އެމެރިކާގެ އަސްކަރީ މަނަވަރުތަކެއް އިރާނުގެ ސަރަހައްދަށް ކައިރިވަމުންދާ ދަނޑިވަޅެއްގައި، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ޕާޝިއަން ގަލްފާއި ގަލްފް އޮފް އޮމާން ހިމެނޭހެން ގިނަ އަދަދެއްގެ ހަނގުރާމަ މަނަވަރުތައް ޖަމާކޮށް، އެގައުމުގެ ދިފާއީ ވަރުގަދަކަން ދައްކާލައިފިއެވެ.
އީރާނުގެ ކަނޑުގެ ސަރަހައްދުތަކާއި، ޔޫއޭއީގެ ކަނޑުގެ ސަރަހައްދުގެ ބައެއްގެ އިތުރުން މުޅި ގަލްފް އޮފް އޮމާންގައި އީރާނުގެ ދިދަ ޖަހާފައިވާ ގިނަ އަދަދެއްގެ އަސްކަރީ އުޅަނދުތައް މިހާރު ވަނީ އަތުރާލާފައެވެ. މިއީ އެ ސަރަހައްދުގެ ރައްކާތެރިކަން ކަށަވަރުކުރުމަށާއި ބޭރުގެ ނުފޫޒުތަކަށް ފުރުސަތު ނުދިނުމަށް އީރާނުން އެޅި ހަރުދަނާ ފިޔަވަޅެކެވެ.
މި ”ޝޯ އޮފް ފޯސް“ ނުވަތަ ބާރު ދައްކާލުމުގެ ހަރަކާތްތައް ކުރިއަށް މިގެންދަނީ އައިއާރުޖީސީން ދާދިފަހުން ބެލިސްޓިކް އަދި ކްރޫޒް މިސައިލް ބޭނުންކޮށްގެން ކާމިޔާބު ތަމްރީނުތަކެއް ހިންގާފައިވާ ދަނޑިވަޅެއްގައެވެ. އީރާނުގެ އަސްކަރިއްޔާއިން ވަނީ ބޭރުގެ ބާރުތަކުން ނުރައްކާތެރި ”ގޯސް ހިސާބުތަކެއް“ ޖަހައި އީރާނުގެ ސިޔާދަތަށް އަރައިގަންނަން މަސައްކަތް ކޮށްފިނަމަ، އޭގެ ރައްދު ވަރަށް ހަރުކަށިވާނެ ކަމުގެ އިންޒާރު ދީފައެވެ.
އީރާނުގެ އަސްކަރީ ކޮމާންޑަރުން ވިދާޅުވި ގޮތުގައި، އެމެރިކާގެ އަސްކަރީ ވަސީލަތްތައް ސަރަހައްދަށް ކައިރވަމުންދާއިރު، އީރާނުގެ ބާރުތައް އޮތީ ”ކުރިއަށްވުރެ ބޮޑަށް ތައްޔާރީ ހާލަތެއްގައެވެ.“ އަދި ކޮންމެ ވަގުތަކުވެސް ހަމަލާ ދިނުމަށް ”ޓްރިގަރުގައި އިނގިލި ޖައްސައިގެން“ ތިބި ކަމަށް އެ ކޮމާންޑަރުން ވަނީ ވިދާޅުވެފައެވެ.
އީރާނުން ބުނާ ގޮތުގައި މި ފިޔަވަޅުތަކަކީ އެ ގައުމުގެ ކަނޑުގެ ސަރަހައްދުގެ މިނިވަންކަމާއި ރައްކާތެރިކަން ދިފާއުކުރުމަށް އަޅާފައިވާ ފިޔަވަޅުތަކެކެވެ. އެމެރިކާގެ އަސްކަރީ ހަރަކާތްތަކާ ގުޅިގެން ސަރަހައްދީ މަސްލަހަތު ގޯސްވަމުންދާއިރު، އީރާނުގެ މި ވަރުގަދަ ތައްޔާރުވުންތަކަކީ ދުޝްމަނުންނަށް ދެވޭ ވަރުގަދަ މެސެޖެއް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.
މި ހަރަކާތްތަކުގެ ސަބަބުން ޕާޝިއަން ގަލްފާއި ގަލްފް އޮފް އޮމާންގެ ސަރަހައްދުގައި އީރާނުގެ އަސްކަރީ ބާރުވެރިކަން މިހާރު ވަނީ ވަރަށް ބޮޑަށް ފާހަގަވެފައެވެ.
