ރައީސް ޑޮނަލްޑް ޓްރަމްޕް، ވެނެޒުއޭލާގެ ލީޑަރަށް މަގާމުން އިސްތިއުފާ ދެއްވުމަށް އެންމެ ފަހުގެ ފުރުސަތެއް އެރުވިއެވެ. މީގެ ހަފުތާއެއް ކުރިން ކުރެއްވި ސިއްރު ފޯނު ކޯލެއްގައި، ޓްރަމްޕް ނިކޮލަސް މަދޫރޯ ގާތު ވިދާޅުވީ އޭނާ މަގާމުން އިސްތިއުފާ ދާންޖެހޭނެ ކަމަށެވެ.
އެ ހިސާބަށް ދިޔައިރު، އެމެރިކާގެ ހަނގުރާމަމަތީ މަނަވަރުތަކުގެ ފައުޖެއް ވެނެޒުއޭލާގެ އައްސޭރިފަށުގައި އޮތީ ތައްޔާރުވެފައެވެ. ސީއައިއޭގެ ޓީމެއް ވަނީ ސިއްރުން ވެނެޒުއޭލާއަށް ވަދެ، މަދޫރޯގެ ހަރަކާތްތަކާއި ކުރާކަންކަން ބަލަން ފަށާފައެވެ. އޭނާ ނިދާ ތަނާއި، ކާ އެއްޗެއްސާއި، ދަތުރުކުރާ ތަންތަން ދިޔައީ މޮނިޓަރު ކުރަމުންނެވެ.
”ކަލޭ ޖެހޭނީ އަމާންދޭން،“ ހޮނިހިރު ދުވަހު މާ-އަ-ލާގޯގައި ބޭއްވި ނޫސްވެރިންގެ ބައްދަލުވުމެއްގައި އެ ފޯނު ކޯލް ހަނދާން އާކުރައްވަމުން ޓްރަމްޕް ވިދާޅުވިއެވެ.
މަދޫރޯ ނެގީ އޭނާގެ ހަޔާތުގެ އެންމެ ނުރައްކާތެރި ރިސްކެވެ. އޭނާ އަމާންދިނުމާ ”ގާތަށް ދިޔަ“ ކަމަށް ޓްރަމްޕް ވިދާޅުވިއެވެ. ނަމަވެސް އޭނާ ހުރި ގޮތުގައެވެ. މަގާމުން އިސްތިއުފާއެއް ނުދެއްވިއެވެ.
އެ ގޮތްދޫނުކުރުމުގެ ސަބަބުން، ބާރުގެ ބޭނުންކޮށްގެން މަދޫރޯ ބޭރުކުރުމަށް ރާވާފައިވާ ސިއްރު އަދި ނުރައްކާތެރި ޕްލޭންގެ ފަހު މަރުހަލާ ފެށުނެވެ. ހުކުރު ދުވަހުގެ ރޭ އީ.ޓީ ގަޑިން 10:46 ގައި، ޓްރަމްޕް އެ އޮޕަރޭޝަން ފެށުމަށް ފަހުގެ އަމުރު ދެއްވިއެވެ.
ޓްރަމްޕްގެ ދެ ދައުރުގައިވެސް ހިންގި އެންމެ ކެރޭ، ޖެހިލުންކުޑަ އަސްކަރީ ހަރަކާތް ކަމަށްވާ ”އޮޕަރޭޝަން އެބްސޮލިއުޓް ރިޒޯލްވް“ ގެ މި ތަފްސީލުތައް ބިނާވެފައިވަނީ ވައިޓް ހައުސް، ސަރުކާރުގެ އިދާރާތަކާއި ކޮންގްރެސްގެ އޮފިޝަލުންގެ އިތުރުން އާންމުކޮށްފައިވާ ބަޔާންތަކުގެ މައްޗަށެވެ.
