ފަތިސް ނަމާދުން ދުވަސް ފަށަށް ރައީސް ޑރ. މުހައްމަދު މުއިއްޒު އިލްތިމާސް ކުރައްވައިފިއެވެ.
އެމަނިކުފާނު މިގޮތަށް އިލްތިމާސްކުރެއްވީ ހުޅުމާލޭގެ ފޭސް ދޭއްގައި އަލަށް އިމާރާތް ކުރި ޝަހީދު އަލީ ސްކޫލް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ހުޅުމާލޭ ފޭސް ދޭއްގައި މީހުން އާބާދުވެފައިވާ ސަރަހައްދުގައި އަލަށް ހުޅުވި ޝަހީދު އަލީ ސްކޫލް ހުޅުވުމަށް މިއަދު ވަނީ ހާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި ރައީސް ޑރ. މުއިއްޒުގެ އިތުރުން އެޑިއުކޭޝަން މިނިސްޓަރު ޑރ. އިސްމާއީލް ޝަފީއުވެސް ބައިވެރިވެޑައިގެންނެވިއެވެ.
ޝަހީދު އަލީ ސްކޫލް ރަސްމީކޮށް ހުޅުވާދެއްވުމަށްފަހު ރައީސް މުއިއްޒު ދެއްކެވި ވާހަކަފުޅުގައި އެމަނިކުފާނު ވަނީ ފަތިސް ނަމާދުން ދުވަސް ފެށުމަށްޓަކައި ދަރިވަރުން ބައްޓަން ކުރެއްވުމަށް ބެލެނިވެރިންގެ ކިބައިން އެދިވަޑައިގެންފައެވެ.
ގްރޭޑް 1-10 ކިޔަވައިދޭ ޝަހީދު އަލީ ސްކޫލުގައި 32 ކުދިންގެ ޖާގައިގެ 54 ކްލާސްރޫމު ހިމެނެއެވެ. މި ހުރިހާ ކްލާސް ރޫމެއްވެސް ވަނީ އޭސީ ކޮށްފައެވެ .މީގެއިތުރުން 400 ކުދިންގެ އޮޑިޓޯރިއަމަކާއި ލައިބްރެރީއަކާއި ކޮމްޕިއުޓަރު ލެބަކާއި 3 ސައިންސް ލެބް ހިމެނެއެވެ. އަދި މަލްޓިޕާޕަސް ހޯލަކާއި، ޓާފް ދަނޑަކާއި އިންޑޯ ކުޅިވަރުތައް ކުޅޭވޭނެ އިންތިޒާމްތައްވެސް މި ސްކޫލުގައި ވަނީ ހަމަޖައްސާފައެވެ.
