ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅާ އެއްގޮތަށް، އެކަނި ދަރިން ބަލަހައްޓާ މައިންނާއި ބަފައިންނަށް ދެމުން ގެންދާ މާލީ އެހީ، މަހަކު 15,000 ރުފިޔާއާ ހަމައަށް ބޮޑުކުރުމަށް ސަރުކާރުން މިއަދު ނިންމައިފިއެވެ.
މި ބަދަލު ގެނެސްފައިވަނީ އެކަނި ދަރިން ބަލަހައްޓާ މައިން ނުވަތަ ބަފައިންނަށް މާލީ އެހީ ދިނުމާ ބެހޭ ގަވާއިދަށް އިސްލާހު ގެނެސްގެންނެވެ.
މި އިސްލާހުގެ ކުރިން އެކަނި ދަރިން ބަލަހައްޓާ ފަރާތްތަކަށް، ކޮންމެ ކުއްޖަކަށް ދެމުން އައީ 1,000 ރުފިޔާގެ އިނާޔަތެކެވެ. އެގޮތުން އެންމެ ގިނަވެގެން ލިބެމުން ދިޔަ އަދަދަކީ 10,000 ރުފިޔާއެވެ. ނަމަވެސް، މިއަދު ގެނެވުނު އާ ބަދަލާއެކު، އެކަނި ދަރިން ބަލަހައްޓާ މައިންނާއި ބަފައިންނަށް، ހަތަރު ކުދިންނާ ހަމައަށް ކޮންމެ ކުއްޖަކަށް 3,000 ރުފިޔާގެ މާލީ އެހީއެއް ލިބޭނެއެވެ. މިކަމުގެ ސަބަބުން، މިސާލަކަށް ހަތަރު ކުދިން ތިބޭ ފަރާތްތަކަށް މަހަކު 12,000 ރުފިޔާ ލިބިގެންދާނެއެވެ.
ހަތަރު ކުދިންނަށްވުރެ އިތުރަށް ކުދިން ތިބޭނަމަ، އިތުރުވާ ކޮންމެ ކުއްޖަކަށް މަހަކު 1,000 ރުފިޔާގެ އިތުރު އެހީއެއް ލިބިގެންދާނެއެވެ. މިގޮތަށް ދެވޭ އެލަވަންސްގެ އެންމެ މަތީ އަދަދަކަށް ހަމަޖައްސާފައިވަނީ މަހަކު 15,000 ރުފިޔާއެވެ. މާނައަކީ، އެކަނި ދަރިން ބަލަހައްޓާ ފަރާތްތަކަށް ކޮންމެ އަހަރަކު ޖުމްލަ 180,000 ރުފިޔާ ލިބިގެންދާނެއެވެ.
މޯލްޑިވްސް ސްޓެޓިސްޓިކްސް ބިއުރޯއިން ދުނިޔޭގެ ކުޑަކުދިންގެ ދުވަހުގެ މުނާސަބަތުގައި އާންމު ކުރި ތަފާސް ހިސާބުތަކުން ދައްކާ ގޮތުގައި އެކަނިވެރި މައިންގެ ގޮތުގައި ރާއްޖޭގައި 5،443 މީހުން ރަޖިސްޓްރީކޮށްފައި އެބަތިއްބެވެ. މި މީހުންނަކީ ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ދެމުންދާ އެކަނިވެރި މައިންގެ އެލަވަންސް ލިބޭ ފަރާތްތަކެވެ.
ރައީސް މީގެ ކުރިން އަންދާޒާ ކުރި ގޮތުގައި އެކަނިވެރި މައިންގެ އެލަވެންސް ލިބެން ޖެހޭ ގާތްގަނޑަކަށް 5،878 މީހުން އެބަތިއްބެވެ.
އެކަނިވެރި މައިންނާއި އެކަނިވެރި ބަފައިންނަށް، ދަރިންގެ ތަރުބިއްޔަތަށްޓަކައި މިހާރު ދޭ އަދަދު 12،000ރ. އަށް ވުރެ އިތުރު ނުވާ ގޮތަށް ކޮންމެ ދަރިއަކަށް މަހަކު 3،000ރ. ގެ ރޭޓުން އިތުރު ކޮށްދިނުމަކީ ރައީސް މުއިއްޒުގެ މެނިފެސްޓޯގައި ހިމެނޭ ވައުދެކެވެ.