މިކަމުގެ މައުލޫމާތު އެނގޭ މީހަކު ބުނި ގޮތުގައި، އޮގަސްޓް މަހު ކުރީކޮޅު ސީއައިއޭ އިން ވަނީ މަދޫރޯގެ ހަރަކާތްތަކާ ބެހޭ ”ޚާއްޞަ މައުލޫމާތު“ ހޯދުމުގެ މަގުސަދުގައި ކުޑަ ޔުނިޓެއް ސިއްރުން ވެނެޒުއޭލާއަށް ފޮނުވާފައެވެ.
ހޮނިހިރު ދުވަހުގެ ނޫސްވެރިންގެ ބައްދަލުވުމުގައި ޖޮއިންޓް ޗީފްސް އޮފް ސްޓާފްގެ ޗެއާމަން ޑޭން ”ރައިޒިން“ ކޭން ވިދާޅުވި ގޮތުގައި، މަދޫރޯ ގެންގުޅޭ ޕެޓްސް ވެސް އެމެރިކާގެ އިންޓެލިޖެންސް އެޖެންޓުންނަށް އެނގެއެވެ.
ފޮކްސް ނިއުސްއަށް ދެއްވި އިންޓަވިއުއެއްގައި ޓްރަމްޕް ވިދާޅުވީ، އެމެރިކާއިން އެއްކޮށްފައިވާ މައުލޫމާތުގެ މައްޗަށް ބިނާކޮށް، ރިޔާސީ ގަނޑުވަރުގެ ނަކަލެއް ހަދައިގެން އެލީޓް ސިފައިން އެތައް މަހެއް ވަންދެން ތަމްރީނު ހެދި ކަމަށެވެ. މިއީ 2011 ވަނަ އަހަރު އުސާމާ ބިން ލާދިން މަރާލި ސިފައިން، ޕާކިސްތާނުގެ އަހްމަދުއާބާދުގައި ހުރި އޭނާގެ ގޭގެ މޮޑެލްއެއް ބޭނުންކޮށްގެން ތަމްރީނު ހެދި ގޮތާ އެއްގޮތް ގޮތެކެވެ. މަދޫރޯގެ ރައްކާތެރި ކޮޓަރީގެ ދަގަނޑު ފާރުތައް ކަނޑަން ޖެހިއްޖެ ހާލަތެއްގައި ބޭނުންކުރުމަށް، ޓްރަމްޕް ”މެސިވް ބްލޯޓޯޗްސް“ (ބޮޑެތި އަލިފާން އުފައްދާ އާލާތްތައް) ކަމަށް ސިފަކުރެއްވި ތަކެއްޗާއެކު އެމީހުން ތަމްރީނު ހެދިއެވެ.
އެއާއެކު، ޓްރަމްޕް ސަރުކާރުގެ މައިގަނޑު ޓީމަކުން އެތައް މަހެއް ވަންދެން ސިއްރުން މި އޮޕަރޭޝަންގައި މަސައްކަތްކޮށް، ގަވާއިދުން ބައްދަލުވުންތަކާއި ފޯނު ކޯލްތައް ބާއްވައި ޓްރަމްޕަށް މައުލޫމާތު އަރުވަމުން ދިޔަ ކަމަށް މިކަމުގެ މައުލޫމާތު އެނގޭ މީހަކު ބުންޏެވެ. އެ ގްރޫޕުގައި ހިމެނެނީ މިހާރު ވެނެޒުއޭލާ ހިންގުމާ ހަވާލުވާނެ ކަމަށް ޓްރަމްޕް ވިދާޅުވި ބައެއް ބޭފުޅުންނެވެ. އޭގެ ތެރޭގައި ސެކްރެޓަރީ އޮފް ސްޓޭޓް މާކޯ ރޫބިއޯ، ޑިފެންސް ސެކްރެޓަރީ ޕީޓް ހެގްސެތު، ސީ.އައި.އޭ ޑިރެކްޓަރު ޖޯން ރެޓްކްލިފް އަދި ވައިޓް ހައުސްގެ ޑެޕިއުޓީ ޗީފް އޮފް ސްޓާފް ސްޓީވަން މިލާ ހިމެނެއެވެ.
