އީރާނުން ބުނިފަދައިން ހަގީގަތުގައި ވެސް ތާރީހުގައި ލިޔެލައިފިއެވެ. މިހާތަނަށް ސަހްޔޫނީ ޔަހޫދީން ދެކެފައި ނުވާ، ހީކުރި ގޮތާ މުޅިން ހިލާފަށް ބޮޑެތި ގެއްލުންތަކެއް ދީ އެކަނިމާ އެކަނި ދުނިޔޭގެ ސުޕަ ޕަވަރ އެމެރިކާގެ ދޮންދަރި އިޒްރޭލު ތަޅާ ރޯނާ ކޮށްލައިފި އެވެ.
އެމެރިކާ އެދަރިއަށް ކާންދީ ބޮޑުކޮށް ބަލަމުން ދަނިކޮށެވެ. އީރާނުން ތާރީހުގައި ލިޔެލާ ޔަހޫދީ އިޒްރޭލް ކުޑަކޮށްލައިފިއެވެ. ޔަހޫދީން ބުނާކަހަލައެވެ. ”ބައްޕާ ތިމަންނަ މަރައިފި އޭ. ދެން ނުކެރޭނެއޭ.“
އީރާނުގެ އަސްލު ބާރު މިއަދު ޔަހޫދީންނާއި އެމެރިކާއާއި މުޅި ދުނިޔެއަށް ވެސް ދައްކާލައިފިއެވެ. މިހުރިހާ ކަމެއް ކުރުމަށް އީރާނުން ވަނީ ވަރަށް ބޮޑެތި ގުރުބާނީތަކެއް ވެފައެވެ. އީރާނުގެ މުހިންމު ތަޖުރިބާކާރު އެތަށް އެތަށް މުރުޝިދުންނާއި ޕްރޮފެސަރުންނާއި އާރމީ ޗީފުން ވަނީ ޔަހޫދީ އިޒްރޭލާއި އެމެރިކާވެގެން އެކި ގޮތްގޮތަށް އެކިތަނުގައި ޝަހީދުކޮށްލާފައެވެ. ނަމަވެސް އީރާނުން ދުނިޔެއަށް ދެއްކީ ނަމޫނާއެވެ. ކަންކަމުގައި ވަރަށް ވެސް ޑިސިޕްލިންއެވެ. އީރާނުން ދުނިޔޭގައި ހެދިފައި މިއޮތް ގާނޫނު ދަނެއެވެ. ހިލާފެއް ނުވެއެވެ.
އީރާނު އެމެރިކާގެ ދަތިކުރުމުގެ ފިޔަވަޅުތަކައި މިހާރު އޮންނަތާ ކިތަންމެ ޒަމާނެކެވެ. ކުރުކޮށް ބުނަންޏާ މުޅި ދުނިޔެއިން ބާކީ ކޮށް އެކަހެރިކޮށްލާފައިވާ ގައުމެކެވެ. ދަތިކުރުމުގެ ފިޔަވަޅުތައް އެޅެން ހުރި ހުރިހާ ދާއިރާ އަކުން ވަނީ އަޅާފަ އެވެ. ނަމަވެސް އީރާނުން އެމެރިކާ އަށް ބޯގުދެއް ނުކުރިއެވެ. ކުޑަކަކޫ މައްޗަށް ފިރިއެއް ވެސް ނުކުރެވުނެވެ. އެހާލަތުގައި އޮވެމެ އެމީހުން ދިޔައީ އަމިއްލަ ފައިމައްޗަށް ތެދުވެ ކުރިއަރާ ފަންނީ ގޮތުންނާއި އިލްމީގޮތުން ކުރި ހޯދަމުންނެވެ. އެކަމުގެ ނަތީޖާއެއްގެ ގޮތުން އީރާނަކީ މިޔަދު ސަރަހައްދީ ބޮޑު ބާރެކެވެ.
މިސައިލް ޓެކްނޮލޮޖީގެ މިޔަދުގެ ރަސްގެފާނެވެ. އީރާނުން ބޭނުން ނަމަ ކިތަންމެ ބާރުގަދަ ބޮމެއް ވެސް އުފެއްދޭހާ ގާބިލްކަމާއި ކުޅަދާނަކަން އެބަހުއްޓެވެ. އަދި ދަތިކުރުމުގެ ފިޔަވަޅުތައް ނެތްނަމަ އީރާނަކީ މިއަދު ދުނިޔޭގެ ލެވަލްގައި ފާހަގަކޮށްލެވޭ ވަރުގެ ނަމޫނާ ގައުމަކަށް ވާނެކަން ޔަގީނެވެ.
ހުޅަނގަށް ބޯ ނުލަނބާ ހުޅަނގުގެ ގައުމުތަކާ ދެކޮޅު ކޮންމެ ބަޔަކީ މިއަދު އެމީހުން ދެކޭގޮތުގައި އެއްވެސް ބައެއް ނޫނެވެ. ނަމަވެސް އެހުރިހާ ކަމެއް ހުރުމާއި އެކުވެސް އީރާނުން އިހްތިޔާރުކުރީ ހުޅަނގަށް ބަރޯސާ ނުވެ އަމިއްލަ ފައިމައްޗަށް ތެދުވެ ކުރިއަރާށެވެ. އީރާނުން މިދަނީ އެގޮތުގައި އަދިވެސް ކުރިއަށެވެ. އީރާނުގެ ރޫހާނީ ލީޑަރު އާޔަތުއްﷲ އަލީ ހާމަނާއީ އަކީ އީރާނުގެ ކައްޕިތާނެވެ. ހުރިހާ ކަމެއްގައި ހިކްމަތްތެރި ގޮތް ނިންމާ އިސް ފަރާތެވެ. އީރާނުން ކުރިއަށް ފިޔަވަޅުތައް އަބަދުވެސް އަޅަނީ ވަރަށް ވިސްނައިގެން ލަސްކޮށް ކުއްލިއަކަށް ކުރިއަށް ޖެހިގެންނެވެ.
