އެމެރިކާއިން ހަނގުރާމަކުރަން ބޭނުންވާނަމަ އިރާނުން ތައްޔާރު ކަމަށް އެ ގައުމުގެ ޚާރިޖީ ވަޒީރު އައްބާސް އަރަގްޗީ ވިދާޅުވެއްޖެއެވެ.
އަލްޖަޒީރާ މީޑިއާއަށް ދިން ބަސްދީގަތުމެއްގައި ވާހަކަފުޅުދައްކަވަމުން އައްބާސް ވިދާޅުވި ގޮތުގައި އެމެރިކާއާއެކީ ސުލްހަވެރިކަމާއެކު ކަންކަން ހައްލުކުރަން އެއްބަސް ކަމަށެވެ. ނަމަވެސް އެމެރިކާއިން އެދެނީ ހަނގުރާމަކުރަން ކަމުގައިވާނަމަ އެކަން ކުރަން އިރާނުން އޮތީ ތައްޔާރަށް ކަމަށް އޭނާ ވަނީ ވިދާޅުވެފައެވެ.
”އެމެރިކާއިން ބޭނުންވަނީ މީގެ ކުރިން ކަން ކުރި ފަދައިން އަސްކަރީ ބާރުގެ ބޭނުން ކުރަން ކަމުގައިވާނަނަ އަހަރެމެން މި ތިބީ އެކަމަށް ތައްޔާރަށް. އެމެރިކާ އިހްތިޔާރުކުރާނީ އެންމެ ބުއްދިވެރި ގޮތް ކަމުގައި އުއްމީދުކުރަން.“ އެމެރިކާއަށް ދޫނުކުރާނަން ކަން ޔަގީން ކޮށްދެއްވަމުން އައްބާސް ވިދާޅުވިއެވެ.
އައްބާސް މިހެން ވިދާޅުވެފައިވާއިރު އެތައް މީޑިއާއަކުން ރިޕޯޓުކުރަމުން އަންނަަ ގޮތުގައި އެމެރިކާއިން އަންނަނީ އިރާނަށް ހަމަލާ ދިނުމަށް ތައްޔާރުވަމުންނެވެ. އެ ގޮތުން އިރާނަށް ހަމަލާ ދެވޭނެ ގޮތްތަކާ ބެހޭ ގޮތުން އެމެރިކާގެ އިސް އޮފިޝަލުން މިހާރު ވެސް މަޝްވަރާ ކުރަމުން އަންނަ ކަމަށް މީޑިއާތަކުން ރިޕޯޓު ކުރެއެވެ.