މުޅި ހަރީފު މޫސުމުގައި ޓްރަމްޕް ގެންދެވީ މަދޫރޯއަށް ކުރާ ފިއްތުންތައް އިތުރުކުރަމުންނެވެ. ސެޕްޓެމްބަރު މަހު، ޓްރަމްޕް ސަރުކާރުން ވަނީ އެމެރިކާއަށް މަސްތުވާތަކެތި ފޮނުވާ ކަމަށް ތުހުމަތުކޮށް ކެރީބިއަން ކަނޑުގައި ބައެއް އުޅަނދުތައް ފައްތާލަން ފަށާފައެވެ. ނަމަވެސް ތަޖުރިބާކާރުން ބުނާ ގޮތުގައި އެ އުޅަނދުތަކަކީ ޔޫރަޕަށް ކޮކެއިން ފޮނުވަމުންދިޔަ އުޅަނދުތަކެކެވެ. މިހާތަނަށް އެމެރިކާއިން ވަނީ މަސްތުވާތަކެތި އުފުލާ ކަމަށް ތުހުމަތުކުރެވޭ މަދުވެގެން 35 އުޅަނދަކަށް ހަމަލާދީ، 114 މީހުން މަރާލާފައެވެ.
އުޅަނދުތަކަށް ހަމަލާދިނުމުގެ ސަބަބު ވަގުތާއެކު ބަދަލުވަމުން ދިޔައެވެ. ޓްރަމްޕް ނައްތާލަން ބޭނުންވީ މަސްތުވާތަކެތި ހެއްޔެވެ؟ ނުވަތަ މަދޫރޯގެ ވެރިކަން ހެއްޔެވެ؟ ނޮވެމްބަރު މަހު ވެނިޓީ ފެއަރ އަށް ދެއްވި އިންޓަވިއުއެއްގައި، ވައިޓް ހައުސްގެ ޗީފް އޮފް ސްޓާފް ސޫޒީ ވައިލްސް ވިދާޅުވީ، މިކަމުގެ ބޭނުމަކީ މަދޫރޯ ”ބަލި ގަބޫލުކުރަންދެން“ އުޅަނދުފަހަރަށް ހަމަލާދިނުން ކަމަށެވެ.
އަދި ވެނެޒުއޭލާގެ މައި ބިމަށް ހަމަލާއެއް ދިނުމަށް ކޮންގްރެސްގެ ހުއްދަ ބޭނުންވާނެ ކަމަށާއި، އެއީ ވައިޓް ހައުސްއަށް ލިބިފައިވާ ހުއްދައެއް ނޫން ކަމަށްވެސް އޭނާ އެ އިންޓަވިއުގައި ވިދާޅުވިއެވެ. ”އޭނާ އެއްގަމުގައި އެއްވެސް ހަރަކާތެއް ހިންގުމަށް ހުއްދަ ދީފިނަމަ، އެއީ ހަނގުރާމައެއް، އޭރުން [އަހަރެމެންނަށް] ކޮންގްރެސް ބޭނުންވާނެ،“ ލިޔުންތެރިޔާ ކްރިސް ވިޕްލް ގާތު ވައިލްސް ވިދާޅުވިއެވެ.
ހަމަ އެ މަހު، އެމެރިކާގެ އެންމެ ޒަމާނީ އެއަރކްރާފްޓް ކެރިއަރ، ޔޫއެސްއެސް ޖެރަލްޑް އާރް. ފޯޑް ކެރީބިއަން ކަނޑަށް ވަދެފައިވަނީ، މަދޫރޯގެ ސަމާލުކަން ހޯދުމަށް ޓްރަމްޕް ގަބޫލުކުރެއްވި އަސްކަރީ ތައްޔާރީތަކުގެ ބައެއްގެ ގޮތުގައެވެ. ”އެތަނުގައި ވަރަށް ގިނަ އުޅަނދުފަހަރު އެބަހުރި،“ ނޫސްވެރިންގެ ބައްދަލުވުމުގައި ޓްރަމްޕް ވިދާޅުވިއެވެ.
