އެމެރިކާގެ ރައީސް ޑޮނަލްޑް ޓްރަމްޕް ދެއްވަމުންދާ އިންޒާރުތަކާއި ދައްކަވަމުންދާ ވާހަކަފުޅުތަކަށް އީރާނުގެ އިސްލާމީ ޖުމްހޫރިއްޔާ އިން ހަނގުރާމައިގެ މައިދާނުގައި ވަރުގަދަ ރައްދެއް ދޭނެކަމުގެ ޔަގީންކަން އީރާނުގެ އަސްކަރިއްޔާގެ އިސް ކޮމާންޑަރަކު ދެއްވައިފި އެވެ.
އީރާނުގެ އިސްލާމިކް ރިވޮލިއުޝަނަރީ ގާޑުންގެ (އައި.އާރް.ޖީ.ސީ) އެއަރޯސްޕޭސް ޑިވިޜަންގެ ކޮމާންޑަރު ބްރިގޭޑިއާ ޖެނެރަލް ސައްޔިދު މަޖީދު މޫސާވީ މިހެން ވިދާޅުވީ، ހުކުރު ދުވަހު ފާހަގަކުރި ނޭޝަނަލް ގާޑްސް ޑޭގެ މުނާސަބަތުގައި ބޭއްވި އަސްކަރިއްޔާގެ އިސް ބޭފުޅުންގެ ބައްދަލުވުމެއްގެ ހަވާސާގަ އެވެ.
”ޓްރަމްޕް ވަރަށް ގިނަ ވާހަކަތައް އެބަ ދައްކަވާ، އެހެންނަމަވެސް، އޭނާ އަށް އެ ވާހަކަތަކުގެ ރައްދު ހަނގުރާމައިގެ މައިދާނުން ލިބޭނެކަމުގެ ޔަގީންކަން އޭނާ އަށް އޮންނަންވާނެ،“ މޫސާވީ ވިދާޅުވި އެވެ.
މި ވާހަކަތައް އައިސްފައިވަނީ، 2017 ވަނަ އަހަރުގެ ޑިސެމްބަރު މަހުގެ ފަހުކޮޅު އީރާނުގައި ފެށުނު އިގްތިސާދީ މުޒާހަރާތަކާ ގުޅިގެން، އީރާނާ ދެކޮޅަށް އަސްކަރީ ހަމަލާއެއް ދީފާނެކަމަށް ބުނެ ޓްރަމްޕް ދެއްވި އިންޒާރުތަކާ ގުޅިގެންނެވެ. އެ މުޒާހަރާތައް ފެށުނުތާ މާގިނަ ދުވަހެއް ނުވަނީސް، ހަމަނުޖެހުން އުފެއްދުމަށް މަސައްކަތްކުރާ ބަޔަކު ވަނީ މުޒާހަރާތަކުގެ ތެރެއަށް ވަދެގަނެ، އޭގެ މަގްސަދު އޮޅުވާލަން މަސައްކަތް ކޮށްފަ އެވެ.
އީރާނުގެ އިންޓެލިޖެންސުން ކަށަވަރުކޮށްދީފައިވާ ގޮތުގައި، މި ހަމަނުޖެހުންތަކުގެ ފަހަތުގައި ތިބި ފަރާތްތަކަށް އެމެރިކާ އާއި އިޒްރޭލުގެ ޖާސޫސީ އިދާރާތަކުންނާއި، ހަތިޔާރާއި ލޮޖިސްޓިކްސްގެ އެހީތެރިކަން ލިބެމުންދިޔަ އެވެ. މީގެ ނަތީޖާއެއްގެ ގޮތުން، އީރާނުގެ ސަލާމަތީ ބާރުތަކުން ވަނީ މިކަމުގައި އިސްކޮށް އުޅުނު ފަރާތްތައް ހައްޔަރުކޮށް، ވެރިރަށް ތެހެރާނަށް އެތެރެކުރަން އުޅުނު ގިނަ އަދަދެއްގެ ހަތިޔާރު އަތުލައިގެންފަ އެވެ.
އީރާނުގެ އިސް މަސްއޫލުވެރިން ވަނީ ގައުމުގެ އިގްތިސާދީ މައްސަލަތަކަށް ހައްލު ހޯއްދަވައިދެއްވާނެ ކަމަށް ވައުދުވެވަޑައިގެންފަ އެވެ. ނަމަވެސް، ހަމަ އެއާއެކު، މުޒާހަރާތަކުގެ ނާޖާއިޒު ފައިދާ ނަގައި ގައުމުގައި ހަމަނުޖެހުން އުފައްދަން ކުރާ އެއްވެސް މަސައްކަތަކަށް ފުރުސަތު ނުދެއްވާނެ ކަމަށާއި، އެފަދަ ކަންކަމާ ސާބިތުކަމާއެކު ކުރިމަތިލައްވާނެ ކަމަށްވެސް ވަނީ ވިދާޅުވެފަ އެވެ.
މޫސާވީގެ މި ވާހަކަތަކަކީ އީރާނުގެ އެހެން އަސްކަރީ ވެރިންނާއި މަސްއޫލުވެރިން ވެސް ދެއްވަމުންދާ އިންޒާރުތަކާ އެއްގޮތް ވާހަކަތަކެކެވެ. މީގެ ދެ ހަފްތާއެއްހާ ދުވަސް ކުރިން ވެސް އޭނާ ވަނީ، އީރާނުގެ އެއަރޯސްޕޭސް ޑިވިޜަން އޮތީ ދިފާއީ ގޮތުން އެންމެ މަތީ ދަރަޖައިގެ ތައްޔާރީ ހާލަތެއްގައި ކަމަށާއި، ގައުމަށް ދޭ ކޮންމެ ހަމަލާއެއް ފުނޑުފުނޑުކޮށްލަން ތައްޔާރަށް ތިބި ކަމަށް ވިދާޅުވެފަ އެވެ.
އެ ދުވަސްވަރު ވާހަކަ ދައްކަވަމުން ކޮމާންޑަރު ފާހަގަކުރެއްވި ގޮތުގައި، މިދިޔަ ޖޫން މަހު ގައުމުގެ މައްޗަށް މަޖުބޫރު ކުރެވުނު 12 ދުވަހުގެ ހަނގުރާމަ އަށް ފަހު، އެކި ދާއިރާތަކުން އެއަރޯސްޕޭސް އާލާތްތައް އުފެއްދުން ވަނީ ވަރަށް ބޮޑަށް އިތުރުކޮށްފަ އެވެ. އަދި އެ ހަނގުރާމައިގައި ފާހަގަވި ބަލިފައިތައް ދެނެގަނެ، އެކަންކަން މިހާރު މުޅިން ހައްލުކޮށްފައިވާ ކަމަށް ވިދާޅުވި އެވެ. ”އައި.އާރް.ޖީ.ސީ އެއަރޯސްޕޭސް ޑިވިޜަން މިހާރު އޮތީ ތައްޔާރީ ހާލަތުގެ އެންމެ ކުރީ ސަފުގައި،“ އޭނާ ނިންމާލަމުން ވިދާޅުވި އެވެ.
