ހަމާސް ޖަމާއަތުގެ ބައިވެރިވުން ނޯންނަ ގޮތަށް ފަލަސްތީނުގެ ދައުލަތެއް އުފެއްދުމަށް ހަދާފައިވާ ”ނިއު ޔޯކް ޑެކްލަރޭޝަން“ އަށް ތާއީދުކުރުމަށް އދ.ގެ އާންމު މަޖިލީހުން މިއަދު ވަނީ ފާސްކޮށްފައެވެ. މިއީ ފަލަސްތީނާއި އިޒްރޭލު ވެސް ދައުލަތެއްގެ ގޮތުގައި ބަލައިގަނެ، ފަލަސްތީނުގެ މައްސަލައަށް ދާއިމީ ހައްލެއް ހޯދުމަށް ކުރާ މަސައްކަތުގައި މި ފަހުން ކުރެވުނު އެންމެ މުހިންމު މަސައްކަތެކެވެ.

ހަމާސް އިން ޣައްޒާގެ ކޮންޓްރޯލް ދޫކޮށްލައި ފަލަސްތީން އޮތޯރިޓީއަށް ހަތިޔާރު ހަވާލުކުރުމަށް ގޮވާލާ މި ގަރާރަށް އދ.ގެ 193 މެންބަރު ގައުމުގެ ތެރެއިން 142 ގައުމަކުން ވަނީ ތާއީދުކޮށް ވޯޓު ދީފައެވެ. ދެކޮޅަށް 10 ވޯޓު ދީފައި ވާއިރު އޭގެ ތެރޭގައި އިޒްރޭލާއި އެމެރިކާ ހިމެނެއެވެ. އަދި 12 ގައުމަކުން ވޯޓުގައި ބައިވެރިއެއް ނުވެއެވެ.

ފްރާންސާއި ސައޫދީ އަރަބިއްޔާގެ އިސްނެގުމަށް ހުށަހެޅި މި ގަރާރުގައި ހަމާސްގެ އޮކްޓޫބަރު 7 ގެ ހަމަލާ ކުށްވެރިކޮށް، އިޒްރޭލުގެ ހުރިހާ އަސީރުން މިނިވަންކުރުމަށް ވެސް ގޮވާލާފައިވެއެވެ. އިޒްރޭލުން މި ގަރާރާ ދެކޮޅުހަދަމުން ބުނަނީ މިއީ ހަމާސްގެ ހަމަލާގެ ބަދަލުގައި ދޭ އިނާމެއްގެ ގޮތުގައި ކަމަށެވެ.

”ނިއު ޔޯކް ޑެކްލަރޭޝަން“ ގައި، އދ.ގެ ސަލާމަތީ މަޖިލީހުގެ ބެލުމުގެ ދަށުން ބައިނަލްއަގުވާމީ ”ސްޓެބިލައިޒޭޝަން މިޝަނެއް“ ގާއިމުކުރުމަށް ވެސް ވަނީ ހުށަހަޅާފައެވެ. މި މިޝަންގެ މައިގަނޑު މަގްސަދަކީ ފަލަސްތީނުގެ އާންމު ރައްޔިތުންނަށް އެހީތެރިވުމާއި ސަލާމަތީ ޒިންމާތައް އަދާކުރުމުގައި ފަލަސްތީން އޮތޯރިޓީއަށް އެހީތެރިވުމެވެ.

މި ގަރާރު ފާސްކުރުމުގެ ކުރިން އިޒްރޭލުން އިއްޔެ ވަނީ ގުދުސްއާ ޖެހިގެން، ހުޅަނގު އައްސޭރީގައި ޔަހޫދީން އާބާދުކުރުމުގެ މަސައްކަތް ފަށައިފައެވެ. އެ ރަސްމިއްޔާތުގައި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވަނީ ފަލަސްތީނުގެ ދައުލަތެއް އުފެއްދިޔަ ނުދޭނެ ކަމަށް އިންޒާރު ދީފައެވެ.