ޗުއްޓީއަށް ޑިސެމްބަރު 19 ގައި ޓްރަމްޕް ވައިޓް ހައުސް ދޫކޮށް ވަޑައިގެންނެވިއިރު، ފަހުގެ ރޭވުންތަކުގެ މައި މަރުކަޒަކަށް ބޭނުންކުރެއްވީ މާ-އަ-ލާގޯ އެވެ. ރޭވުންތަކާ ބެހޭ މައުލޫމާތު އެނގޭ އެމެރިކާގެ ދެ އޮފިޝަލަކު ބުނި ގޮތުގައި، ސީދާ ދުވަސް ކަށަވަރު ނުވި ނަމަވެސް، އޮޕަރޭޝަން ކުރިއަށް ގެންދިއުމަށް ޓްރަމްޕް ހުއްދަ ދެއްވީ ކްރިސްމަސްގެ ކުރިންނެވެ.
ޓްރަމްޕްގެ ހަމައެކަނި ކަންބޮޑުވުމަކީ ވެނެޒުއޭލާއެއް ނޫނެވެ. ކްރިސްމަސް ދުވަހު އޭނާ އިއުލާން ކުރެއްވީ، ނައިޖީރިއާގައި ނަސާރާއިންނަށް އަނިޔާކުރާ ކަމަށް ބުނާ މައްސަލައާ ގުޅިގެން އެ ގައުމުގެ ހަނގުރާމަވެރިންނަށް ހަމަލާދިނުމަށް އަމުރުކުރެއްވި ކަމަށެވެ.
ޓްރަމްޕްގެ ގޭގައި ބޭއްވި އާ އަހަރުގެ ޕާޓީއެއްގައި، ފަސްޓް ލޭޑީ މެލަނިއާ ޓްރަމްޕާއެކު ޓަކްސީޑޯއެއްގައި ހުންނަވަނިކޮށް، 2026 ވަނަ އަހަރަށް އޭނާގެ އަޒުމަކީ ކޮބައިތޯ ނޫސްވެރިން ސުވާލުކުރުމުން ވިދާޅުވީ: ”ދުނިޔެއަށް އަމާންކަން،“ ކަމަށެވެ.
ވެނެޒުއޭލާއަށް ދިން ހަމަލާއަކީ ކިހާ ސިއްރު ކަމެއްކަން ހާމަވަނީ، ހަމަލާދޭނެ ސީދާ ވަގުތު ހުކުރު ދުވަހުގެ ރޭގަނޑާ ހަމައަށް ޕެންޓަގަންގެ ގިނަ ބަޔަކަށްވެސް ނޭނގޭތީ ކަމަށް އެމެރިކާގެ ދެ އޮފިޝަލަކު އެންބީސީ ނިއުސްއަށް ބުންޏެވެ. އާންމުކޮށް މިފަދަ އަސްކަރީ އޮޕަރޭޝަނެއްގެ ވަގުތު ކަނޑައަޅާނީ ފުޅާ ދާއިރާއެއްގައި މަޝްވަރާކުރުމަށްފަހުގައެވެ.
ނައިބު ރައީސް ޖޭ.ޑީ ވެންސް ހުކުރު ދުވަހު ވެސްޓް ޕާމް ބީޗްގައި ހުންނަ ޓްރަމްޕްގެ ގޮލްފް ކްލަބަށް ވަޑައިގެން، ހަމަލާތަކާ ބެހޭގޮތުން އޭނާއާ ބައްދަލުކުރެއްވިއެވެ. ނަމަވެސް، ދަންވަރު ވަގުތެއްގައި މޮޓޯކޭޑެއް ދަތުރުކުރުމުން، ކުރިއަށް އޮތް ހަމަލާގެ މައުލޫމާތު ވެނެޒުއޭލާއަށް ލިބިދާނެތީ، ހަމަލާ ފެށުމުގެ ކުރިން އޭނާ އެތަނުން ވަޑައިގެންނެވި ކަމަށް ވެންސްގެ ތަރުޖަމާނު ވިދާޅުވިއެވެ.
