މުޅި ހަފްތާއެއްކޮށް އިޝްތިހާރުކުރުމަށްފަހު އެމްޑީޕީ އިން ހުޅުމާލޭގައި ބޭއްވި ކަންމަތީ އެއްވުމުގައި މަދު އަދަދެއްގެ ބަޔަކު ބައިވެރިވިވުމުން، އެ އެއްވުން ޓީވީއިން ބޮރޮޑްކާސްޓް ކުރަމުން ދިޔަ ރާއްޖެޓީވީ އިން އެއްވުމުގެ ލައިވް އެންމެ 16 މިނެޓަށްފަހު ކަނޑާލައިފިއެވެ.
ރާއްޖެ ޓީވީން މިގޮތަށް ކަންތައް ކޮށްފައިވަނީ އޮންލައިންކޮށްވެސް އެ އެއްވުން އެކި ޕްލެޓްފޯމްތަކުގައި ބަަލަމުންދިޔަ މީހުންގެ އަދަދު މަދުވުމުންނެވެ. އެމްޑީޕީ އިން ހޮނިހިރު ދުވަހުގެ ރޭ ބޭއްވި ކަންމަތީ ބައްދަލުވުމުގައި އެމްޑީޕީގެ އެކްޓިވިސްޓުން ވަނީ ގައުމުގައި ހަމަނުޖެހުން ހިންގުމަށް ގޮވާލާ، އެކަމަށް ހިތްވަރުދިނުމުގެ ގޮތުން ޤާނޫނު އަސާސީ އާއި މެދު އަމިއްލަ، ފަހުމްކުރުންތަކެއް ހުށަހަޅާ، ރައީސް މުއިއްޒުގެ ސަރުކާރުން ރާއްޖޭގެ ވެރިކަން ކުރަނީ ޤާނޫނު އަސާސީ އާއި ޚިލާފަށް ކަމަށް ދޭހަވާގޮތަށް ސުންޕާ، ފަނާކުރުވަނިވި ވިސްނުމުގެ ނުރައްކާތެރި ވާހަކަތަކެއް ދައްކާފައެވެ.
ކަންމަތީ ބައްދަލުވުމުގައި އެމްޑީޕީ އެކްޓިވިސްޓުން ދިޔައީ މި ސަރަހައްދުގެ ގައުމުތަކުގައ ދާދިފަހުން ވެރިކަންތަން ފުރޮޅާލުމުގެ ނަމުގައި ހިންގި އަނިޔާވެރި ޖަރީމާތައް އެއީ ސަބަބުވެރި އަމަލުތަކެއް ކަމަށް ބުނެ، ދިވެހިންވެސް އަމިއްލަ ގައުމުގެ ތަންތަނުގައި ހުޅުޖަހާ، ލޫޓުވާ، ސަލާމަތީ ބާރުތަކާ ދެކޮޅަށް ހަނގުރާމަ އިއުލާންކޮށް، މީހުން މަރާ، މަގުފޭރުމަށް ހިތްވަރުދީފައެވެ. އަދި އެކަންކަމަކީ، ކޮންމެ މީހަކު ކުރިކަމުގައި ވިޔަސް ކުށްވެރިވާނެ ކަމެއް ނޫންކަމަށް ވެސް ގޮވާލަފައިވެއެވެ.
އެމްޑީޕީގެ ފަސްފަހަތަށް ބަލާލާއިރު، އެ ޕާޓީ އަކީ މީގެ ކުރިންވެސް ރާއްޖޭގެ އެކި ހިސާބުތަކުގައި ބޮޑެތި ހަމަނުޖެހުންތައް ހިންގާ، ޓެރެރިސްޓު ހަމަލާދީ، ހުޅުޖަހާ، ދައުލަތަށް އެތަށް މިލިއަން ރުފިޔާއެއްގެ ގެއްލުންދީފައިވާ ބައިގަނޑެކެވެ.
