ވެލާނާ އިންޓަނޭޝަނަލް އެއާޕޯޓު (ވީއައިއޭ)ގެ ޓެކްސީ ކިއު ސަރަހައްދުގައި ޒުވާބުކޮށް، ހަމަނުޖެހުން ހިންގި ކަމަށް ތުހުމަތުވާ ބަޔަކަށް ފުލުހުން ނަސޭހަތްދީފި އެވެ.
ފުލުހުން ބުނީ އެއާޕޯޓައި ހަމަނުޖެހުން ހިންގިކަމުގެ މައުލޫމާތު ރޭ 12:15 ކަންހާއިރު ފުލުހަށް ރިޕޯޓްކޮށްފައިވާ ކަމަށާއި އެ ހަމަނުޖެހުން ހިންގިކަމަށް ތުހުމަތު ކުރެވޭ މީހުން ހާޒިރުކޮށް މައުލޫމާތު ނަގައި ނަސޭހަތްތެރިވެފައިވާ ކަމަށެވެ.
އަދި މިކަމާ ގުޅިގެން އިތުރަށް ބަލަން ޖެހޭ ކަންކަން ބަލަމުން އަންނަ ކަމަށް ވެސް ފުލުހުން ބުންޏެވެ.
ވެލާނާ އިންޓަނޭޝަނަލް އެއާޕޯޓުގެ ޓެކްސީ ކިޔޫ ސަރަހައްދުގައި ދެ ބައެއްގެ މެދުގައި ޒުވާބުކޮށް ހަމަނުޖެހުން ހިންގާ ކަމުގެ މައުލޫމާތު މިމަހު 9 ވަނަ ދުވަހުގެ ރޭ 12؛15 އެހާކަންހާއިރު ފުލުހުންނަށް ރިޕޯޓްކޮށްފައިވޭ. ހަމަނުޖެހުން ހިންގި ކަމަށް ތުހުމަތުކުރެވޭ މީހުން ހާޒިރުކޮށް މައުލޫމާތު ސާފުކޮށް ވަނީ ނަސޭހަތް ދީފައި.“ ފުލުހުން ބުންޏެވެ.
އެއާޕޯޓުގައި މާރާމާރީ ހިންގި މީހުންގެ ގައުމެއް އަދި އެ މީހުންނާ ގުޅޭ އެއްވެސް މައުލޫމާތެއް ފުލުހުން ހާމައެއް ނުކުރެ އެވެ. އާންމުކޮށްފައިވާ ވީޑިއޯ އިން ފެންނަ ގޮތުގައި، އެެއާޕޯޓުގައި ޓެކްސީ ކިއޫ އޮންނަ ސަރަހައްދުގައި ހުރި މީހަކު ފުންމައިގެން ގޮސް އެހެން މީހެއްގެ ގައިގައި ފައިން ވަރަށް ބާރަށް ޖަހަ އެވެ.
