ކ. މާފުށީގައި ސިޓީ ހޮޓަލެއް އަޅައިދޭނެ ބަޔަކު ހޯދަން ހައްޖު ކޯޕަރޭޝަނުން މިއަދު އިއުލާންކޮށްފި އެވެ.
އެ އިއުލާނުގައި ވަނީ ރާއްޖޭގައި އެންމެ ފުޅާދާއިރާގައި ގެސްޓްހައުސްގެ ވިޔަފާރިކުރާ ރަށުގައި އަމިއްލަ ހަރަދުގައި ހޮޓަލެއް އެޅުމަށް ޝައުގުވެރިވާ ރާއްޖެ އަދި ބޭރުގެ ކުންފުނިތަކުން އަންނަ ހަފުތާގެ ބުދަ ދުވަހުގެ ކުރިން ހައްޖު ކޯޕަރޭޝަންގައި ރަޖިސްޓްރީވާން މުއްދަތު ދީފަ އެވެ.
ރަޖިސްޓްރީވުމަށްފަހު އަނބުރާ ނުލިބޭ ގޮތަށް 30،000ރ. ނުވަތަ 2،000 ޑޮލަރުގެ ފީއެއް ބުދަ ދުވަހުގެ ކުރިން ދައްކަންޖެހެ އެވެ. އެއަށްފަހު، ބިޑު ހުޅުވުން އޮންނާނީ އަންނަ މަހުގެ 11 ވަނަ ދުވަހެވެ.
ހައްޖު ކޯޕަރޭޝަނުން ބުނިގޮތުގައި ހޮޓާ އަޅާނީ ”މާފުށީ އިސްލާމިކް ޓޫރިޒަމް ޕްރައިވެޓް ލިމިޓެޑް“ (އެމްއައިޓީ) ގެ ޕްރޮޖެކްޓެއްގެ ގޮތުގަ އެވެ.
އެމްއައިޓީއަކީ ހައްޖު ކޯޕަރޭޝަންގެ ސަބްސިޑަރީ ކުންފުންޏެކެވެ.
ބިޒްނަސް ޕޯޓަލްއިން ދައްކާ ގޮތުގައި މިދިޔަ އަހަރުގެ އޮކްޓޯބަރު މަހު ރަޖިސްޓްރީ ކުރި ކުންފުނީގެ މެނޭޖިން ޑިރެކްޓަކީ މުހައްމަދު ޝިހާބެވެ. ޢެއީ ހައްޖު ކޯޕަރޭޝަންގެ ޑެޕިއުޓީ މެނޭޖިން ޑިރެކްޓަރު ވެސް މެ އެވެ. އެމްއައިޓީގެ ޑިރެކްޓަރުންގެ ގޮތުގައި ހައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލާއި ހައްޖު ކުންފުނީގެ އެހެން ބައެއް އިސްވެރިން ހިމެނިވަޑައިގަންނަވަ އެވެ.
މާފުށީގައި ހޮޓަލެއް އަޅައިދޭނެ ބަޔަކު ހޯދަން އިއުލާނުކުރިއިރު، ފިނޭންސް މިނިސްޓަރު މޫސާ ޒަމީރު ވަނީ، ދިވެހިން ހައްޖަށް ފޮނުވުމަށް އުފައްދާފައިވާ ކުންފުނިން ގެސްޓްހައުސް ހިންގުން ފަދަ ވިޔަފާރިތަކަށް ވަނުމުގެ ނަތީޖާ ރަނގަޅުނުވާނެ ކަމަށް ވިދާޅުވެފަ އެވެ.
ރައްޔިތުންގެ މަޖިލީހުން މިދިޔަ އަހަރުގެ ޑިސެމްބަރު މަހު ބޭއްވި ޖަލްސާއެއްގައި ޒަމީރު ވިދާޅުވީ ސަރުކާރު ހިއްސާވާ ކުންފުންޏެއް ނަމަ އެ ކުންފުނި ހާއްސަ ވެފައިވާ ދާއިރާގެ ތެރޭގައި މަސައްކަތް ބެހެއްޓުން މުހިންމު ކަމަށެވެ.
ހައްޖު ކޯޕަރޭޝަނަކީ މީހުން ހައްޖަށް ފޮނުވަން ލިބޭ ފަންޑު މެނޭޖް ކުރުމުގެ މަސައްކަތް ކުރާ ކުންފުންޏެއް ކަމަށާއި އެކްސެސް ފަންޑު ހުރި ނަމަ ސްޕެޝަލިސްޓުންނާ ހަވާލު ކޮށްގެން ކަންކަން ކުރުމުން އޭގެ ފައިދާ ކުންފުންޏަށް ބޮޑުވާނެ ކަމަށް ޒަމީރު ވިދާޅުވި އެވެ.
”ޓޫރިޒަމަށް އިންސްވެސްޓު ކުރާ ނަމަ ޓޫރިޒަމަށް އިންވެސްޓް ކުރެވޭނެ ކުންފުނިތައް އެބަހުރި ސަރުކާރުގެ. ހުރިހާ ކުންފުނިތަކުން، އެޗްޑީސީ ހައްޖު ކޯޕަރޭޝަން އަދި ފެނަކަ އާއި އެންމެން ގެސްޓް ހައުސް އާއި ރިސޯޓު ހެދީމާ ނަތީޖާ ރަނގަޅެއް ނުވާނެ،“ މިނިސްޓަރު ވިދާޅުވި އެވެ.
