ކޮންމެ އަތޮޅަކުން ވެސް އައިޑީ ކާޑުގެ ހިދުމަތާއި ފާސްޕޯޓުގެ ހިދުމަތް ލިބޭގޮތް ހަދައި މުޅި ރާއްޖޭގައި އެ ހިދުމަތް ފަށައިފި އެވެ.
ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅުތަކުގެ ތެރޭގައި ހިމެނޭ ކޮންމެ ރަށަކުން ޕާސްޕޯޓާއި އައިޑީކާޑު ދޫކުރުމުގެ ހިދުމަތަކީ ރަށްރަށުން ގިނަ ބަޔަކު އޭރު އެދެމުން ދިޔަ ކަމެކެވެ. ޕާސްޕޯޓުގެ ހިދުމަތަށް އެދޭތީ ފަސޭހަ ކުރުމުގެ ގޮތުން ހުރިހާ އަތޮޅަކުން ވެސް ޕާސްޕޯޓުގެ ހިދުމަތް ދިނުމުގެ މަސައްކަތް މި ސަރުކާރުން ފެށީ މިދިޔަ އަހަރު ނޮވެމްބަރު މަހު އެވެ.
އެ މަސައްކަތް ފެށިއިރު މާލޭ ފިޔަވައި ޕާސްޕޯޓުގެ ހިދުމަތް ލިބޭ ތަންތަނަކީ ހުޅުމާލޭ ފޭސް އެކަކާއި ފޭސް ދޭއްގެ އިތުރުން ވިލިމާލެ އާއި ލ. ފޮނަދޫ އަދި ދ. ކުޑަހުވަދޫ އެވެ. އަދި އައިޑީކާޑުގެ ހިދުމަތް ފަށާފައި ވަނީ ހުޅުމާލޭގެ ފޭސް އެކަކާއި ދޭއްގެ އިތުރުން ވިލިމާލެ އާއި ހދ. ކުޅުދުއްފުށީގަ އެވެ.
އދ. އަށް ރައީސް މިހާރު ކުރައްވާ ދަތުރުފުޅުގައި މިއަދު ފަހު ރަށަކަށް ވަޑައިގެންނެވީ އެ އަތޮޅު މަހިބަދޫއަށެވެ.
އެ ރަށު ރައްޔިތުންނާއެކު ބޭއްވި ބައްދަލުވުމުގައި ވަނީ އެ ރަށުގައި ޕާސްޕޯޓުގެ ހިދުމަތް ފަށައިފަ އެވެ. އެއާއެކު ރާއްޖޭގެ ކޮންމެ އަތޮޅަކުން ވެސް މިހާރު ޕާސްޕޯޓުގެ ހިދުމަތް ލިބޭނެ އެވެ
މަހިބަދޫގައި ބޭއްވި ޖަލްސާގައި ހޯމް މިނިސްޓަރު އަލީ އިހުސާން ވަނީ ރައީސަށް، ޕާސްޕޯޓާއި އައިޑީކާޑު ރާއްޖޭގެ ހުރިހާ އަތޮޅެއްގައި ދޭން ފެށުނުކަން ފާހަގަ ކުރުމަށް ހަނދާނީ ފިލައެއް ވެސް އަރުވައިފަ އެވެ.
މީގެ ކުރިން އެ ހިދުމަތް ހޯދަން ދާން ޖެހެނީ ބޮޑު ހަރަދުކޮށް މާލެއަށެވެ. ހާއްސަކޮށް ޕާސްޕޯޓުގެ ހިދުމަތަށެވެ. ނަމަވެސް ރައީސްގެ އެ ނިންމެވުމާއެކީ، މިހާރު ރާއްޖޭގެ ކޮންމެ ރަށެއްގައި ހުރެގެން ވެސް އައިޑީ އާއި ޕާސްޕޯޓު ހައްދައި އެ އަތޮޅަކުން ލިބޭނެ އެވެ.
