އީރާނުގެ ޚާރިޖީ ވަޒީރު އައްބާސް އަރަގްޗީ، އެމެރިކާގެ ޚާއްޞަ މަންދޫބު ސްޓީވް ވިޓްކޮފްއާ ފާއިތުވި ދުވަސްތަކުގައި އެއްވެސް މުއާމަލާތެއް ކުރައްވާފައި ނުވާ ކަމަށާއި، މަޝްވަރާއަކަށް އެދިވަޑައިގެންފައި ނުވާނެ ކަމަށް ބުދަ ދުވަހު އެގައުމުގެ ދައުލަތުގެ މީޑިއާ އިން ރިޕޯޓުކޮށްފި އެވެ.
އެމެރިކާގެ ރައީސް ޑޮނަލްޑް ޓްރަމްޕް އަންގާރަ ދުވަހު ވިދާޅުވީ، އަސްކަރީ މަނަވަރުތަކުގެ އިތުރު ފައުޖެއް އީރާނާ ދިމާލަށް ދަތުރުކުރަމުންދާ ކަމަށާއި، އީރާނުން އެމެރިކާ އާ އެކު އެއްބަސްވުމަކަށް އަންނާނެ ކަމަށް އުންމީދު ކުރައްވާ ކަމަށެވެ.
1979 ގެ އިސްލާމީ އިންގިލާބަށްފަހު އީރާނުގައި ހިނގި އެންމެ ލޭއޮހޮރުވުން ބޮޑު ކުރިމަތިލުންތަކަށް މަގުފަހިވި މުޒާހަރާތަކާ ގުޅިގެން، އެމެރިކާ އިން ވަނީ ގަލްފް ސަރަހައްދުގައި އެގައުމުގެ އަސްކަރީ ބާރުތައް ވަރުގަދަކޮށްފަ އެވެ.
”ފާއިތުވި ދުވަސްތަކުގައި އަޅުގަނޑާއި ވިޓްކޮފްއާ ދެމެދު އެއްވެސް މުއާމަލާތެއް ހިނގާފައެއް ނުވޭ. އަދި މަޝްވަރާއަކަށް އެދި އަޅުގަނޑުމެން ހުށަހަޅާފަ އެއް ވެސް ނޯންނާނެ،“ އަރަގްޗީ ވިދާޅުވި އެވެ. ނަމަވެސް، އެކި މެދުވެރިން މެދުވެރިކޮށް މަޝްވަރާތަކެއް ކުރިއަށްދާ ކަމަށާއި، އެ ފަރާތްތަކުން ތެހެރާނާ ގުޅުން ބާއްވަމުންދާ ކަމަށް އޭނާ ފާހަގަކުރެއްވި އެވެ.
އޭނާ އިތުރަށް ވިދާޅުވީ، އީރާނުގެ ސިޔާސަތަކީ ސާފު ސިޔާސަތެއް ކަމަށާއި، ބިރުދެއްކުންތަކާއި މަޝްވަރާއަކީ އެކުގައި ކުރެވޭނެ ކަންކަމެއް ނޫން ކަމަށެވެ. އަދި ވާހަކަ ދެއްކޭނީ ބިރުދެއްކުމާއި ނުޙައްގު ޑިމާންޑްތައް ކުރިމަތިކުރުން ހުއްޓާލުމުން ކަމަށް ވެސް އޭނާ ވިދާޅުވި އެވެ.
މީގެ އިތުރުން، އީރާނުގެ ރައީސް މަސްއޫދު ޕެޒެޝްކިއަން، ސައުދީ އަރަބިއްޔާގެ ވަލީއަހުދު މުޙައްމަދު ބިން ސަލްމާން އާ އަންގާރަ ދުވަހު ފޯނުން ދެއްކެވި ވާހަކަފުޅު ގައި ވިދާޅުވީ، ބައިނަލްއަގުވާމީ ގާނޫނުތަކުގެ އިމުގެ ތެރެއިން ހަނގުރާމަ ހުއްޓުވުމަށް ކުރެވޭ ކޮންމެ މަސައްކަތަކަށް ތެހެރާނުން މަރުހަބާ ކިޔާނެ ކަމަށެވެ.
