ރާއްޖެއަށް ދިމާވެފައިވާ ހާލަތުގެ އެންމެ ބޮޑު ޒިންމާއެއް ނަގަން ޖެހޭނީ އެމްޑީޕީން ކަމަށް ވިދާޅުވެ އިކޮނޮމިކް މިނިސްޓަރ މުހައްމަދު ސައީދު އެމްޑީޕީއަށް ވަރަށް ބޮޑަށް ފާޑުވިދާޅުވެއްޖެއެވެ.
ތަކެތީގެ އަގު އުފުލުމާއި، ދަރަނި ބޮޑުވުމާއި ގުޅޭ ގޮތުން ރޭ ޕީއެސްއެމްގެ ޕްރޮގްރާމެއްގައި ވާހަކަދައްކަވަމުން ސައީދު ވިދާޅުވީ އެމްޑީޕީން 2018 ވަނަ އަހަރު ވެރިކަމަށް އައިސް ވެރިކަމުގެ ފަސް އަހަރުގެ ދައުރު ނިންމާފައި ދިޔައިރު 152.2 ބިލިއަން ރުފިޔާގެ ދަރަންޏެއް އޮތް ކަމަށެވެ. ރައީސް އިބްރާހިމް މުހައްމަދު ޞާލިހްގެ ސަރުކާރުން އުފެއްދި ދަރަނި އޭގެކުރިން 50 އަހަރުތެރޭގައި ދިވެހި ދައުލަތުން އުފެއްދި ދަރަންޏަށްވުރެ ބޮޑު ކަމަށް ސައީދު ވިދާޅުވިއެވެ.
”ރައީސް ޞާލިޙް ވެރިކަންކުރަން ވަޑައިގެން އިރުގައި އެއް ބިލިއަން އެމެރިކާ ޑޮލަރުގެ ރިޒާވެއް ރައީސް ޔާމީން ދޫކުރައްވާފައި ވަޑައިގަތީ. ސޮވްރިންގ ޑިވެލޮޕްމަންޓް ފަންޑުގައި އަޅުގަނޑު ހަނދާންވާ ގޮތުގައި 250 މިލިއަން އެމެރިކާ ޑޮލަރު ހުރި. އެސްޑީއެފްގައި ހުރި ފައިސާއާއި އަދި އިތުރަށް އައްހާސް މިލިއަން ޗާޕްކޮށްގެން. (އެވެސް ހުސްކޮށްލި)“ ސައީދު ވިދާޅުވިއެވެ.
ސައީދު ވިދާޅުވީ ފައިސާގެ އަގު ވެއްޓިގެން ދިޔައީ ރައީސް ޞާލިހްގެ ސަރުކާރުން ފައިސާ ޗާޕްކޮށްގެން ބާޒާރަށް ނެރުމުން ކަމަށެވެ. ”2018 ވަނަ އަހަރު ބަޖެޓަކީ 28 ބިލިއަން ރުފިޔާ. 2023 ވަނަ އަހަރު ބަޖެޓް 50 ބިލިއަނަށް އަރުވާފައި ދިޔައީ. މާނައަކީ، ޗާޕްކޮށްގެން ފައިސާ މާކެޓަށް ނެރުނީމަ ރުފިޔާގެ އަގު އިންތިހާއަށް ބަލިކަށިވެގެންދިޔައީ.“ ސައީދު ވިދާޅުވިއެވެ.
ސައީދު ވިދާޅުވީ އޭރު ކުންފުނިތައް ލައްވާ ކުރުވި މަސައްކަތައް ނުދީ ހުރި ފައިސާގެ އަދަދު ވެސް 9.1 ބިލިއަނަށް އަރާ ކަމަށެވެ. ”އޭގެތެރޭގައި މި ތަން މިސާލަކަށް ޕީއެސްއެމް އިން ވެސް 190 މިލިއަން ރުފިޔާ ދޭން އޮތް. އަދި ކޮބައިތޯ ފެނަކަ، އައިއޭއެސް، މިފްކޯ، އެމްޓީސީސީ، އާރުޑީސީ، ވެމްކޯ ފަދަ ތަންތަނާ އެއްކޮށްލީމަ ޖުމުލަ.“ ސައީދު ވިދާޅުވިއެވެ.
