ރާއްޖޭގެ އުތުރާއި މާލެ ހިމެނޭ މެދު ރާއްޖެތެރޭގެ ސަރަހައްދުގެ ރަށްތަކުގެ ވައި ނުރައްކާތެރި މިންވަރަކަށް ނުސާފުވެ، ކުރިއަށް އޮތް ފަސް ދުވަހުވެސް މި ހާލަތު ދެމިއޮންނާނެ ކަމަށް މޫސުމާއި ބެހޭ ޤައުމީ އިދާރާ (މެޓް އޮފީސް) އިން ލަފާކޮށްފިއެވެ.
މެޓް އޮފީހުން ވިދާޅުވީ، ރާއްޖޭގެ އެކި ހިސާބުތަކަށް މި ދުވަސްވަރު ދުންފުނީގެ އަސަރު ކުރާނެ ކަމަށާއި، ޚާއްޞަކޮށް އުތުރާއި މާލެ އަތޮޅުގެ ރަށްތަކަށް މި އަސަރު ވަރަށް ބޮޑަށް ކުރާނެ ކަމަށެވެ.
ވައިގެ ފެންވަރު ބަލާ ބައިނަލްއަޤުވާމީ މިންގަނޑު ކަމަށްވާ ’އައިކިއުއެއާ‘ އިން ދައްކާ ގޮތުގައި، މިއަދު މާލޭގެ ވައިގެ ކޮލިޓީ ހުރީ 111 ގައެވެ. މާލޭގެ ވައިގައި ހިރަފުހާއި ދުމާއި ކުނޑި ހުރި މިންވަރު ކޮންމެ ކިއުބިކް މީޓަރަކަށް 39.8 މައިކްރޯގްރާމުގައި ހުރިއިރު، މިއީ ދުނިޔޭގެ ސިއްހަތާ ބެހޭ ޖަމިއްޔާ (ޑަބްލިއު.އެޗް.އޯ) އިން ކަނޑައަޅާފައިވާ މިންގަނޑަށް ވުރެ އަށް ގުނަ އިތުރު އަދަދެކެވެ.
މެޓް އޮފީހުން އިތުރަށް ހާމަކުރެއްވި ގޮތުގައި، ވައި ނުސާފުވުމުގެ ސަބަބުން މާލެ ސަރަހައްދުން ދުރު ފެންނަ މިންވަރު ވަނީ ތިން ކިލޯމީޓަރަށް ދަށްވެފައެވެ. އަދި މި ދުވަސްވަރު މާލޭގެ ވައި ނުސާފުވުން އެއް މިންގަނޑެއްގައި ހިފަހައްޓާނެ ކަމަށްވެސް އެ އިދާރާއިން ލަފާކުރެއެވެ. ދެކުނުގެ އަތޮޅުތަކުގައިވެސް ވައި ނުސާފުވުމުގެ އަސަރު ކޮންމެވެސް ވަރަކަށް ކުރާނެ ކަމަށް މައުލޫމާތު ދީފައިވެއެވެ.
ވައިގެ ކޮލިޓީ 101 އާއި 150 އާ ދެމެދު ހުންނަނަމަ، ނާޒުކު ހާލަތްތަކުގައި ތިބޭ މީހުންނަށާއި އެހެން މީހުންނަށްވެސް ނޭވާލާ ނިޒާމުގެ މައްސަލަތައް ކުރިމަތިވުމުގެ ފުރުސަތު ބޮޑުވާނެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ ބުނެފައެވެ. މިހާރު ވައި ނުސާފުވެފައިވާ މިންވަރަކީ ސިއްހަތަށް ނުރައްކާވާ ފަދަ މިންވަރެއްގެ ގޮތުގައި ވަނީ ފާހަގަކުރެވިފައެވެ.
ޚާއްޞަކޮށް ނޭވާލާ ނިޒާމާއި ފުއްޕާމޭގެ ބަލިތައް ހުންނަ މީހުންނާއި، ކުޑަކުދިންނާއި، އުމުރުން ދުވަސްވީ މީހުންގެ އިތުރުން މާބަނޑު މީހުންނަށް މިކަމުގެ ނުރައްކާ ބޮޑެވެ. އެހެންކަމުން، ”ކޮންމެހެން ބޭރަށް ނިކުންނަން ޖެހިއްޖެ ހާލަތެއްގައި މެނުވީ ބޭރަށް ނުނިކުތުމަށާއި، ބޭރަށް ނިކުންނަ ނަމަ އެން.95 މާސްކް ބޭނުންކުރުމަށް“ އެޗްޕީއޭއިން ވަނީ އިލްތިމާސްކޮށްފައެވެ.
