ރައީސް ޑރ. މުހައްމަދު މުޢިއްޒުއަށް ވިސްނިވަޑައިގެންނެވި ކަމެއް އެބައޮތެވެ. އެއީ ބޮޑު ލޯނެއް ނަގައިގެން ހަދަމުން ދިޔަ އެއާޕޯޓުގެ މަސައްކަތް އަވަހަށް ނިންމައި ނުލެވިއްޖެނަމަ އެ ލޯނަކީ ދައުލަތަށް އުފުލަން ޖެހޭ ބޮޑު ބުރައަކަށް ވެގެން ހިނގައިދާނެކަމެވެ. އެހެންވެ ވެރިކަމާ ހަވާލުވެވަޑައިގެންނެވުމަށް ފަހު އެންމެ ބޮޑު އިސްކަމެއް ދެއްވި އެއް ކަމަކީ ފާޢިތުވި ދެ ވެރިކަމުގައިވެސް ނުނިންމުނު އާ ޓާނިނަލް ނިމްމައި، އާމްދަނީ ލިބޭނެ ހަބަކަށް އެތަން ބަދަލުކޮށް، އެތަނުން ލިބޭ އާމްދަނީއިން ލޯނުތައް ދެއްކުމުގެ މަގު ތަނަވަސްކުރުމެވެ.
މި ސަރުކާރުން ވެލާނާ އިންޓަނޭޝަނަލް އެއާޕޯޓު (ވީއައިއޭ)ގެ އާ ޓާމިނަލް މަސައްކަތާއި ހަވާލުވިއިރު، އެތަނަށް ބޭނުންވާ އެތައް ކަމެއް ނުފެށި އޮތް ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ސީއީއޯ އަދި މެނޭޖިން ޑިރެކްޓަރު އިބްރާހީމް ޝަރީފް މުހައްމަދު ވިދާޅުވިއެވެ.
ޝަރީފް ވިދާޅުވީ ވީއައިއޭގެ އާ ޓާމިނަލްގެ މަސައްކަތް މިސަރުކާރާ ހަމައަށް އައިއިރު އޮތީ އޮޕަރޭޝަނަލް ޓާމިނަލެއް އެތަން ހެދުމަށްޓަކައި ކުރަންޖެހޭ މަސައްކަތް ގާތްގަނޑަކަށް 40 ޕަސެންޓުގައި ކަމަށާއި ވަރަށް ގިނަ ގޮންޖެހުންތަކާއެކު އާ ޓާމިނަލް ހުޅުވަން މިހާރު ތައްޔާރުވެފައިވާ ކަމަށެވެ.
ގޮންޖެހުންތަކުގެ ވާހަކަދައްކަވަމުން ޝަރީފް ވިދާޅުވީ ކުރީ ސަރުކާރުން އެފަދަ ބޮޑު މަސައްކަތެއް ފަށައިގެން ކުރިޔަށް ގެންދިޔައިރު އެންމެ މުހިންމު އެއް ކަންތައްކަމަށްވާ ހެޑް އޮފް ސްޓޭންޑް މަގު އެއްވެސް ބަޔަކާއި ހަވާލުކޮށްފައި ނުވާ ކަމަށާއި ކަރަންޓާއި ފެނުގެ ނިޒާމުގެ އާ ޓާމިނަލަށް ގާއިމުކޮށްފައިނުވާ ކަމަށެވެ.
”އޭރަކު ހެޑް އޮފް ސްޓޭންޑް ރޯޑް ބަޔަކާ ހަވާލުކޮށްފައިވެސް ނެތް. ހެޑް އޮފް ސްޓޭންޑް ރޯޑަކީ ޓަމިނަލާއި އޭޕްރަން ގުޅުވައިދޭ ބުރިޖު ނުވަތަ ފާލަން. އެއީ ހަމައެކަނި މަގެއް ނޫން. އެ ހެޑް އޮފް ސްޓޭންޑް ރޯދުގެ ދަށުގައި ހުންނާނެ ހުރިހާ ސާވިސްތަކެއް. ކަރަންޓަކަސް، ފެނާއި ނަރުދަމާ އާއި ކޮމިނިއުނިކޭޝަން މި ހުރިހާ ވަސީލަތެއް. އޭގެއިތުރުން ހެޑް އޮފް ސްޓޭންޑް ރޯޑަކީ މިތަނަށް އަންނަ ބެގޭޖް ކާޓްތަކާއި ފަޔާ ލޮރީ އާއި ބަސްތަކާއި ދެންވެސް ހުރިހާ މެޝިނެރީއެއް ދުއްވާ މަގު.“ ޝަރީފް ވިދާޅުވިއެވެ.