ވެނެޒުއޭލާގެ ވެރިރަށް ކަރަކަސްގެ ވައިގަދަވުމާއި ވިލާ ބޯވުމުގެ ސަބަބުން ހަމަލާ ދިނުން ދުވަސްތަކަކަށް ލަސްވި ނަމަވެސް، ހުކުރު ދުވަހު މޫސުން ރަނގަޅުވިއެވެ. ހަނދު ފުރިހަމަވެފައިވާއިރު، އުޑުމަތި އޮތީ ބޮޑަށް ސާފުކޮށެވެ. މިއީ ޕައިލެޓުންނާއި ކުރޫއިންނަށް އެކަށީގެންވާ ހާލަތެކެވެ.
މިޝަން ފެށުނީއެވެ.
”ނަސީބު އެދެން އަދި ކާމިޔާބީއަށް އެދެން،“ އަސްކަރީ ވެރިންނަށް ޓްރަމްޕް ވިދާޅުވިއެވެ. ކޭން ވިދާޅުވި ގޮތުގައި މި ބަސްތައް އަސްކަރިއްޔާގެ އެކި ފަންތިތަކަށް ފޯރުކޮށްދެވުނެވެ.
ޓްރަމްޕް ރޭގަނޑުގެ ބޮޑު ބަޔަކާއި ހެނދުނުގެ ވަގުތުތައް ހޭދަކުރެއްވީ ގޭގައި ހުންނަވައިގެން ހަމަލާ ކުރިއަށްދާ ގޮތް ބެއްލެވުމުގައެވެ. ވައިޓް ހައުސްއިން އާންމުކުރި ފޮޓޯއަކުން ފެންނަނީ އޭނާ މޭޒެއްގެ ކައިރީގައި، ޖެކެޓެއް ތުރުކުރައްވައިގެން (ނަމަވެސް އާންމުކޮށް އަޅުއްވާ ޓައި ނެތި)، ފްރޭމުން ބޭރުގައި ހުރި ވީޑިއޯ ސްކްރީނަކަށް ވަރަށް ފަރުވާތެރިކަމާއެކު ބައްލަވަން އިންނަވާ މަންޒަރެވެ. އޭނާގެ ވާތްފަރާތުގައި ރޫބިއޯ ހުންނެވިއިރު، ކަނާތްފަރާތުގައި ހުންނެވީ ރެޓްކްލިފްއެވެ. މިލަރ އިނީ ކަންބޮޑުވުމާއިއެކު އިށީނދެގެންނެވެ. ހަމަލާ ފެށުމުގެ ކުރިން ކޮންގްރެސްއަށް އެއްވެސް މައުލޫމާތެއް ނުދެއެވެ. ހޮނިހިރު ދުވަހު ޓްރަމްޕް ވިދާޅުވީ ގާނޫނު ހަދާ މަޖިލީހުގެ މެންބަރުންގެ ފަރާތުން މައުލޫމާތު ލީކުވާން ބޭނުންފުޅު ނުވީ ކަމަށެވެ.
އެއްގަމާއި ކަނޑުގެ 20 ތަފާތު ބޭސްތަކުން މަދުވެގެން 150 މަތިންދާބޯޓު ކަރަކަސްއާ ދިމާލަށް އުދުހުނެވެ. މީގެ ތެރޭގައި ބޮން އަޅާ ބޯޓުތަކާއި، ހަނގުރާމަމަތީ ބޯޓުތަކާއި، ޖާސޫސީ މައުލޫމާތު އެއްކުރުމަށް ހާއްސަ ބޯޓުތައް ހިމެނޭ ކަމަށް ކޭން ވިދާޅުވިއެވެ. ކުރޫއިންގެ އުމުރު އުޅެނީ 20 އަހަރާއި 49 އަހަރާ ދެމެދުގައެވެ.
