އިސްރާޢީލަށް ދެމުންދާ ޙަމަލާތައް ހުއްޓާނުލާނެ ކަމަށާއި، އިސްރާޢީލުން ދޭ އެއްވެސް އިންޒާރަކަށް ފަސްޖެހުމެއް ނެތް ކަމަށް އީރާނުގެ ނުފޫޒުގަދަ ރޫހީ ލީޑަރ އާޔަތުﷲ އަލީ ޚާމަނާއީ ވިދާޅުވެއްޖެއެވެ.
އީރާނުގެ ވެރިރަށުން މީހުން ފޭބުމަށް އިންޒާރުދީ، އީރާނުގެ ނިއުކްލިއަރ ސައިޓްތަކަށް ހަމަލާ ދޭނޭ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ އިންޒާރު ދީފައެވެ. ނަމަވެސް މިކަމުގެ ރައްދުގައި އީރާނުން ބުނެފައިވަނީ އީރާނު ލައްވައި އެއްވެސް ބަޔަކަށް މަޖުބޫރުން އެއްވެސް ކަމެއް ނުކުރުވޭނޭ ކަމަށެވެ.
އެއްވެސް ޝަރުޠަކާ ނުލައި އަމާން ދިނުން ނޫން އިތުރު ގޮތެއް އީރާނަށް ނެތް ކަމުގައި ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވުމާ އެކު، ޔަހޫދީ ފައުޖުން އީރާންގެ އަމާޒުތަކަށް އަނެއްކާ ވެސް ވަނީ ނުރައްކާތެރި ޙަމަލާތަކެއް ދީފައެވެ. ޔަހޫދީން އިސްވެ އީރާނަށް ޙަމަލާ ދޭން ފަށާފައި ވަނީ ޖޫން 13ވަނަ ދުވަހުއެވެ. މި ވަގުތު އެންމެ ގިނަ ޙަމަލާތައް އަމާޒު ކުރަމުން ދަނީ ވެރިރަށް ޠަހްރާނާއި، އެ ސަރަޙައްދުގައި އޮތް އެހެން ރަށްތަކަށެވެ.އީރާންގެ މީޑިޔާތަކުން ބުނީ، ޔަހޫދީންގެ ނިރުބަވެރި ޙަމަލާތަކުން ސަލާމަތްވުމަށް ޠަހްރާންގައި ދިރިއުޅޭ އެތަކެއް ހާސް ރައްޔިތުން އެ ރަށް ދޫކޮށް، ރައްކާތެރި ހިސާބުތަކަށް ދަތުރު ކުރުމަށް މަސައްކަތް ކުރަމުންދާ ކަމުގައެވެ. ޠަހްރާން ދޫކޮށް ދަތުރު ކުރަމުންދާ މީހުންގެ އަދަދު އިތުރުވުމާ އެކު، އެ ރަށުން ބޭރަށް ދަތުރު ކުރެވެން އޮތް މަގުތަކުގައި ތޮއްޖެހިފައިވާ ކަމުގައި ވެސް އީރާނުން މީޑިޔާތަކުން ރިޕޯޓު ކުރެއެވެ.
އިސްރާއީލާއި އެމެރިކާއާ ދެމެދު ބަދަލުކުރަމުންދާ ހަމަލާތަކުގެ ތެރެއަށް އެމެރިކާ ވަދެ، އެމެރިކާއިން އީރާނާ ދެކޮޅަށް ހަމަލާދިނުމުގެ ނަތީޖާ ނިކަން ގޯސްވާނޭކަން އެމެރިކާ ރަނގަޅަށް ދަންނަން ޖެހޭނޭ ކަމަށްވެސް، އީރާނުގެ ރޫހީ ލީޑަރު ވިދާޅުވިއެވެ.
