމަށާއި، ރައީސުލްޖުމްހުރިއްޔާ ޑރ މުހައްމަދު މުއިއްޒު ކުރައްވާ ގައުމީ މަސައްކަތްކަމަށް ފަލާހު ވިދާޅުވިއެވެ.

މި ވާހަކައިގެ ތެރެއިން ފަލާހު ވިދާޅުވީ ރައްޔިތުންނަށް ފައިދާވާނެ ކަންތައްތަކެއް ސަރުކާރުން ކުރަމުންދަނިކޮށް ގައުމުގެ އިގްތިސާދު ހަލާކުވާނެފަދަ ކަންތައްތަކެއް އެމްޑީޕީއިން ކުރަމުންދާކަމަށެވެ. ކުރައްވަންވާނީ ޒިންމާދާރު މަސައްކަތަކެއްކަމަށް ފަލާހު ވިދާޅުވިއެވެ.

ފަލާހު ވިދާޅުވީ ފައިސާ ޗާޕު ކުރާކަމަށް ބުނެ ތުހުމަތުތައް ކުރި ނަމަވެސް މި ސަރުކާރުން ފައިސާ ޗާޕު ނުކުރާނެކަމަށެވެ. ނަމަވެސް އެމްޑީޕީ ސަރުކާރުން ފައިސާ ޗާޕުކުރިކަމަށް އޭނާ ވިދާޅުވިއެވެ. ވެރިކަން ނިމެން ދިޔައިރުވެސް 8 ބިލިއަން ރުފިޔާ ޗާޕުކުރިކަމަށެވެ.

ފަލާހު ވިދާޅުވީ ދިރާސާތައް ހެއްދެވުމަށްފަހު ރަނގަޅަށް ވާހަކަތައް ދެކެވުމަކީ މުހިންމުކަމެއްކަމަށެވެ.

ގުޅުންހުރި ލިޔުންތައް

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!