ވެނެޒުއޭލާގެ ވެރިރަށް އޮތީ އަނދިރިކަމުގެ ތެރޭގައެވެ. މި ކުރިމަތިލުމުގައި ކުރި ހޯދުމަށްޓަކައި ކަރަކަސްއިން ކަރަންޓު ކަނޑާލީ އެމެރިކާއިން ކަމަށް ޓްރަމްޕް އިޝާރާތް ކުރެއްވިއެވެ. ކޭން ވިދާޅުވި ގޮތުގައި، ލޮލަށް ފެންނަ ހިސާބު ތިރިން (100 ފޫޓު މަތިން) އުދުހުނު ހެލިކޮޕްޓަރުތަކެއްގައި ދިޔަ ޚާއްޞަ ފައުޖުތަކާއި ތަންފީޒީ އިދާރާތަކުގެ އޮފިޝަލުން ވަނީ މަދޫރޯ އޭނާގެ ދިރިއުޅުއްވާ ގެކޮޅުން ނެރެފައެވެ. އަދި އެހެން ބައެއް މަތިންދާބޯޓުތަކުން ވެނެޒުއޭލާގެ ވައިގެ ދިފާޢީ ނިޒާމުތައް ހަލާކުކޮށްލައި، ހެލިކޮޕްޓަރުތަކަށް މަގުފަހިކޮށްދިނުމަށް ހަމަލާދިން ކަމަށްވެސް އޭނާ އިތުރަށް ވިދާޅުވިއެވެ.
ކަރަކަސްގައި ހުންނަ އަސްކަރީ މަރުކަޒެއް ކަމަށްވާ ފޯޓް ޓިއުނާގައި އެއްޗެހިތަކެއް ގޮވައި، ބޮޑެތި އަލިފާންގަނޑުތަކެއް އުފެދިފައިވާ މަންޒަރު ފެނުނެވެ.
ހޮނިހިރު ދުވަހުގެ ފަތިހު 1 ޖެހިއިރު (އީ.ޓީ)، އެމެރިކާގެ ސިފައިން ވަނީ މަދޫރޯ ހުންނެވި ކަރަކަސްގެ އިމާރާތަށް ފޯރާފައެވެ. ޓްރަމްޕް އެ ތަނަށް ސިފަކުރެއްވީ ”ވަރުގަދައަށް ރައްކާތެރިކޮށްފައިވާ އަސްކަރީ ކިއްލާއެއް“ ގެ ގޮތުގައެވެ.
ޑެލްޓާ ފޯސް އިން މަދޫރޯގެ ގެކޮޅަށް ވަދެގަތްއިރު، އޭނާއާއި އޭނާގެ އަނބިކަނބަލުން ތިއްބެވީ ”ކުއްލި ސިހުމެއްގެ ތެރޭގައި“ ކަމަށް ކޭން ވިދާޅުވިއެވެ. ޓްރަމްޕް ސިފަކުރެއްވި ގޮތުގައި، ދަގަނޑުން ހަދާފައިވާ ރައްކާތެރި ކޮޓަރިއަކަށް (ސޭފް ރޫމަކަށް) ވަދެވަޑައިގެން ސަލާމަތްވާން މަދޫރޯ މަސައްކަތް ކުރެއްވި ނަމަވެސް، އެކަން ކާމިޔާބެއް ނުވިއެވެ. އެމެރިކާގެ ފައުޖުތަކުން މަދޫރޯ އާއި އޭނާގެ އަނބިކަނބަލުން ސީލިއާ ފްލޮރެސް ހައްޔަރުކުރިއެވެ.
މަދޫރޯ ހައްޔަރުކުރުމަށްފަހު ބަޑީގެ ހަމަލާތަކެއް ބަދަލުކުރެވުނު ކަމަށާއި، އެމެރިކާގެ ހެލިކޮޕްޓަރަކަށް ހަމަލާ އަމާޒުވި ކަމަށް ކޭން ވިދާޅުވިއެވެ. އެމެރިކާގެ އޮފިޝަލަކާއި ވައިޓް ހައުސްގެ އޮފިޝަލަކު ވިދާޅުވި ގޮތުގައި، އެއްވެސް އެމެރިކާ މީހަކު މަރުވެފައެއް ނުވެއެވެ. ނަމަވެސް ބައެއް ސިފައިންނަށް އަނިޔާވެފައިވާއިރު، އެ އެންމެންގެ ހާލުވެސް މިހާރު ރަނގަޅެވެ.
