މިދިޔަ ދައުރުގައި ވެރިކަން ކުރި އެމްޑީޕީއަށާއި ކުރީގެ ރައީސް އިބްރާހިމް މުހައްމަދު ސޯލިހު (އިބޫ)އަށް ވެރިކަން ގެއްލުނީ ތިން ސަބަބަކާ ހުރެ ކަމަށް، ރައީސް ސޯލިހު ވިދާޅުވެއްޖެ އެވެ.
ރާއްޖެ ޓީވީއަށް ދިން ހާއްސަ އިންޓަވިއުއެއްގައި ރައީސް ސޯލިހު ވަނީ އެ ތިން ސަބަބު ވެސް ހިއްސާކުރައްވާފަ އެވެ.
އެގޮތުން އެންމެ ފުރަތަމަ ސަބަބަކީ ރާއްޖޭގެ ކަނޑުން ސަރަހައްދެއް ގެއްލުވާލި ކަމަށް ބުނެ އޭރު އިދިކޮޅުގައި އޮތް ޕީޕީއެމް/ޕީއެންސީ ކޯލިޝަނުން ހިންގި ކެމްޕެއިންތަކެވެ.
ދެވަނަ ސަބަބަކަށް ރައީސް ސޯލިހު ވިދާޅުވީ ރާއްޖޭގައި ވަޒަންވެރިވެގެން ތިބި އިންޑިއާ ސިފައިން ބޭރުކުރަން އިދިކޮޅު ކޯލިޝަނުން ހިންގި ”އިންޑިއާ މިލިޓަރީ އައުޓް“ އަދި ފަހުން ”އިންޑިއާ އައުޓް“ ހަރަކާތް ކަމަށެވެ. ”އިންޑިއާ އައުޓް“ ހަރަކާތަކީ އިދިކޮޅު ކޯލިޝަނުން ހިންގި އެންމެ ބޮޑު ހަރަކާތެވެ. އޭރު މުޒާހަރާކުރަމުން ދިޔައީ ރާއްޖޭގެ އިސްތިގުލާލަށް ނުރައްކަލެއް އޮތް ކަަމަށް ބުނެ، އިންޑިއާގެ ސިފައިން ރާއްޖެއިން ބޭލުމަށް ގޮވާލަ އެވެ.
އެންމެފަހު ކަމަކަށް ރައީސް ސޯލިހު ފާހަގަކުރެއްވީ ކުރީގެ ރައީސް، އަދި 19 ވަނަ ދައުރުގެ މަޖިލީހުގެ ރައީސްކަމުގައި ހުންނެވި މުހައްމަދު ނަޝީދު، އެމްޑީޕީން ވަކިވެވަޑައިގެން ދަ ޑިމޮކްރެޓްސް އުފެއްދުމެވެ. ދަ ޑިމޮކްރެޓްސްގެ ސަބަބުން އެމްޑީޕީއަށް ލިބެންހުރި ވޯޓުކޮޅު ބެހިގެން ދިޔައީކަމަށް ވެސް ރައީސް ސޯލިހު ފާހަގަކުރެެއްވިއެވެ.
ރައީސް ނަޝީދާއި އެމަނިކުފާނާއެކު ޑިމޮކްރެޓްސް އުފެއްދުމުގައި އިސްކޮށް އުޅުއްވި ކުރީގެ އެމްޑީޕީގެ ލީޑަޝިޕްގައި ތިއްބެވި ގިނ ފަރާތްތަކުން އަނބުރާ އެމްޑީޕީއާ ގުޅިފައިވާއިރު، ރައީސް ސޯލިހާއި ރައީސް ނަޝީދު ވެސް 2028 ވަނަ އަހަރުގެ އިންތިހާބުގައި އެމްޑީޕީގެ ޓިކެޓު ހޯދުމަށް ޕްރައިމަރީގައި ވާދަކުރާނެ ކަމަށް ވަނީ އިއުލާންކުރައްވާފަ އެވެ. ރައީސް ސޯލިހު އެފަދައިން އިއުލާންކުރެއްވީ ރައީސް ނަޝީދު އެމްޑީޕީއާ އަލުން ގުޅިވަޑައިގަތުމަށް ބޭއްވި ޖަލްސާގެ އެއް ދުވަސް ކުރިންނެވެ.
ބަދަލުހިފުމުގެ ވިސްނުމެއް ދަ ޑިމޮކްރެޓްސް ނުވަތަ ރައީސް ނަޝީދަކާ މެދު ނުގެންގުޅުއްވާނެކަމަށް ރައީސް ސޯލިހު ވިދާޅުވި އެވެ. މީގެ އިތުރުން ރައީސް ސޯލިހު ފާހަގަކުރެއްވީ، 2023 ވަނަ އަހަރުގެ އިންތިހާބަށްފަހު އެމްޑީޕީއާ ޑިމޮކްރެޓްސްއާ ދެމެދު ވާހަކަތަކެއް ދެކެވުނުކަމަށެވެ.
”އެއިރު އޮތް އެއް ވިސްނުމަކީ ދެ ޕާޓީ އެއްވެގެން ކޯލިޝަނެއް ހެދުން. (އެމްޑީޕީގެ) ލީޑަޝިޕްގެ ބައެއް ބޭފުޅުން ގެންގުޅުނު ހިޔާލެއް. އަޅުގަނޑާ ހިސާބަަށް އެ ހިޔާލު ގެނައީމަ އެންމެ ފުރަމަތަ ދުވަހު ވެސް އަޅުގަނޑު ބުނިން ގަބޫލެއް ނުކުރެވޭ ތިކަމެއް. ޑިމޮކްރެޓްސްގަ ތިއްބެވި އެ ބޭފުޅުންނަށް ވެސް، އެމްޑީޕީއަށް ވެސް އަދި ގައުމަށް ވެސް އެންމެ ފައިދާހުރި ގޮތަކީ ޑިމޮކްރެޓްސްގަ ތިއްބެވި ބޭފުޅުން އެނބުރި އެމްޑީޕީއަށް ވަޑައިގަތުން،“ އިބޫ ވިދާޅުވި އެވެ.
ރައީސް ނަޝީދު އެމްޑީޕީއާ އަލުން ގުޅިވަޑައިގަތީ މިދިޔަ ހޯމަ ދުވަހު، ސަލްޓަން ޕާކުގައި ބޭއްވި ޖަލްސާއެއްގަ އެވެ. އެއީ އެ ޕާޓީން ވަކިވެވަޑައިގެންނެވިތާ ދެ އަހަރާއި ދެ ދުވަސް ފަހުންނެވެ. އެ ޖަލްސާގައި ރައީސް ސޯލިހު ބައިވެރިވެވަޑަިގެންފައިނުވެއެވެ. އެ ދުވަހު ރައީސް ސޯލިހު މާލޭގައި ނެތުމުން ބައިވެރިވެވަޑައިނުގަނެވުނީ ކަމަށް، ރައީސް ސޯލިހު ވިދާޅުވި އެވެ.
