ނިމިދިޔަ އެމްޑީޕީގެ ސަރުކާރުގައި ފެނަކަ ކޯޕަރޭޝަނުން ޕެޓީ ކޭޝްގެ ގޮތުގައި ދޫކުރި ފައިސާއިން ވެސް ވައްކަންކޮށްފައިވާކަން ހާމަވެއްޖެއެވެ.
މިކަން ހާމަވެފައިވަނީ އޮޑިޓާ ޖެނެރަލްގެ އޮފީހުން އާންމު ކުރި ފެނަކަ ކޯޕަރޭޝަން ލިމިޓެޑްގެ ހާއްސަ އޮޑިޓް ރިޕޯޓުންނެވެ. އެއީ 2021 ވަނަ އަހަރުން ފެށިގެން 2023 ވަނަ އަހަރާއި ހަމައަށް މުދަލާއި ހިދުމަތް ހޯދުން، ކުންފުނީގެ މާލީ ހާލަތާއި ހިސާބުތައް ބެލެހެއްޓުމާއި ގުޅޭ ގޮތުން ހަދާފައިވާ އޮޑިޓެކެވެ.
މި އޮޑިޓުގައި ނަހަމަ ގޮތުގައި ގިނަ ކަންކަން އަދި ކޮރަޕްޝަންގެ ހިންގާފައިވާކަން އެނގެން އޮތްއިރު، އިންޖީނުގެއާއި އޮފީސް އިމާރާތްތައް އެޅުމާއި ފެނާއި ނަރުދަމާގެ މަޝްރޫއުތަކާއި ގުޅުންހުރި ހަރަދުތައް ކުރުމަށް 2021 އިން 2023 އާއި ހަމައަށް ޖުމްލަ 26،493،169 (26 މިލިއަން ރުފިޔާ) ގެ ޕެޓީ ކޭޝް ފައިސާގެ ގޮތުގައި އެ މަޝްރޫއުތަކުގެ ޕްރޮޖެކްޓް މެނޭޖަރުންގެ ގޮތުގައި މަސައްކަތް ކުރުމަށް ވަގުތީ ގޮތުން ނަގާފައިވާ މުވައްޒަފުންނަށް ދޫކޮށްފައިވާކަން އެނގެއެވެ.
”މީގެ ތެރެއިން ޖުމްލަ 21،368،039 ރުފިޔާ އެ މުވައްޒަފުންގެ އަމިއްލަ ބޭންކް އެކައުންޓަށް ޖަމާކޮށްފައިވާއިރު، ބާކީ 5،125،130 ރުފިޔާ ނަގުދު ފައިސާގެ ގޮތުގައި ހަވާލުކޮށްފައިވޭ“ އޮޑިޓުގައި ފާހަގަކޮށްފައިވެއެވެ.
އޮޑިޓުގައި ވަނީ ޕެޓީ ކޭޝް ފައިސާ ރީއެމްބާސް ކުރުމަށް ހުށަހަޅާ ރިޕޯޓުގައި ހިމެނޭ ހަރަދުތަކަކީ ކުންފުނީޣެ ބޭނުމަށް ކޮށްފައިވާ ހަރަދެއްކަން ކަށަވަރު ކުރެވޭނެ އިތުރު އިންތިޒާމުތަކެއް ހަމަޖެހިފައި ނުވުމުން ޕެޓީ ކޭޝްގެ ގޮތުގައި ދޫކޮށްފައިވާ ފައިސާއިން ކުރާ ހަރަދުތަކަކީ ކުންފުނީގެ ބޭނުމަށް ކުރާ ހަރަދުތަކެއްކަން ކަށަވަރު ނުކުރެވުމާއި ކުންފުނީގެ ބޭނުމަށް ނޫން އެހެން ބޭނުންތަކަށް ޕެޓީ ކޭޝް ފައިސާ ހަރަދުކުރުމުގެ ފުރުސަތު އޮތްކަން ފާހަގަކޮށްފައެވެ.
