ދިގު މުއްދަތަށް ވަޒީފާ އަދާ ކުރަން ބޭނުންވާ މީހުންނަށް އެ ފުރުސަތު ދިނުމަށް 75 އަހަރު ވަންދެން ވަޒީފާ އަދާ ކުރެވޭގޮތަށް ރީ އެމްޕްލޯއީމަންޓް ބިލު ރައްޔިތުންގެ މަޖިލީހުން ފާސްކޮށްފި އެވެ.
މި ބިލު މަޖިލީހުން ފާސްކުރީ ގައުމީ ތަރައްގީއާއި ތަރިކައިގެ ކޮމިޓީން ދިރާސާކޮށް ނިންމި ގޮތުގެ ރިޕޯޓް މަޖިލީހުގެ ތަޅުމަށް ހުށަހެޅުއްވުމުންނެވެ. ބިލު މަޖިލީހުން ފާސްކުރީ 46 މެންބަރުންގެ ވޯޓުންނެވެ.
ބިލުގައި ހިމަނާފައިވާ ކަންކަމަށް ބަލާއިރު 65 އަހަރު ވުމުން ވެސް ވަޒީފާގައި ހުރެވޭނީ އަހަރުން އަހަރަށް އާ ކުރާ ވަޒީފާގެ އެއްބަސްވުމެއްގެ ދަށުންނެވެ.
ބިލުގައިވާ ގޮތުން ރީ އެމްޕްލޯއީމަންޓްއަށް ނުވަތަ ވަޒީފާގައި ދެމި ހުރުމަށް އެދި 65 އަހަރާއި 75 އަހަރާއި ދެމެދުގެ މުވައްޒަފުންނަށް ނުވަތަ މީހުންނަށް ހުށަހެޅޭނެ އެވެ. ދައުލަތުގެ ވަޒީފާއެއް އަދާ ކުރަމުންދިޔަ މީހުންގެ ތެރެއިން މި ގާނޫނަށް އަމަލު ކުރަން ފަށާ ތާރީހުގެ 7 އަހަރު ކުރިން ޕެންޝަން ހައްގުވާ އުމުރު ހަމަވުމުގެ ސަބަބުން ވަކިވެފައިވާ މީހުންނަށް ވެސް 75 އަހަރު ފުރެންދެން އަލުން ވަޒީފާގައި ދެމި ހުންނަން އެދި ހުށަހެޅޭނެ އެވެ.
ރީ އެމްޕްލޯއީމަންޓްގެ ދަށުން 65 އަހަރު ފުރޭ ފަހުން ވަޒީފާ އަދާ ކުރާނަމަ ކުރިން ހުރި މަގާމު ނޫން އެހެން މަގާމަކުން ވެސް ވަޒީފާ ހަމަޖައްސައި ދެވިދާނެ ކަަމަށް ބިލުގައި ބަޔާން ކޮށްފައިވެ އެވެ.
އުމުރުން 65 އަހަރުވުމަށްފަހުވެސް ވަޒީފާގައި ދެމިތިބުމަށް ބޭނުންވާ މުވައްޒަފުން 65 އަހަރު ފުރުމުގެ ހަމަ މަސް ދުވަސްކުރިން ރީ-އެމްޕްލޯއިމަންޓަށް އެދި ހުށަހަޅަންޖެހޭނެ ކަމަށް ބިލުގައި ވަނީ ބަޔާންކޮށްފައެވެ. އަދި ކުރިން ވަޒީފާއިން ވަކިވެފައިވާ ފަރާތެއްނަމަ ގާނޫނަށް އަމަލުކުރަންފަާތާ 4 މަސް ދުވަހުގެ ތެރޭގައި ރީ-އެމްޕްލޯއިމަންޓަށް އެދި ހުށަހަޅަންޖެހޭނެ އެވެ.
މި ބިލު ގާނޫނަކަށްވި ނަމަވެސް ސިފައިންނާއި ފުލުހުންނާއި ފަނޑިޔާރުން އަދި ގާނޫނުއަސާސީއާއި ގާނޫނެއްގެ ދަށުން އައްޔަން ކުރެވޭ މަގާމުތަކުގައި ތިއްބަވާ ފަރާތްތަކަށް އެ ގާނޫނެއް ނުހިނގާނެ ކަމަށްވެސް ބިލުގައި ވަނީ ބަޔާންކޮށްފަ އެވެ.
