ލ. ހިތަދޫ ކުނަހަންދޫ ކޯޒްވޭ ޤާއިމުކުރުމުގެ މަޝްރޫޢުގެ ޢަމަލީ މަސައްކަތް ފަށައިފިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޝަރަފުވެރިކޮށްދެއްވި މި ރަސްމިއްޔާތުގައި، މި މަޝްރޫޢުގެ ޢަމަލީ މަސައްކަތް ފައްޓަވައިދެއްވީ، މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އޮނަރަބަލް ޑރ. ޢަބްދުﷲ މުޢާޒު އެވެ. މި ރަސްމިއްޔާތުގައި ކެބިނެޓް މިނިސްޓަރުންނާއި، ރައްޔިތުންގެ މަޖިލީހުގެ މެންބަރުންނާއި، އެމްޓީސީސީގެ މެނޭޖިންގ ޑިރެކްޓަރ، ޑެޕިއުޓީ ކޮމިޝަނަރ އޮފް ޕޮލިސް (ރިޓަޔަރޑް) އަޙުމަދު ސަޢުދީ އާއި، ހިތަދޫ އާއި ކުނަހަންދޫ ކައުންސިލް މެންބަރުން އަދި ސަރުކާރުގެ އިދާރާތަކުގެ އިސްވެރިން ބައިވެރިވެވަޑައިގެންނެވިއެވެ.
ހިތަދޫއާއި ކުނަހަންދޫއަކީ ދެ ރަށެއްގެ ގޮތުގައި އޮތް ނަމަވެސް، އެއް އާއިލާތަކެއް ދިރިއުޅެމުންދާ ރަށެވެ. ތަފާތު އެކިއެކި ބޭނުންތަކަށް މި ދެ ރަށުގެ ރައްޔިތުން ވަރަށް ގިނައިން އެއް ރަށުން އަނެއް ރަށަށް ދަތުރުކުރަން ޖެހެއެވެ. މޫސުން ގޯސްވެ ކަނޑުގަދަ ވެއްޖެނަމަ މި ދަތުރުތައް ކުރުން އޮންނަނީ ދަތިކަމަކަށް ވެފައެވެ. ނަމަވެސް، ކޯޒްވޭ ޤާއިމުވެގެން އައުމާއެކު މި ދަތިތަކަށް ޙައްލު އައިސް ފަސޭހަކަމާއެކު ދެ ރަށުގެ ރައްޔިތުންނަށްވެސް އެއް ރަށުން އަނެއް ރަށަށް ދިއުމުގެ މަގުފަހިވެގެންދާނެއެވެ. ހަމައެހެންމެ، ކޯޒްވޭގެ ސަބަބުން އިޖްތިމާޢީ ގޮތުންނާއި އިޤްތިޞާދީ ގޮތުންވެސް ހެޔޮބަދަލުތަކެއް އަންނާނެއެވެ.
މި މަޝްރޫޢުގެ ދަށުން ކުނަހަންދޫ އާއި މެންދޫއާއި ދޭތެރޭ 210 މީޓަރުގެ ކޯޒްވޭއަކާއި މެންދޫއާއި ހިތަދޫއާއި ދޭތެރޭ 390 މީޓަރުގެ ކޯޒްވޭއެއް ޤާއިމުކުރެވޭނެއެވެ. ދުއްވާ ސަރަޙައްދުގެ ފުޅާ މިނަކީ 7.80 މީޓަރެވެ. މީގެ އިތުރުން، 500 މީޓަރުގެ ސަރަޙައްދެއްގައި ރިވެޓްމެންޓް ޖަހާނެއެވެ. މިއީ 81.22 މިލިއަން ރުފިޔާއަށް 500 ދުވަސްތެރޭ ނިންމަން އެމްޓީސީސީއާ ޙަވާލުކޮށްފައިވާ މަޝްރޫޢެކެވެ.
