ހޯމް މިނިސްޓަރަކީ ވެސް ރައްޔިތުންގެ ހާދިމެކެވެ. ދިވެހި ކޮންމެ ރައްޔިތަކަށް ވެސް އެމަނިކުފާނަށް ގުޅައި މެސެޖް ކުރެވޭނެ އެވެ. އެއީ ވަކި މީހަކަށް އޮތް ހައްގެއް ނޫނެވެ. އަދި އެކަމެއް ބަލާ ރަނގަޅު ކުރުމަކީ ވެސް އެމަނިކުފާނުގެ ޒިންމާއެކެވެ.
ގައުމުގެ ދާހިލީ ވަޒީރު ޒިންމާ މިވަގުތަށް އުފުލަމުން ގެންދަވަނީ ދިވެހި އަސްކަރިއްޔާގެ ކެޕްޓަނެއްގެ ބުރަ މަސްއޫލިއްޔަތު އަދާކުރެއްވި އަލީ އިހްސާނެވެ. އެމެރިކާ އާއި ދުނިޔޭގެ އެކި ކަންކޮޅުތަކުން އަސްކަރީ ތަމްރީން ހާސިލް ކުރައްވާ އިހްސާނަކީ ތޯތޯ ވަޒީރެއް ނޫނެވެ.
ރައްޔިތުންނާއި ގުޅޭ އެތައް ބުރަ މަސްއޫލިއްޔަތުތަކެއް ކޮޑުފުޅުގައި އަޅުއްވާފައިގެން މިއަދު ވެސް ރައްޔިތުންގެ ހިދުމަތުގައި އެހުންނެވީ ދިވެހި އަސްކަރިއްޔާގެ ފަހުރުވެރި ރިޓަޔަރ އޮފިޝަރެކެވެ.
ދިވެހި ފުލުހުންގެ ހިދުމަތާއި ޖަލުތަކާއި އިމިގްރޭޝަނާއި ވަޒީފާ އާއި ބެހޭ ކަންކަމާއި ކަސްޓަމްސްގެ އިތުރުން ނެޝަނަލް ރަޖިސްޓްރޭޝަނާއި އެހެންވެސް ރައްޔިތުންގެ ސީދާ މަސްލަހަތާއި ގުޅިފައިވާ އެތައް ކަމެއްގައި ރައްޔިތުންގެ ހިދުމަތުގައި މިއަދު ވެސް ސާބިތުކަމާއިއެކު ދާހިލީ ވަޒީރު އިހްސާނު ގެންދަނީ މަސައްކަތް ކުރައްވަމުން ނެވެ.
ދިވެހި ގައުމުގެ އަމްނު ބެލެހެއްޓުމުގެ ބުރަ ބިޔަ ޒިންމާ މިއަދު ވިލަރެސް ކުރައްވަނީ ވަޒީރު އިހްސާނެވެ. އެއީ ހަގީގަތެވެ. އެމަނިކުފާނަށް ރައްޔިތުން ގުޅާނެ އެވެ. މެސެޖް ކުރާނެ އެވެ. އެކަންކަން ބަލައި ފިޔަވަޅު އެޅުމަކީ އެމަނިކުފާނުގެ ޒިންމާއެވެ. އެއީ ގޯހެއް ނޫނެވެ.
ދިވެހި ރައްޔިތަކަށް ދިމާވާ ކޮންމެ ބޮޑުކަމެއް ގައުމުގެ ދާހިލީ ވަޒީރުގެ ސަމާލުކަމަށް އެކަމެއް ގެނައުމަކީ ކޮންމެ ހެން ކުރަން ޖެހޭ ކަމެކެވެ. އެކަމުގައި ރައުދާއި ޔުމުނެއް އަދި ދާއޫދާއި ޔައުގޫބެއް އިސްތިސްނާއެއް ނުވާނެވެ. އެއީ ވެސް ދިވެހިންނެވެ.
