ރާއްޖޭގެ އިގްތިސާދު ފުނޑިފައިވާ ކަމަށް އެމްޑީޕީގެ ޗެއާޕާސަން އަދި ގައުމު ބަގުރޫޓު ކޮށްލި ފައްޔާޒު އިސްމާއިލް ވިދާޅުވެއްޖެ އެވެ.
އެމްޑީޕީ ގައުމު ދަވާލާފައި ވުމުން ބާޒާރުގައި ތަކެތީގެ އަގު އުފުލެން ފަށާފައިވާއިރު، އެކްސްގައި ކުރެއްވި ޕޯސްޓެއްގައި ގައުމު ދަވާލުމުގައި އިސްކޮށް އުޅުނު ބަގުރޫޓް ފައްޔާޒު ވިދާޅުވީ އާފަލެއްގެ އަގު 10 ރުފިޔާއަށް އަދި ފިޔާ ކިލޯއެއްގެ އަގު 50 ރުފިޔާއަށްވުރެ މަތިވިއިރު ކާބޯތަކެއްޗަށް ދަތިވެއްޖެ ކަމަށެވެ. ބޭސް ނުލިބޭއިރު ޒަރޫރީ މުދަލުގެ އަގުތައް ވެސް އުފުލިއްޖެ ކަމަށާއި ޑޮލަރުގެ އަގު ހުރީ 20.20 ރުފިޔާއިން މަތީގައި ކަމަށް ނިމިދިޔަ ވެރިކަމުގައި ގައުމު ލޫޓްވާލި ބަގުރޫޓް ފައްޔާޒު ވިދާޅުވި އެވެ.
”ކުދި ވިޔަފާރިތައް ދަރަނިވެ ހަލާކުވެއްޖެ. ސަރުކާރުން ނުދައްކާ ބިލުތައް 13 ބިލިއަން ރުފިޔާއަށް އަރައިފި. ރާއްޖޭގެ އިގްތިސާދު ފުނޑިއްޖެ،“ މުޅި ގައުމުގެ ކުންފުނިތަކުން ވަގަށް ލާރި ބަނޑު އަޅާލި ކަމަށް ތުހުމަތު ކުރެވޭ ފައްޔާޒު ވިދާޅުވި އެވެ.
ގައުމު ލޯނު ނަނގައި ދަރުވާލި ފައްޔާޒު ވިދާޅުވީ މި ހާލަތަށް ދިޔައިރުވެސް ގާނޫނު އަސާސީން މަނިޓަރީ ސިޔާސަތު މަތިކޮށްފައިވާ މަރުކަޒީ ބޭންކުގެ ބަހެއް ނެތް ކަމަށެވެ. އަދި މިކަންކަމާ ކަންބޮޑުވެ އެމްޑީޕީގެ ޕާލަމެންޓަރީ ގްރޫޕްއިން ލިޔުމުން ބައްދަލުކުރަން އެދުމުން ބައްދަލުވާނެ ގޮތެއް ނުވި ކަމަށާއި ރައްޔިތުން ހޮވާފައި ތިބި މަންދޫބުން ގައުމުގެ ހާލަތު ސާފުކުރަން މަސައްކަތް ކުރެއްވުމުން ފިއްލެވީ ކަމަށް ފައްޔާޒު ވިދާޅުވި އެވެ. އެ ގޮތުން، އެމްއެމްއޭއިން ޖަވާބު ނުދޭއިރު ރައްޔިތުންނަށް ކުރީ ބޮޑު މަލާމާތެއް ކަމަށް އޭނާ ވިދާޅުވި އެވެ.
އެމްޑީޕީ ވެރިިކަމުގައި ދައުލަތުން ލާރި ވަގަށް ނަނގައިގެން މޫނިމާގެ ހަދަމުންދާ ކަމަށް ތުހުމަތު ކުރެވޭ ފައްޔާޒު ވިދާޅުވީ، މިއީ ރައްޔިތުންގެ ހާލަތު ދަންނަ އަދި އެކަން ބަލަން ބޭނުން ސަރުކާރެއް ވެސް ނޫން ކަމަށެވެ.
