ލޯތްބާއި ކުލުނު ޢާއިލާތަކުގައި ދަމަހައްޓައި ދިނުމުގައި މާމައިންނާއި ކާފައިންނަކީ އިލާހީ ހެޔޮ ރަޙްމަތެއް ކަމުގައި ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ރައީސް މިފަދައިން ވިދާޅުވީ، މިއަދު ފާހަގަކުރާ މާމަ ކާފަ ދުވަހުގެ މުނާސަބާގައި މީސްމީޑިއާގައި ކުރެއްވި ޕޯސްޓެއްގައެވެ.
ރައީސް ވިދާޅުވިގޮތުގައި، ޢާއިލީ ގުޅުންތައް ވަރުގަދަކޮށް، ލޯތްބާއި ކުލުނު ދަރިފަސްކޮޅުތަކުގެ ތެރޭގައި ދަމަހައްޓައި ދިނުމުގައި މާމައިންނާއި ކާފައިންގެ ދައުރަކީ ވަރަށް މުހިންމު ދައުރެކެވެ. އެބޭފުޅުންނަކީ ދިރިއުޅުމުގެ ތަޖުރިބާ އާއި އިރުޝާދު ދިނުމުގައި ވެސް ޢާއިލާތަކަށް ލިބޭ ބޮޑު ނިޢުމަތެއް ކަމަށް ރައީސް ފާހަގަކުރެއްވިއެވެ.
“މި އުފާވެރި ދުވަހު އަޅުގަނޑުގެ ހިތުގެ އިޚްލާޞްތެރި ހެޔޮ ދުޢާތައް ވަނީ، ދިވެހި ކޮންމެ މާމައަކާއި ކާފަޔަކާއެކު.“ ރައީސް ވިދާޅުވެފަވެއެވެ.
ދިވެހިރާއްޖޭގައި، ޤައުމީ ކާފަ އަދި މާމަ ދުވަސް ފާހަގަކުރެވެނީ ކޮންމެ އަހަރެއްގެ ސެޕްޓެމްބަރ 1 ވަނަ ދުވަހުއެވެ. މިދުވަސް ފާހަގަކުރަނީ ޢާއިލީ ގުޅުންތަކުގައި މާމައިންނާއި ކާފައިންގެ މުހިންމުކަން ހަނދާންކޮށްދީ، އެބޭފުޅުންނަށް ޝުކުރުވެރިވުމުގެ ގޮތުންނެވެ.
