ތަޖުރިބާ ދަތުރުގެ ގޮތުގައި ކައުންސިލްތަކުން 13 މިލިއަން ރުފިޔާ ހަރަދުކޮށްފައި އެބަހުރި ކަމަށް މާފަންނު ހުޅަނގުދާއިރާގެ މެމްބަރު މުހައްމަދު މުސްތަފާ ވިދާޅުވެއްޖެއެވެ.
މެމްބަރު މިފަދައިން ވިދާޅުވީ، މެންދުރު ޓީވީ އިން ކުރިޔަށް ގެންދިޔަ މައުޟޫ ޕޮރޮގްރާމްގައި މަޖިލީހުގެ މަސައްކަތްތަކާއި، މަޖިލީހުގެ ތަޅުމަށް މިހާރު ހުށަހެޅިފައިވާ ބިލުތަކުގެ އެންމެ ފަހުގެ އަދި އެންމެ ތަފްސީލީ މައުލޫމާތު ދެއްވަމުންނެވެ.
ލާމަރުކަޒީ ގާނުނަށް ހުށަހެޅިފައިވާ އިސްލާހުތަކަށް އަލިއަޅުވާލައި މެމްބަރު ވިދާޅުވީ، މިހާރު ކައުންސިލްތަކަށް ދޭ ފައިސާ މޮނީޓާ ކުރެވޭނެ ގޮތެއް ނޯންނަކަމަށާއި ކައުންސިލުތަކަށް ދެވޭ ފައިސާ އަށް ވާގޮތް އެންގެޖެހޭނެ ކަމަށެވެ.
މެމްބަރު ވިދާޅުވީ، ކައުންސިލަށް ވަންނަ ފައިސާ އަކީ ރައްޔިތުންގެ ފައިސާ ކަމަށާއި، އެއީ ދައުލަތުގެ ފައިސާ ކަމަށެވެ. އެގޮތުން އެ ފައިސާ ހޭދަ ކުރަނީ ކޮންގޮތަކަށް ކަން ދައުލަތުން ބަލަން ޖެހޭނެ ކަމަށް މެމްބަރު ވިދާޅުވިއެވެ.
ކައުންސިލް ތަކުން އެބަހުރި ވައިގެ ދަތުރުފަތުރުތަކަށް 13 މިލިއަން ރުފިޔާ ހަރަދު ކޮށްފައި. އެބޭފުޅުންގެ ތަޖުރިބާ ދަތުރުގެ ނަމުގައި. ތަޖުރިބާ ހޯދަން ކުރާ ދަތުރުތަކަށް އެއީ ރަށެއްގެ ތަރައްގީ އަށް ވަރަށް މުހިންމު ކަމެއްގެ ވާހަކަ މި ދެންނެވީ، ރަށުގެ ތަރައްގީއަށް، އަންހެނުންގެ ތަރައްގީ އަށް ދޭ ފައިސާ އެއީ:- މާފަންނު ހުޅަނގުދާއިރާގެ މެމްބަރު މުހައްމަދު މުސްތަފާ
މެމްބަރު ވަނީ ތަޖުރިބާ ދަތުރުތަކަށް ފަހު ރަށަށް އެނބުރިވަޑައިގެން ރަށަށް ކޮށްދީފައި ހުރީ، ނުވަތަ ރައްޔިތުންނަށް ކޮށްދީފައި ހުރީ ކޮންކަމެއްތޯ ސުވާލު އުފައްދަވާފައެވެ. އެގޮތުން މެމްބަރު ވިދާޅުވީ އެކަންކަމަށް ރަށުގެ ރައްޔިތުންނަށް ކައުންސިލްތަކުން ޖަވާބުދާރީ ވާންޖެހޭނެ ކަމުގައެވެ.
ވުމާއެކު މެމްބަރު ވިދާޅުވީ، ރައްޔިތުންނަށް ހަރަދުކުރަންދޭ ފައިސާ ހަރަދުކުރަނީ ރަނގަޅަށްތޯ ޔަގީންކުރަން ދައުލަތަށް މަޖުބޫރު ކަމަށެވެ.
މީގެ އިތުރުން މެމްބަރު ވިދާޅުވީ، އުސޫލެއްނެތި ކައުންސިލްތަކަށް ކޮންޓްރެކްޓަށް މީހުން ނެގުންވެސް މިހާރު އޮތީ ހައްދުފަހަނައަޅާފައި ކަމަށެވެ.
އެގޮތުން ތަފާސްހިސާބަށް ބަލާއިރު އައްޑޫ ސިޓީ ކައުންސިލްގައި އެގޮތަށް ބޮޑު މުސާރަދީފައި ވަގުތީގޮތުން ނަގާފައިތިބި 130 މުވައްޒަފުން މިހާރުވެސް އެބަތިބި ކަމަށާއި، ފުވައްމުލައް ސިޓީގައި 34 މުވައްޒަފުން ނަގާފައި އެބަތިބި ކަމަށް ވެސް މެމްބަރު ވިދާޅުވިއެވެ.
ލާމަރުކަޒީ ގާނުނަށް ގެނައި އިސްލާހުގެ ބިލުގައި ވަނީ، ކައުންސިލުތަކުގެ ދައުރުގެ ފަހު އަހަރު ފިނޭންސް މިިނިސްޓްރީއާއި ލޯކަލް ގަވާމަންޓް އޮތޯރިޓީ(އެލްޖީއޭ)އިން ކަނޑައަޅާ އުސޫލާ އެއްގޮތް ނޫން ގޮތަކަށް މާލީ ބައެއް ކަންކަން ނުކުރެވޭނެ ކަމަށެވެ.
އެގޮތުން އިންތިހާބާ ގާތްވުމުން ކައުންސިލްގެ އިގްތިސޯދުތަކުގައި ހުންނަ ފަޅު ފަޅާއި، ބިން ތަކުގެ އިތުރުން ފަރުތައް ކުއްޔަށް ނުދެވޭނެ އެވެ. އަދި ކައުންސިލް އިދާރާއަށް ނުވަތަ ކައުންސިލްގެ އޮފީހަކަށް ދާއިމީ މުވައްޒަފުން ނެގުން ނުވަތަ ކޮންޓްރެކްޓަށް ވެސް މުވައްޒަފުން ނުނެގޭނެ އެވެ. މީގެ އިތުރުން، ކައުންސިލްތަކުން އެކަށައަޅާފައިވާ ތަރައްގީގެ ޕްލޭންގައި ކަނޑައެޅިފައި ނުވާ ތަރައްގީގެ އާ މަޝްރޫއުތައް ވެސް ނުފެށޭނެ ކަމަށް ބިލުގައި ވަނީ ބަޔާން ކޮށްފައެވެ.
