ޔަހޫދީންގެ ޖާސޫސީ އިދާރާ، މޮސާޑަށް ޖާސޫސް ކޮށްދިނުމުގެ ކުށް ސާބިތުވި ތިން މީހަކަށް އީރާނުން މަރުގެ އަދަބު ދީފިއެވެ.
މިކަން ހާމަކޮށްފައި ވަނީ އީރާންގެ ޝަރުއީ ދާއިރާގެ ހަބަރުތައް ގެނެސްދޭ މީޒާން ނޫސް އޭޖެންސީންނެވެ. މި ތިން މީހުންނަށް މަރުގެ އަދަބު ދީފައިވަނީ، މޮސާޑާ ގުޅިގެން ޖާސޫސްކުރުމާއި، އީރާންގެ އިސް އޮފިޝަލަކު ޝަހީދުކޮށްލުމުގައި ބޭނުންކުރި ހަތިޔާރާއި އެހެނިހެން ސާމާނު ވަގަށް އެތެރެކުރުމުގެ ކުށް ސާބިތުވުމާ ގުޅިގެންނެވެ.
މީޒާން ނޫސް އޭޖެންސީން ބުނެފައިވާ ގޮތުގައި، މި ތިން މީހުންނަކީ އެ ގައުމުގެ އިސް އޮފިޝަލެއް ޝަހީދުކޮށްލުމަށް ބޭނުންކުރި ހަތިޔާރާއި އެހެނިހެން ސާމާނު އެތެރެކުރުމުގައި ޔަހޫދީންނާއެކު ބައިވެރިވެ، މޮސާޑަށް އެހީތެރިކަން ފޯރުކޮށްދީފައިވާ ބައެކެވެ. ނަމަވެސް، ޝަހީދުކޮށްލާފައިވަނީ ކޮން އޮފިޝަލެއްކަން އެ ނޫހުން ހާމަކޮށްފައެއް ނުވެއެވެ.
އީރާނުގެ ޝަރުއީ ދާއިރާއިން ހަބަރުދީފައިވާ ގޮތުގައި، އިސްރާއީލަށް އެއްބާރުލުންދިނުމާއި، މީހަކު ގަސްތުގައި މެރުމަށް ބޭނުންކުރާ ސާމާނު ގަވާއިދާ ހިލާފަށް އެތެރެކުރަން މަސައްކަތްކުރި ތުހުމަތުގައި ހައްޔަރުކޮށް، ޝަރީއަތްކުރެވުނު ތިން މީހަކަށް މަރުގެ އަދަބު ވަނީ ދީފައެވެ. މި ތިން މީހުންނަކީ އިދުރީސް ޢަލީ، އާޒާދު ޝުޖާއި، އަދި ރަސޫލް އަޙްމަދު ރަސޫލެވެ.
ދެ ގައުމުގެ ދެމެދުގައި ހަމަލާތައް ބަދަލުކުރުންތައް ވަނީ މީގެކުރިން ވެސް ތަކުރާރުކޮށް ހިނގާފައެވެ. އެންމެ ފަހުން ޖޫން 13 ވަނަ ދުވަހު ޔަހޫދީން ވަނީ އީރާނަށް ހަމަލާތަކެއް ދޭން ފަށާފައެވެ. އެ ހަމަލާތައް އަމާޒުކޮށްފައިވަނީ އީރާންގެ ނިއުކްލިޔާ ޕްރޮގުރާމު ހިންގަމުންދާ މަރުކަޒުތަކަށާއި، އަސްކަރިއްޔާގެ އިސް ކޮމާންޑަރުންނާއި ނިއުކްލިޔާ ސައިންޓިސްޓުންގެ އިތުރުން އާންމުން ދިރިއުޅޭ ސަރަޙައްދުތަކަށެވެ. އޭގެ ރައްދުގައި އީރާނުން ވެސް ވަނީ ޒަޔަނިސްޓުންގެ ސިޓީތަކަށް ވަރުގަދަ ހަމަލާތަކެއް ދީ، ގިނަ އަދަދެއްގެ ޔަހޫދީން މަރާލައި، ބޮޑެތި ގެއްލުންތަކެއް ދީފައެވެ.
12 ދުވަހަށް ދެމިގެން ދިޔަ މި ހަމަލާ ބަދަލުކުރުންތައް މެދުކަނޑައިލާފައިވަނީ ޖޫން 24 ވަނަ ދުވަހުއެވެ. ނިރުބަވެރި ޔަހޫދީންގެ ހަމަލާތަކުގައި ޝަހީދުކޮށްލާފައިވާ މީހުންގެ އަދަދު ވަނީ 1,054 އަށް އަރައިފައެވެ. އަދި، ޒަހަމުކޮށްލާފައިވާ މީހުންގެ އަދަދު 4,476 އަށް އަރައެވެ.
ޔަހޫދީންގެ މި ހަމަލާތައް ދީފައިވަނީ އެ މީހުންގެ އެންމެ ބޮޑު މަދަދުގާރު، އެމެރިކާގެ ރައީސް ޑޮނަލްޑް ޓްރަމްޕްގެ ރުހުމާ އެކުގައެވެ. ޔަހޫދީންނާ ބައިވެރިވުމުގެ ގޮތުން ޖޫން 22 ވަނަ ދުވަހު އެމެރިކާގެ އަސްކަރިއްޔާއިން ވެސް އީރާންގެ ތިން ސިޓީއަކަށް ބޮން އަޅާފައިވެއެވެ. އެ ހަމަލާތައް އަމާޒުކޮށްފައިވަނީ ނަޠާންޒާއި ފޯޑޯގެ އިތުރުން އިސްފަހާންގައި ހުންނަ ނިއުކްލިޔާ މަރުކަޒުތަކަށެވެ.
މިއީ، ޔަހޫދީންނަށް ޖާސޫސް ކޮށްދިނުމުގެ ކުށް ސާބިތުވާ ބަޔަކަށް އީރާންގައި މަރުގެ އަދަބު ދީފައިވާ ފުރަތަމަ ފަހަރެއް ނޫނެވެ. މިފަދަ ހަމަލާތަކާއި ޖާސޫސީ ހަރަކާތްތަކުގެ ސަބަބުން މި ސަރަހައްދުގެ ހަމަނުޖެހުންތައް ދަނީ އިތުރުވަމުންނެވެ.