ފެނަކައިން ކަރަންޓާއި ފެނާއި ނަރުދަމާގެ ހިދުމަތް ފޯރުކޮށްދޭ ރަށްރަށުގެ ބްރާންޗުތަކުގައި ރައްކާތެރިކަމާއެކު ފައިސާގެ ކަންކަން ބެލެހެއްޓުމަށް ތިޖޫރިއާއި ކުންފުނީގެ ދާއިމީ މުވައްޒަފުންނާއި އަދި ބައެއް ބްރާންޗުތަކުގައި ބޭންކު އެކައުންޓް ފަދަ ވަސީލަތްތައް ބޭނުންކުރެވޭނެ އިންތިޒާމު ހަމަޖައްސާފައިވީ ނަމަވެސް ކުންފުނިން އިންހައުސްކޮށް ކުރިއަށް ގެންދިޔަ މަޝްރޫއުތަކުގައި ޕެޓީ ކޭޝް ފައިސާގެ ކަންކަން ބެލެހެއްޓުމުގެ ޒިންމާ ހަވާލުކޮށްފައިވަނީ އެ މަޝްރޫއުތަކުގެ މަސައްކަތް ކުރުމަށް ކޮންޓްރެކްޓު އުސޫލުން ވަގުތީ ގޮތުން ނަގާފައިވާ މުވައްޒަފުންނަށްކަން ވެސް އޮޑިޓުގައި ވަނީ ފާހަގަކޮށްފައެވެ.
އޮޑިޓުގައި ވަނީ އެކުންފުނީގެ މެނޭޖިން ޑިރެކްޓަރުގެ ބިއުރޯއަށް ދޫކޮސްފައިވާ ޕެޓީކޭޝް ފައިސާގެ ތަފްސީލު ވެސް ލިބިފައި ނުވާ ކަން ފާހަގަކޮށްފައެވެ.
އެމްޑީ ބިއުރޯއާއި ލޮޖިސްޓިކް ޑިޕާޓްމެންޓަށް ޕެޓީ ކޭޝް ފައިސާގެ ގޮތުގައި 2021 ވަނަ އަހަރުން ފެށިގެން 2023 ވަނަ އަހަރުގެ ނިޔަލަށް ޖުމްލަ 6،344،793 (6 މިލިއަން ރުފިޔާ) ދޫކޮށްފައި ވިއަސް، ޕެޓީ ކޭޝް ފައިސާ ހަރަދު ކުރި ގޮތުގެ ބައެއް ރިޕޯޓްތަކާއި ބިލްތައް އެކޯޕަރޭޝަނުން އޮޑިޓަރުންނަށް ފޯރުކޮށްދީފައި ނުވާކަމާއި އެމްޑީ ބިއުރޯއަށް އެމުއްދަތުގެ ތެރޭގައި ޕެޓީ ކޭޝްގެ ގޮތުގައި ދޫކޮށްފައިވާ 884،082 ރުފިޔާ ހަރަދު ކުރި ގޮތުގެ ރިޕޯޓުތަކާއި ބިލްތައް ލިބިފައި ނުވާކަން ވަނީ ފާހަގަ ކޮށްފައެވެ.
”ލޮޖިސްޓިކް ޑިޕާޓްމެންޓަށް އެ މުއްދަތުގެ ތެރޭގައި ޕެޓީ ކޭޝްގެ ގޮތުގައި ދޫކޮށްފައިވާ ޖުމްލަ 5،460،711 (5 މިލިއަން ރުފިޔާ) ގެ ތެރެއިން ޖުމްލަ 1،550،161 (1 މިލިއަން ރުފިޔާ) ހަރަދު ކުރި ގޮތުގެ ރިޕޯޓުތަކާއި ބިލުތައް ވެސް އޮޑިޓަރުންނަށް ލބިފައި ނުވޭ“ އޮޑިޓުގައި ވަނީ ބުނެފައެވެ.
މިކަންކަން މިހެން އޮތުމުން، އެ ފައިސާއިން ކުރި ހަރަދުތަކާއި ހަރަދުކުރި ބޭނުމާއި އަދި އެ ފައިސާ ހަރަދުކޮށްފައިވަނީ އެކޯޕަރޭޝަންގެ ބޭނުމަށްކަން ކަށަވަރު ކުރެވިފައި ނުވާ ކަމަށް ވެސް އޮޑިޓް ރިޕޯޓުގައި ވަނީ ފާހަގަކޮށްފައެވެ.