މި ސަރުކާރުން އެއާޕޯޓާއި ހަވާލުވުމަށްފަހު އެންމެ ފުރަތަމަވެސް ކުރި ކަމަކީ ހެޑްއޮފް ސްޓޭންޑް ރޯޑް ހެދުމާއި ޓާމިނަލަށް ބޭނުންވާ 12 – 16 މެގާވޯޓުގެ ކަރަންޓު ގާއިމުކުރުމަށް ޕަވާ ޖެނެރޭޝަން އިތުރުމުކުރުމުގެ އިތުރުން ފެނުގެ ނިޒާމު ގާއިމް ކުރުން ކަމަށް ޝަރީފް ވަނީ ފަހަގަކުރައްވާފައެވެ.
”އަޅުގަނޑުމެން އެއާޕޯޓާ ހަވާލުވިއިރު، އަޅުގަނޑުމެންގެ ކަރަންޓު ކެޕޭސިޓީއެއް ނެތް މިވަރުގެ ބޮޑު ޓާމިނަލެއް ކަރަންޓު ބޭނުންކުރާ ވަރަކަށް. އަޅުގަނޑުމެން އެހެރީ އަލަށް ކަރަންޓު ޖެނެރޭޓް ކުރުމާއި ކަރަންޓު ވިއުގައެއް މުޅި ރަށުގައި ގާއިމުކޮށްފައި. މިތަނަކީ ފެނުން ފިނިކުރާ ތަނެއް، އެއަށް ބޭނުންވާ ފެނުގެ ކެޕޭސިޓީ އިތުރުކޮށްފަ ޕައިޕްލައިން އަޅައިގެން މިތަނަށް ގެނެސް ވާސިލްކޮށްދީފައި.“ ޝަރީފް ވިދާޅުވިއެވެ.
އެއާޕޯޓްގައި ހުންނާނީ ޓެކްނޮލޮޖީގެ އެންމެ ފަހުގެ ވަސީލަތްތައް ބޭނުންކޮށްފައިކަން ފާހަގަކުރައްވާ ޓާމިނަލްގައި ސެލްފް ސާވިސް ކިއޮކްސް އާއި އޮޓޮމޭޓެޑް އެތައް ސިސްޓަމެއް ހުންނާނެކަން ޝަރީފް ފާހަގަ ކުރެއްވިއެވެ. އެގޮތުން މުޅި ޓާމިނަލް ފިނިކުރުމުގެ ނިޒާމާއި އައްޔާއި ސައުންޑްފަދަ ކޮންމެ ކަމަކީ އެންމެ ޒަމާނީ ވަސީލަތްތައް ކަމަށް ވެސް ވިދާޅުވިއެވެ.
އެމްޑީ އެންމެ ބޮޑަށް ފާހަގަކުރެއްވި އެއް ކަމަކީ އާ ޓާމިނަލާ އެކު ހިދުމަތް ހޯދާ މީހުން ކޮންމެ ކަމަކަށް މަޑުކުރަން ޖެހޭ ވަގުތު ހުރިހާ ގޮތަކުން މަދުވުމެވެ.
ރާއްޖޭގެ ވައިގެ ދަތުރުފަތުރުކުރުމުގެ ސިނާއަތަށް އިންގިލާބީ ބަދަލުތަކެއް ގެންނާނެ މި ޓާމިނަލަކީ ޒަމާނީ ފެންވަރަށް ވެލާނާ އިންޓަނޭޝަނަލް އެއާޕޯޓް ތަރައްގީ ކުރުމަށް ކުރިއަށްގެންދާ މަޝްރުއުތަކުގައި ހިމެނޭ އެންމެ ބިޔަ އަދި އެންމެ މުހިންމު އެއް މަޝްރޫއެވެ. ފަހުގެ ޓެކްނޮލޮޖީގެ ވަސީލަތްތަކާއިއެކު މި ޓާމިނަލް ހުޅުވިގެންދިޔުމަކީ ރާއްޖޭގެ މުޅި އިގްތިސާދަށް ޚާއްސަކޮށް ފަތުރުވެރިކަމާއި ދަތުރުފަތުރުގެ ދާއިރާއަށް ބޮޑެތި ކުރިއެރުންތަކެއް ގެނުވާނެ ކަމެކެވެ.
ޝަރީފް ވިދާޅުވީ ރައްޔިތުންނަށާއި ގައުމަށް މަންފާކުރުވަނިވި ތަނަކަށް އެ ޓާމިނަލް ހަދައިދިން މޭސްތިރިއަކީ ރައީސް ޑރ. މުހައްމަދު މުއިއްޒު ކަމަށާއި އާ ޓާމިނަލް ވެގެންދާނީ ރާއްޖޭގެ ފަތުރުވެރިކަމަށްވެސް ލިބިގެންދާނެ އިންގިލާބީ ބަދަލެއް ކަމަށެވެ.