ފަތިހު 3:30 (އީ.ޓީ) ވީއިރު، އެމެރިކާގެ ފައުޖުތައް ރައްކާތެރިކަމާއެކު އެ ގައުމުން ބޭރުވެފައިވާ ކަމަށް ކޭން ވިދާޅުވިއެވެ. އެ ވަގުތު ކަރަކަސްގެ ވައިގެ ތެރޭގައި ހިފާފައިވަނީ ބަޑިބޭހާއި ދުމުގެ ވަހެވެ. ވެނެޒުއޭލާގައި ހުންނަ އެމެރިކާގެ އެމްބަސީން ވަނީ އެ ގައުމުގައި ތިބި އެމެރިކާ ރައްޔިތުން ރައްކާތެރި ތަންތަނުގައި މަޑުކުރުމަށް އިރުޝާދު ދީފައެވެ.
އޭގެ ގަޑިއެއްހާއިރު ފަހުން، ޓްރަމްޕް ވަނީ ސޯޝަލް މީޑިއާ މެދުވެރިކޮށް މި ޚަބަރު ދުނިޔެއަށް ހާމަކުރައްވާފައެވެ.
”ޔުނައިޓެޑް ސްޓޭޓްސް އޮފް އެމެރިކާއިން ވަނީ ވެނެޒުއޭލާއާއި އެ ގައުމުގެ ލީޑަރު ރައީސް ނިކޮލަސް މަދޫރޯއާ ދެކޮޅަށް ބޮޑު އޮޕަރޭޝަނެއް ކާމިޔާބުކަމާއެކު ހިންގާފައެވެ. މަދޫރޯ އާއި އޭނާގެ އަނބިކަނބަލުން ވަނީ ހައްޔަރުކޮށް، އެ ގައުމުން ބޭރަށް ގެންދެވިފައެވެ.“ ޓްރަމްޕް ލިޔުއްވާފައިވެއެވެ.
ހޮނިހިރު ދުވަހުގެ ހެނދުނު ވައިޓް ހައުސްއިން އާންމުކުރި ފޮޓޯއަކުން ފެންނަނީ، ޔޫ.އެސް.އެސް އައިވޯ ޖިމާ މަނަވަރުގައި، ކަސްރަތު ހެދުމެއްގައި، ބޮލުގައި ފޮތިގަނޑެއް އަޅައި އަދި ބިޑި އަޅުވައި ހައްޔަރުކޮށްފައި ހުރި މަދޫރޯއެވެ.
ހަވީރު 4:30 (އީ.ޓީ) ވީއިރު، މަދޫރޯ ހުރީ ނިއު ޔޯކްގައެވެ. އޭނާ ދަތުރުކުރި ބޯޓު ޖެއްސީ ނިއު ޔޯކް ސިޓީގެ އުތުރުގައި އޮންނަ ނިއު ވިންޑްސަރގެ ސްޓެވާޓް އެއާޕޯޓަށެވެ. މަދޫރޯ ހެންގަރާ ދިމާލަށް ހިނގާފައި ދިޔައިރު، ގިނަ އަދަދެއްގެ ސަލާމަތީ ބާރުތަކުގެ އޮފިޝަލުން އޭނާގެ ވަށައިގެން ތިއްބެވެ. އޭނާއާއި އޭނާގެ އަނބިކަނބަލުން މިހާރު ވަނޯ ނިއު ޔޯކް ސިޓީގެ ޖަލަކަށް ބަދަލުކޮށްފައެވެ. ހޯމަ ދުވަހު މަދޫރޯ ފުރަތަމަ ފަހަރަށް ކޯޓަށް ހާޒިރުކުރާނެ ކަމަށް ބެލެވެއެވެ.
