ލޯކަލް ކައުންސިލް އިންތިހާބުގައި ޕީޕަލްސް ނެޝަނަލް ކޮންގްރެސް (ޕީއެންސީ) އިން މާލޭގެ މޭޔަރުކަމަށް ނިކުންނަ ނިޝާން އަސްކަރިޔާގެ ވެރިކަމުގެ އިއްޒަތް އަރުވާފައިވާ ކުރީގެ ޑިފެންސް މިނިސްޓަރު މޭޖާ ޖެނެރަލް (ރިޓަޔާޑް) މޫސާ އަލީ ޖަލީލުގެ ކެމްޕެއިން އޮފީސް މިރޭ ހުޅުވައިފިއެވެ.
ޖަލީލްގެ ކެމްޕެއިން އޮފީސް ގާއިމްކޮށްފައިވަނީ ދޮންމަނިކު ސްކައިވިއު ރެސްޓޯރަންޓުގެ ތިރީގައެވެ. މިކަމަށްޓަކައި މިރޭ ވަނީ ހާއްސަ ޖަލްސާއެއް ބާއްވާފައެވެ.
ޕީއެންސީގެ ފަރާތުން މާލޭގެ މޭޔަރުކަމަށް ނިކުންނާނީ ޖަލީލްކަން ޕީއެންސީން އިއުލާނުކުރީ މިދިޔަ މަހުގެ 17 ވަނަ ދުވަހު އެ ޕާޓީން ބޭއްވި ނޫސްވެރިންގެ ބައްދަލުވުމެއްގައެވެ. އެ ބައްދަލުވުމެއްގައި ޕީއެންސީން ބުނީ މާލެ ސިޓީގެ މޭޔަރުގެ މަގާމަށް ކުރިމަތިލުމަށް ފުރުސަތު ހުޅުވައިލުމުން، އެކަމަށް ކުރިމަތިލީ ޖަލީލު އެކަނި ކަމަށެވެ.
މޫސާ އަލީ ޖަލީލަކީ ރާއްޖޭގެ ދިފާއީ ބާރުގައި ގިނަ ދުވަހު ހިދުމަތް ކުރައްވާފައިވާ ބޭފުޅެކެވެ. އޭނާ ވަނީ ބައްތިރީސް އަހަރު ސިފައިންގެ ހިދުމަތުގައި ހޭދަކުރައްވައި ޝަރަފުވެރިކަމާ އެކު ރިޓަޔާ ކުރައްވާފައެވެ.
