އިރާނު އަސްކަރިއްޔާއިން ދެމުންދާ ހަމަލާތައް ހުއްޓުވުމަށް އިސްރާއީލުގެ ބޮޑުވަޒީރު ނިރުބަވެރި ބެންޖަމިން ނަތަންޔާހޫ އިރާނު ރައްޔިތުންގެ ކިބައިން އެދެފި އެވެ.
ބެންޖަމިން ނަތަންޔާހޫ މިރޭ ދިން ވީޑިއޯ އިންޓަވިއުއެއްގައި ބުނީ އީރާނުގެ ރައްޔިތުން ތެހެރާނުގެ ވެރިކަމާ ދެކޮޅު ހެދުމަށާއި އިސްރާއީލުން ކުރަމުންދާ މަސައްކަތަށް އެހީތެރިވުމަށް އެދޭ ކަމަށެވެ.
އީރާނުން އިސްރާއީލަށް ދެމުންދާ މިސައިލް ހަމަލާއާއި ގުޅިގެން އާންމުކުރި ވީޑިއޯއެއްގައި ނަތަންޔާހޫ ބުނީ އިސްރާއީލުން އިރާނަށް ހަމަލާދިނީ އިރާނު ސަރުކާރުން އިސްރާއީލަށް ދެމުން ދިޔަ ނިއުކްލިއާ އަދި ބެލިސްޓިކް މިސައިލްގެ ނުރައްކާ ހުއްޓުވުމަށް ކަމަށެވެ.
އަދި އިޒްރޭލުން ވަނީ އީރާނުގެ ބެލިސްޓިކް މިސައިލް ސްޓޮކަލާއި އެ ގައުމުގެ ”އެންމެ މުހިންމު ޔޫރޭނިއަމް މުއްސަނދިކުރާ ސަރަހައްދު“ ނައްތާލާފައި ކަމަށްވެސް ނަތަންޔާހޫ ވަނީ ބުނެފައި އެވެ.
ނަތަންޔާހޫގެ އިންޓަވިއު ނިންމާލަމުން ބުނީ އީރާނުގެ ރައްޔިތުންގެ މިނިވަންކަމާއި ސިޔާދަތާއި ދިގު ތާރީހު ސަލާމާތްކުރުމަށް މިހާރު އިރާނުގައި އޮތް ސަރުކާރުގެ ބަދަލުކުރުމަށް ރައްޔިތުން ހަނގުރާމަކުރަންވީ ވަގުތު އަތުވެއްޖެ ކަމަށެވެ.
އިރާނުން މިރޭ އިސްރާއީލަށް ހަމަލާދީފައިމިވަނީ ރޭ ކުއްލި ގޮތަކަށް އިސްރާއީލުން އިރާނަށް ދިން ހަމަލާގައި އެތައް ބަޔަކު ޝަހީދުކޮށްލުމާއި ގުޅިގެންނެވެ. އެގޮތުން އިސްރާއީލުން އިރާނަށް ހަމަލާތަކެއް ދިނީ ރޭ އިރާނު ގަޑިން ފަތިހު 02:00 ހާއިރު އެވެ. ރިޕޯޓުތައް ބުނާގޮތުގައި އިސްރާއީލުގެ ވައިގެ ސިފައިން އިރާނުގެ ވައިގެ ސަރަހައްދަށް ޖެޓުތަކުގައި ވަދެ ހަމަލާތައް ދީފައިވަނީ އިރާނުގެ ނިއުކްލިއާ ސައިޓުތަކަށާއި އާންމުންނަށް އަމާޒުކޮށެވެ. އެގޮތުން އީރާންގެ ނަތަންޒްގައި ހުންނަ ނިއުކްލިއާ މަރުކަޒަކަށް ދެފަހަރެއްގެ މަތީން ހަމަލާދީފައިވާއިރު އިރާނުގެ ވެރިރަށް ތެހެރާނަށްވެސް ވަރުގަދަ ހަމަލާތަކެއް ވަނީ ދީފައި އެވެ.
މި ހަމަލާގައި އިރާނު އަސްކަރިއްޔާގެ އެންމެ އިސް ލީޑަރުން ވަނީ އަވަހާރަވެފައި އެވެ. އޭގެ ތެރޭގައި އިރާނު އަސްކަރިއްޔާއިން ކޮމާންޑަރ އިން ޗީފް ހޮސެއިން ސަލާމީ އާއި ޗީފް އޮފް ސްޓާފް މޭޖާ ޖެނެރަލް މުހައްމަދު ބަގޭރީ ވެސް ހިމެނެއެވެ.
މިއާއިއެކު އެހަމަލާގެ ބަދަލު ހިފާނެކަމުގެ ޔަގީންކަން އިރާނުން ދިން ނަމަވެސް މިފަދަ ބޮޑު ހަމަލާއެއް އިސްރާއީލަށް އަމާޒުވެދާނެ ކަމަށް އިސްރާއީލު އަސްކަރިއްޔާއާއި ސަރުކާރުންވެސް ތިބޭ ތައްޔާރަކަށް ނޫނެވެ.
މިރޭގެ ހަމަލާ އިރާނުން ދިނީ ބެލިސްޓިކް މިސައިލްތަކާއި ރޮކެޓުތައް ބޭނުންކޮށްގެންނެވެ.
