މީޑިއާގެ މިނިވަންކަމާއި މައުލޫމާތު ހޯދައި ލިބިގަތުމުގެ ހައްގު ރައްކާތެރި ކުރެވޭ ގޮތަށް މިނިވަން މީޑިއާ ޒިންމާދާރު ކުރެވޭ ގޮތަށް މަޖިލީހުން ހެދި ގާނޫނު ފުރިހަމައަށް ތަންފީޒު ކުރުމުން ޔޫރަޕިއަން ޔޫނިއަން (އީޔޫ) އިން ގޮވާލައިފި އެވެ.
އަވައްޓެރި ސްރީލަންކާގައި ހުންނަ އީޔޫގެ އޮފީހުން ސޯޝަލްމީޑިއާގައި ކުރި ޕޯސްޓެއްގައި ބުނީ މިނިވަން މީޑިއާ ޒިންމާދާރު ކުރުމަށް ހެދި ގާނޫނު މަޖިލީހުން ފާސްކުރި ގޮތާއި އެ ގާނޫނުގެ ސަބަބުން ހިޔާލުފާޅު ކުރުމުގެ މިނިވަންކަމަށް ކޮށްފާނެ އަސަރު އެ ޔޫނިއަނުން ބަލާފައިވާ ކަމަށެވެ.
އެގޮތުން އެކަންކަން ދެނެގަތުމަށްޓަކައި ދިވެހި ނޫސްވެރިންނާއި މަދަނީ ޖަމިއްޔާތަކުން ފާޅުކޮށްފައިވާ ކަންބޮޑުވުންތަކަށް ވަރަށް ބޮޑަށް ބެލި ކަމަށާއި ގާނޫނު ތަންފީޒު ކުރުމުގައި ސަމާލުވުމަށް މިދިޔަ ހުކުރު ދުވަހު އީޔޫއިން ކުރި ޕޯސްޓުގައި ބުންޏެވެ.
”ޑިމޮކްރެސީގެ މައިގަނޑު ބިންގާތަކުގެ ގޮތުގައި އިންސާނީ ހައްގުތަކާ ގުޅޭ އެއްބަސްވުންތަކަށް ފުރިހަމައަށް ހުރުމަތްތެރިކޮށް ހިތުމާއެކު މީޑިއާގެ މިނިވަންކަމާއި މައުލޫމާތު ހޯދުމާއި ލިބިގަތުމުގެ ހައްގު ރައްކާތެރި ކުރެވޭ ގޮތަށް މި ގާނޫނު ތަންފީޒު ކުރުމަކީ މުހިންމު ކަމެކެވެ.“ އީޔޫއިން ކުރި ޕޯސްޓުގައި ބުންޏެވެ.
