ރާއްޖެއަށް މިހާރު ކުރަމުންދާ ވިއްސާރައިގައި 14 ރަށަކަށް އެކި ވަރުގެ ގެއްލުންތައް ލިބިގެން ރިޕޯޓްކޮށްފައިވާ ކަމަށް ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ބުނެފިއެވެ.
އެންޑީއެމްއޭއިން ބުނީ މިހާރު ރާއްޖެއަށް ކުރަމުންދާ ވިއްސާރާގައި އެކި ވަރުގެ ގެއްލުން ލިބިގެން އެންޑީއެމްއޭ އަށް ރިޕޯޓްކޮށްފައިވާ ކަމަށެވެ. އެގޮތުން 14 ރަށަކަށް ގެއްލުންތައް ވެފައިވާ ކަމަށް އެ އިދާރާއިން ވަނީ ބުނެފައެވެ.
ވިއްސާރާގެ ސަބަބުން ގެއްލުންވެގެން ރިޕޯޓްކޮށްފައިވާ ރަށްތަކަކީ ގދ. މަޑަވެލި، ގދ. ހޯނޑެއްދޫ، ގދ. ނަޑެއްލާ، ގދ. ރަތަފަންދޫ، ގދ. ފަރެސްމާތޮޑާ، ގއ. މާމެންދޫ، ލ. މާވައް، ހދ. ނޮޅިވަރަންފަރު، ކުޅުދުއްފުށި ސިޓީ، ސ.މަރަދޫ، ރ. ފައިނު، މ. ދިއްގަރު، މ. މަޑުއްވަރީ އަދި ފުވައްމުލައް ސިޓީ އެވެ.
އެމްޑީއެމްއޭއިން ބުނީ ކުޅުދުއްފުށީ އެއް ގެެޔަކަށް ގެއްލުން ލިބިގެން އެހެން ގެޔަކަށް އެއް ދުވަހަށް މީހުން ބަދަލުކޮށްފައިވާ ކަމަށެވެ. އެ ހާދިސާ ފިޔަވައި އިތުރު އެއްވެސް ރަށެއްގެ ގެޔަކުން މީހުން ނެރެންޖެހޭ ހާލަތަކަށް ގޮސްފައެއްނުވާ ކަމަށެވެ. އޭގެ އިތުރުން ވިއްސާރާގައި ހދ. ނޭކުރެންދޫ ބޯޓަށް ގެއްލުން ލިބިގެން ރިޕޯޓްކޮށްފައިވާ ކަމަށް ވަނީ ބުނެފައެވެ.
އެންޑިއެމްއޭއިން ބުނީ ވިއްސާރާގައި ގެއްލުން ލިބުނު ރަށްތަކަށް ލިބިފައިވާ ގެއްލުންތަައް ދެނެގަތުމުގެ މަސައްކަތް ރަށު ކައުންސިލްތަކާއި އަތޮޅު ކައުންސިލްތަކާއި ގުޅިގެން މިހާރު ދަނީ ކުރަމުން ކަމަށެވެ.
ރާއްޖެއަށް މިހާރު ކުރަމުންދަނީ ހުޅަނގު މޫސުމުގެ ވިއްސާރައެވެ. މި ވިއްސާރަ އަލިވާނެ ކަމަށް ގައުމީ މޫސުމާ ބެހޭ އިދާރާއިން ލަފާކުރަނީ އަންނަ ހޮނިހިރު ދުވަހުގެ ފަހުންނެވެ.
