ޖޫން 13 ވަނަ ދުވަހުގެ ފަތިހުގެ ވަގުތެއްގައި ކުއްލި ގޮތަކަށް އިސްވެ އިރާނަށް ބޮންއެޅީ އިޒްރޭލުންނެވެ. ދުނިޔޭގެ ޤާނޫނުތައް މުގުރާލުމަށް ފަހު، އެމީހުންގެ އަމިއްލަ ދިފާޢުގައި ކަމަށް ބުނެ ދިން ވަރުގަދަ ވައިގެ ޙަމަލާތަކުގައި އިރާންގެ ސިފައިންގެ އިސްވެރިންނާއި، ސައިންޓިސްޓުންގެ އިތުރުން އާންމުންގެ އެތައް ބަޔަކު ޝަހީދުކޮށްލިއެވެ.
އިރާންގެ ވައިގެ ދިފާއީ ނިޒާމަށާއި، މިސައިލް ލޯންޗުކުރާ ވަޞީލަތްތަކަށް ލިބުނު ގެއްލުތަކުގެ އިތުރުން ސިފައިންގެ އެންމެ އިސްވެރިޔާ ޝަހީދުވުމުން ލިބުނު ކުއްލި ހިތާމައިގާ 36 ގަޑީއިރު ހަމަހިމޭންކަމުގައި އޮތުމަށް ފަހު، ރައްދު ޙަމަލާތައް ދޭން ފެށިއެވެ. އެގޮތުން ފުރަތަމަ މިސައިލް ރާޅުވަރުގައި 200 މިސައިލް ފޮނުވާލިއެވެ.
ދުނިޔޭގެ އެއްވެސް އެހެން ޤައުމެއްގެ އެހީތެރިކަމެއް މަދަދެއް ނެތި، އަމިއްލަ ޤައުމުގެ ދިފާޢުގައި ޒަޔަނިސްޓުންނާ ކުރިމަތިލީ ވަރަށް ވެސް ރޭވުންތެރިކަމާ ޙިކުމަތްތެރިކަމާ އެކުގައެވެ. އެހެނީ ވަށައިގެން އޮތް އިސްލާމީ ދައުލަތްތަކުގެ އެހީތެރިކަމެއް ނުލިބުނުތާ، ޢަދާވާތްތެރިންނާއެކު ބައިޢަތު ހިފިއެވެ.
އަދި ދުނިޔޭގައި މިވަގުތު ހުރި އެންމެ ފަނާކުރަނިވި ހަތިޔާރު ކަމަށްވާ ބަންކަރު ބަސްޓާ ބޭނުންކޮށްގެން އެމެރިކާއިން ވަނީ އިރާންގެ ނިއުކްލިއަ މަރުކަޒުތައް ވެސް ސުންނާފަތި ކޮށްލާފައެވެ. އެހެން ނަމަވެސް، އިޒްރޭލްގެ ވެރިރަށް ތަލް އަވީވުން އަރާ ދުން ނުފިލާ ވަރަށް ކޮންމެ ދުވަހަކު ވެސް މިސައިލްތައް ފޮނުވަމުން ގެންދިއުމުގެ ނަތީޖާއެއްގެ ގޮތުން ޢަދުއްްވުން ޙަމަލާތައް ބަދަލުކުރުން ހުއްޓާލަން އެއްބަސްވާން މަޖުބޫރުވެ، މިހާރު ވަނީ ޙަމަލާ ބަދަލުކުރުން ދެފަރާތުން ވެސް ހުއްޓާލާފައެވެ.
