ވިކްޓަރީ ޑޭ ފާހަގަކުރުމަށް ރައީސް މުއިއްޒު ހިމެނިވަޑައިގަންނަވާހެން ދުނިޔޭގެ ލީޑަރުން އަންނަމަހު ޗައިނާއަށް ހާއްސަ ދަތުރުފުޅެއް ކުރައްވާނެކަން އެ ގައުމުގެ މީޑިއާތަކުން ރިޕޯޓުކޮށްފިއެވެ.
ޗައިނާގެ މީޑިއާތަކުން ރިޕޯޓުކުރާގޮތުގައި އަންނަ މަހުގެ 3 ވަނަ ދުވަހު ފާހަގަކުރާ އެ ގައުމުގެ ވިކްޓަރީ ޑޭ ގެ ހަރަކާތްތަކަށް ރައީސް މުއިއްޒު ހިމެނިވަޑައިގަންނަވާހެން މުޅި ޖުމްލަ 26 ގައުމެއްގެ ލީޑަރުން ޗައިނާއަށް ވަޑައިގަތުމަށް އެގައުމުގެ ރައީސް ޝީ ޖިންޕިން ވަނީ ދައުވަތުދެއްވާފައެވެ.
ދެވަނަ ބޮޑު ހަނގުރާމައިގައި ޗައިނާއިން ޖަޕާނާ ދެކޮޅަށް ކުރި ހަނގުރާމައިގައި ލިބުނު ކާމިޔާބީ ފާހަގަކުރުމަށް ބާއްވާ މި އިހުތިފާލުތަކުގައި ރަޝިއާގެ ރައީސް ވްލަޑިމިއަރ ޕްޓިން ، އުތުރު ކޮރެއާގެ ލީޑަރު ކިމް ޖޮންގް އުން، އިންޑޮނޭޝިއާގެ ރައީސް ޕްރަބޯވޯ ސުބިއަންޓޯ، މެލޭޝިއާގެ ބޮޑުވަޒީރު އަންވަރު އިބްރާހިމް، ޕާކިސްތާނުގެ ބޮޑުވަޒީރު ޝަހްބާޒް ޝަރީފް، އީރާނުގެ ރައީސް މަސްއޫދު ޕެޒެޝްކިއާން ހިމެނޭހެން އިތުރު ލީޑަރުންވެސް ބައިވެރިވެވަޑައިގަންނަވާނެކަމަށް އެ ގައުމުން ހާމަކުރެއެވެ.
ޗައިނާގެ ނޫސްތަކުން ސިފަކުރާގޮތުގައި ވިކްޓަރީ ޑޭ ގެ ހަރަކާތްތަކަކީ ހަމައެކަނި އަސްކަރީ ހަރަކާތެއް ނޫނެވެ.އެއީ ބައިނަލްއަޤްވާމީ ގުޅުންތަކާއި ސިޔާސީ ގުޅުންތައް ވަރުގަދަކުރުމަށް ލީޑަރުންނާއެކު ކުރިއަށް ގެންދެވޭ މުހިންމު ފުރުސަތެއްކަމަށް ނޫސްތަކުން އަންނަނީ ރިޕޯޓުކުރަމުންނެވެ.
ޗައިނާއިން ދައުވަތުދީފައިވާ ލީޑަރުންގެ ތެރެއިން އެންމެ ފާހަގަކޮށްލެވެނީ އުތުރު ކޮރެއާގެ ލީޑަރު ކިމް ޖޮން އުން އެވެ. އޭނާއަކީ މީގެ ކުރިން ބައިނަލްއަޤްވާމީ ގިނަ ޤައުމުތަކުގެ ސިޔާސީ ބައްދަލުވުންތަކަށް ވަޑައިގެންފައިވާ ބޭފުޅެއް ނޫނެވެ. ކިމް، ޕުޓިން އަދި ޗައިނާގެ ރައީސް ޝީ ޖިންޕިން އާ ދެމެދު ތިން ޤައުމުގެ ވެރިންގެ ބައްދަލުވުމެއް ބޭއްވުމުގެ ފުރުސަތު މީގެ ސަބަބުން ފަހިވެގެންދާނެއެވެ.
މީގެ އިތުރުން އީރާނުގެ ރައީސް މަސްޢޫދު ޕެޒެޝްކިޔާން ޗައިނާއަށް ވަޑައިގަތުމަކީ، މި އަހަރުގެ ކުރީކޮޅު އިރާނާއި އިސްރާއީލްއާ ދެމެދު ހިނގި ހަނގުރާމައަށް ފަހު، އަދި އިރާނުގެ ނިއުކްލިއަރ ޕްރޮގްރާމާ ގުޅިގެން ހުޅަނގުން އީރާނަށް އެޅި ދަތިކުރުމުގެ ފިޔަވަޅުތަކަށް ދެވޭ ވަރުގަދަ ރައްދަކަށް ވެގެންދާނެއެވެ.
ރައީސް މުއިއްޒުގެ މި ދަތުރުފުޅުވެގެންދާނީ އެގައުމަށް އެމަނިކުފާނު ކުރައްވާ 2 ވަނަ ދަތުރުފުޅަށެވެ.
