މިދިޔަ މަހުގެ އެއްވަނަ ދުވަހުން ފެށިގެން 31 ގެ ނިޔަލަށް 38 ސައިކަލެއް ވަގަށް ނަގާފައިވާ ކަމުގެ ރިޕޯޓް ފުލުހުންގެ އިދާރާއަށް ހުށަހަޅާފައިވާ ކަމަށް އެ އިދާރާއިން ބުނެފިއެވެ.
މާލޭގެ މަގުތަކަކީ އަމާން ރައްކާތެރި މަގުތަކަކަށް ހެދުމަށާއި ރައްޔިތުންގެ ސަލާމަތާއި ރައްކާތެރިކަމަށް ފާއިތުވި ޑިސެންބަރު މަހު މާލެ ފްރަންޓްލައިން ޕޮލިސިން އިން ކޮށްފައިވާ މަސައްކަތްތަކުގެ ތަފާސްހިސާބު ފުލުހުން އާއްމުކޮށްފައިވާއިރު، މިދިޔަ މަހު ވަގަށް ނެގި 38 ސައިކަލުގެ ޖުމްލަ އަގު 1،840،000 އަށް އަރާނެ ކަމަށް ފުލުހުން ބުންޏެވެ. އަދި މިދިޔަ މަހު 18 ފޯނެއް ގެއްލިފައިވާއިރު މިތަކެތީގެ އަގު 154،228 އަށް އަރާ ކަމަށް ފުލުހުން ބުންޏެވެ.
ފުލުހުން ބުނީ އިލެކްޓްރޯނިކްސްގެ ތެރެއިން ހަތަރު އެއްޗެއް ގެއްލިފައިވާއިރު އެތަކެއްޗަށް 19،730 ރުފިޔާ އަރާ ކަމަށެވެ. އަދި ފައިސާ އަށް ބަލާއިރު ޑޮލަރުގެ މައްސަލައިގެ 40 މައްސަލައެއް ފުލުހުންނަށް ރިޕޯޓްކޮށްފައިވާއިރު މިފައިސާގެ އަދަދު 416،320.80 އަރާ ކަމަށް ފުލުހުން ބުނެފައިވެއެވެ.
އެހެނިހެން ތަކެތީގެ މައްސަލަތަކުގެ ތެރޭގައި 50 މައްސަލައެއް ހިމެނޭއިރު މިތަކެތީގެ އަގުވެސް 243،467.22 އަށް އަރާފައިވާކަމަށް ފުލުހުންގެ ތަފާސްހިސާބުތަކުން ދައްކައެވެ.
މީގެ އިތުރުން ރައްޔިތުންގެ ކަންބޮޑުވުންތައް ހައްލުކުރުމަށް ފުލުހުން ކޮށްފައިވާ މަސައްކަތްތަކަށް ބަލާއިރު ކޮމިއުނިޓީ އިންޓަރެކްޝަންސްގެ 1069 މަސައްކަތެއް ކޮށްފައިވެއެވެ. އަދި ހައްލުކުރުމަށް ކުރުމަށް 172 މަސައްކަތް ކޮށްފައިވެއެވެ.