”ހަގީގަތުގައި މޭސްތިރިއެކޭ ދަންނަވަންޏާ، އަޅުގަނޑު ދަންނަވަން ޖެހޭނީ މިކަމުގެ މޭސްތިރިއަކީ އިއްޒަތްތެރި ރައީސުލްޖުމްހޫރިއްޔާ ޑރ. މުހައްމަދު މުއިއްޒުއޭ. އެކަމަށްޓަކައީ އަޅުގަނޑުމެން ވަރަށް ޝުކުރުވެސް ދަންނަވަން. މިވަގުތު މިތަނާ ހަވާލުވެ ހުންނެވި މީހެއްގެ ހައިސިއްޔަތުން މިކަން ކާމިޔާބު ވުމުގެ ސަބަބުން ރާއްޖޭގެ އިގްތިސާދަށް، އެންމެނަށް ލިބޭނެ އެތައް ފައިދާއެއް ހިތަށް ތަސައްވުރުކުރެވި އަޅުގަނޑު ލޮލުން ކަރުނަ އަންނަހާ ފޮނި އިހުސާސެއް މިއީ.“ ޝަރީފް ވިދާޅުވިއެވެ.
ޝަރީފް ވިދާޅުވީ މި މަސައްކަތަކީ ކުރީ ސަރުކާރުތަކުން ފެށި މަސައްކަތަކަށްވިޔަސް މި މަސައްކަތަށް ދިރުން ގެނެސްދީ މިހާރު ފެންނަން ހުރި ޓާމިނަލްގެ މޭސްތިރިއަކީ ރައީސް މުއިއްޒު ކަމަށެވެ. އެގޮތުން މިފަދަ ބޮޑު ޓާމިނަލެއް ހިންގުމަށް ބޭނުންވާ ކަރަންޓާއި ހެޑް އޮފް ސްޓޭންޑް މަގާއި އެހެނިހެން މުހިންމު ކަންތައްތައް ނުކޮށް ހުރިކަން އޭނާ ފާހަގަކުރެއްވިއެވެ.
އެހެންކަމުން އާ ޓާމިނަލަށް ބޭނުންވާ ކަރަންޓާއި ފެނުގެ ނިޒާމު އަދި ފެން ޑިސްޓްރިބިއުޝަނާ އަދިވެސް އެހެނިހެން މުހިންމު މަސައްކަތްތައް މިސަރުކާރުން މިހާރު ނިންމާފައިވާކަން ފާހަގަކުރައްވަމުން ޝަރީފް ވިދާޅުވީ މިފަދަ މުހިންމު ވަސީލަތްތައް ގާއިމުނުކޮށް ކުރިން އޮތް ޕްލޭނާ އެއްގޮތަށް އަމަލުކުރިނަމަ އާ ޓާމިނަލް އޮޕަރޭޝަނަށް ނުގެނެވޭނެ ކަމަށެވެ.
”އަޅުގަނޑުމެން އެއާޕޯޓާ ހަވާލުވިއިރު، އަޅުގަނޑުމެންގެ ކަރަންޓު ކެޕޭސިޓީއެއް ނެތް މިވަރުގެ ބޮޑު ޓާމިނަލެއް އޮޕަރޭޓް ކުރެވޭ ވަރަކަށް. އަޅުގަނޑުމެން އެހެރީ އަލަށް ކަރަންޓު ޖެނެރޭޓް ކުރުމާއި ކަރަންޓު ވިއުގައެއް މުޅި ރަށުގައި ގާއިމުކޮށްފައި.“ ޝަރީފް ވިދާޅުވިއެވެ.
އޮޕަރޭޝަނަލް ޓާމިނަލެއް އެތަން ހެދުމަށްޓަކައި ކުރަންޖެހޭ މަސައްކަތް އޭރު ހުރީ ގާތްގަނޑަކަށް 40 ޕަސެންޓުގައި ކަމަށާއި ވަރަށް ގިނަ ގޮންޖެހުންތަކާއެކު އާ ޓާމިނަލް ހުޅުވަން ތައްޔާރުވެފައިވާ ކަމަށް ޝަރީފް ވިދާޅުވިއެވެ.
އާ ޓާމިނަލްގެ މަސައްކަތް ފެށީ ކުރީގެ ރައީސް އަބްދުﷲ ޔާމީންގެ ވެރިކަމުގައި 2016 ގައެވެ. އަދި ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަން ނިމި، ރައީސް ޑރ. މުއިއްޒުގެ ވެރިކަން ފެށުނު އިރު، އާ ޓާމިނަލްގައި ނިމިފައިވަނީ %54 މަސައްކަތެވެ.
އާ ޓާމިނަލަކީ ރައީސް ޑރ. މުޢިއްޒުގެ ހިކުމަތްތެރި މަސައްކަތްޕުޅާއި ވިސްނުންފުޅުގެ ނަތީޖާއެވެ. އެމަނިކުފާނަކީ ބޮޑެތި ޕްރޮޖެކްތައް ހިންގަވައި ކާމިޔާބު ހޯއްދަވާފައިވާ ތަޖުރިބާކާރު ބޭފުޅެކެވެ.