އޭނާއާއި އޭނާއާ ބައިވެރިވި ކަމަށް ތުހުމަތު ކުރެވޭ މީހުންގެ މައްޗަށް ދައުވާ ކުރަނީ، މަސްތުވާތަކެތީގެ ކޮރަޕްޝަންގެ ތެރެއިން ވެނެޒުއޭލާގެ އޮފިޝަލުންނާއި އެމީހުންގެ އާއިލާތަކަށް މަންފާ ހޯދައިދީ، ހަމަ އެއާއެކު ވެނެޒުއޭލާގެ ފަސްގަނޑުގައި މިނިވަންކަމާއެކު ހަރަކާތްތެރިވާ ނުރައްކާތެރި ނާކޯ-ޓެރަރިސްޓުންނަށް އެހީތެރިވެ، އެމެރިކާއަށް ގިނަ އަދަދެއްގެ ކޮކެއިން ފޮނުވުމަށް މަގުފަހިކޮށްދޭ ރޭވުންތައް ރޭވުމުގެ ކުށުގައެވެ.
މި ހަމަލާއަށްފަހު ޓްރަމްޕް ސާފުކޮށްދެއްވި ގޮތުގައި ”އޮޕަރޭޝަން އެބްސޮލިއުޓް ރިޒޯލްވް“ އަކީ ހަމައެކަނި އެއް ފަހަރު ހިންގި ހަރަކާތެއް ނޫނެވެ. އަދި މިއީ ހަމައެކަނި އެމެރިކާއިން ފިލައިގެން އުޅޭ ކުށްވެރިއެއްގެ ގޮތުގައި ބަލާ މީހަކު ހައްޔަރުކުރުމަށް ކުރި ކަމެއްވެސް ނޫނެވެ. މި އަސްކަރީ ކެމްޕޭނަކީ ރައީސްގެ ބާރުތައް ވަރަށް ބޮޑަށް ފުޅާކޮށް، ”އެމެރިކާ ފަސްޓް“ ޚާރިޖީ ސިޔާސަތުގެ އައު ބަދަލަކާ އެއްގޮތަށް މި ސަރަހައްދު ބައްޓަންކުރުމަށް ޓްރަމްޕް ކުރައްވާ މަސައްކަތެކެވެ. އެމެރިކާގެ ނުފޫޒު ވަކި ދާއިރާއެއްގައި އޮންނާނެކަން ކަށަވަރުކޮށްދިން 19 ވަނަ ގަރުނުގެ ”މޮންރޯ ޑޮކްޓްރިން“ އަށް ގެނައި ބަދަލަކާއެކު، ޓްރަމްޕް ދައްކަވަމުން ގެންދަވަނީ އެމެރިކާގެ މަސްލަހަތުތައް ކުރިއެރުވުމަށާއި ވިޔަފާރިއަށް ފަހި މާހައުލެއް ގާއިމުކުރުމަށްޓަކައި އޭނާ އަސްކަރީ އަދި އިގްތިސާދީ ބާރުގެ ބޭނުންކުރައްވާނެ ކަމެވެ.
ޓްރަމްޕް އެކަމަށް ނަންދެއްވީ ”ދަ ޑޮންރޯ ޑޮކްޓްރިން“ ގެ ނަމުންނެވެ.
އެމެރިކާ އިން ވެނެޒުއޭލާ ދޫކޮށް މާ އަވަހަށް ނުދާނެ ކަމަށް އޭނާ ވިދާޅުވިއެވެ.
”އެކަށީގެންވާ އިންތިގާލީ މަރުހަލާއެއް އަންނަންދެން އެ ގައުމު ހިންގާނީ އަޅުގަނޑުމެން.“ ޓްރަމްޕް ވިދާޅުވިއެވެ.
މަދޫރޯއާ އެކު ކުރެއްވި ނަތީޖާ ނެރުނު ފޯނު ކޯލަށް ރިއާޔަތްކުރައްވަމުން، ޓްރަމްޕް ނޫސްވެރިންގެ ބައްދަލުވުމުގައި ވިދާޅުވީ، އޭނާގެ އަމުރަށް ނުކިޔަމަންތެރިވުމުން މަދޫރޯ ނިންމެވީ ގޯސް ނިންމުމެއް ކަމަށެވެ.
ނޯޓް: މިއީ އެމެރިކާގެ އެންބީސީ ނިއުސް ވެބްސައިޓްގައި ލިޔެފައިވާ ލިޔުމެއްގެ ދިވެހި ތަރުޖަމާއެވެ.
