އެމެރިކާއިން އީރާނުގެ އަސްކަރީ ބާރު އަޖުމަބަލަން ބޭނުންވާ ނަމަ، ހަނގުރާމައަކަށް އީރާން ވެސް އޮތީ ފުރިހަމައަށް ތައްޔާރަށް ކަމަށް އެގައުމުގެ ޚާރިޖީ ވަޒީރު އައްބާސް އަރަގްޗީ ވިދާޅުވެއްޖެއެވެ.
އަލްޖަޒީރާއަށް ދެއްވި ބަސްދީގަތުމެއްގައި އަރަގްޗީ ވިދާޅުވީ، މީގެ ކުރިންވެސް އެމެރިކާއިން އަޖުމަ ބަލާފައިވާ އީރާނުގެ އަސްކަރީ ގާބިލްކަން އަލުން ޓެސްޓްކުރަން ބޭނުން ނަމަ، އެކަމަށް އީރާނުން ކުރިމަތިލާނެ ކަމަށެވެ. އަރަގްޗީ މި އިޝާރާތް ކުރައްވާފައި ވަނީ އީރާނުގެ ނިއުކްލިއާ ތިން ސައިޓަކަށް އެމެރިކާ އިން މީގެ ކުރިން ދިން ބޮމުގެ ހަމަލާތަކަށެވެ.
”ވޭތުވެދިޔަ ހަނގުރާމައާ އަޅާބަލާއިރު، މިހާރު އަޅުގަނޑުމެންގެ އަސްކަރީ ތައްޔާރީތަކާއި ގާބިލުކަން މާ ބޮޑަށްވެސް އިތުރުވެފައިވޭ،“ އަރަގްޗީ ވިދާޅުވިއެވެ.
އޭނާ އިތުރަށް ވިދާޅުވީ އީރާން އޮތީ ހުރިހާ ގޮތަކަށް ވެސް ތައްޔާރަށް ކަމަށާއި، އެމެރިކާއިން ބުއްދިވެރި ގޮތެއް އިހްތިޔާރު ކުރާނެ ކަމަށް އުންމީދު ކުރައްވާ ކަމަށެވެ.
މި މައުޟޫއުގައި އީރާނުގެ ޕާލަމެންޓުގެ ރައީސް މުހައްމަދު ބާގިރު ޣާލީބާފް ވެސް ވަނީ އެމެރިކާއަށް ވަރުގަދަ އިންޒާރެއް ދެއްވާފައެވެ. ތެހެރާންގައި ބޭއްވި އެއްވުމެއްގައި ވާހަކަދައްކަވަމުން އޭނާ ވިދާޅުވީ، އެމެރިކާއިން ދޭ ކޮންމެ ހަމަލާއަކަށް ރައްދު ދޭނެ ކަމަށާއި ސަރަހައްދުގައި ހުރި އެމެރިކާގެ ހުރިހާ މަރުކަޒުތަކާއި ފައުޖުތަކަކީ އީރާނުގެ އަމާޒުފަތްގަނޑުތަކަކަށް ވެގެންދާނެ ކަމަށެވެ.
އީރާނުގެ ސަލާމަތީ ކަންކަމާބެހޭ އިސްވެރިޔާ އަލީ ލަރީޖާނީ ވަނީ އެމެރިކާގެ ރައީސް ޑޮނަލްޑް ޓްރަމްޕް ދައްކަވާ ވާހަކަތަކަށް މާބޮޑު ސަމާލުކަމެއް ނުދިނުމަށް ގޮވާލައްވާފައެވެ. އޭނާ ވިދާޅުވީ އީރާނުން އޮތީ އެމެރިކާއާއި އިސްރާއީލާއެކު ”ހިސާބުތައް ނިންމާލަން“ ތައްޔާރަށް ކަމަށެވެ.
އިންޒާރުތަކާއެކު ވެސް، އަރަގްޗީ ވިދާޅުވީ އީރާނުން ހަނގުރާމައަކަށް ބޭނުން ނުވާ ކަމަށާއި، ނަމަވެސް މަޝްވަރާ ކުރަންވާނީ ހަމަހަމަ ހައްގުތަކެއްގެ މައްޗަށް ބިނާވެގެން ކަމަށެވެ. މީގެ އިތުރުން، މަސްރަހު ފިނިކުރުމުގެ ގޮތުން އެމެރިކާގެ މެދުއިރުމަތީގެ މަންދޫބު ސްޓީވް ވިޓްކޮފްއާ، އަރަގްޗީ ގުޅުއްވައި، ކުރިއަށް އޮތް ދުވަސްތަކުގައި ދެ ގައުމުގެ ބައްދަލުވުމެއް ބޭއްވުމުގެ ފުރުސަތާ ބެހޭގޮތުން ވާހަކަދައްކަވާފައިވާ ކަމަށްވެސް ރިޕޯޓްތައް ބުނެއެވެ.
އީރާނުގެ އެތެރޭގެ މަސްރަހަށް ބަލާއިރު، ސަރުކާރާ ދެކޮޅަށް ކުރަމުންދާ މުޒާހަރާތަކުގައި މިހާތަނަށް 2,000 އަށްވުރެ ގިނަ މީހުން މަރުވެފައިވާ ކަމަށް ބައިނަލްއަގުވާމީ މީޑިއާތަކުން ރިޕޯޓްކުރެއެވެ. ނަމަވެސް އީރާނުން ބުނަމުންދަނީ ގައުމުގެ ހާލަތު އޮތީ ފުރިހަމަ ކޮންޓްރޯލްގެ ދަށުގައި ކަމަށެވެ.
