ޕެންޝަން އޮފީހުގެ ޗެއާޕާސަން ޑރ. އަހުމަދު އިނާޒް އެ މަގާމުން މިއަދު އިސްތިއުފާ ދެއްވައިފި އެވެ.
އިނާޒް މަގާމުން އިސްތިއުފާ ދެއްވީ ރައްޔިތުންގެ ރިޓަޔަމަންޓަށް ފައިސާ ސަރުކާރުން ނަގަން މަސައްކަތް ކުރާ 2.4 ބިލިއަން ރުފިޔާގެ ބޮންޑުގެ މައްސަލައިގަ އެވެ.
އޭނަ މިއަދު ސޯޝަލް މީޑިއާ ޕޯސްޓްތަކެއްގައި ވިދާޅުވީ މޯލްޑިވްސް މަނިޓަރީ އޮތޯރިޓީ އެމްއެމްއޭ) މެދުވެރިކޮށް މުއާމަލާތަށް ފައިސާ ހޯދުމަކީ އިގްތިސާދަށް މި ހާލަތުގައި ގެއްލުން ބޮޑު ނިންމުމެއް ކަމަށް ޓެކްނިކަލީ ގަބޫލު ކުރެވޭތީ މަގާމުން އިސްތިއުފާ ދެއްވީ ކަމަށެވެ.
”އަޅުގަނޑުގެ ދުއާއަކީ ދައުލަތުގެ މާލީކަންކަން މިއަދަށްވުރެ ހަރުދަނާވެ ދުރު ވިސްނުމުގެ ސިޔާސަތުތަކަކުން އިސްލާހުވެގެން ދިއުން. ދަރަނީގެ އަނދަވަޅުން ދިވެހިރާއްޖޭގެ އިގްތިސާދު އަރައިގަނެ، ރާއްޖެ ދެމެހެއްޓެނިވި އުފެއްދުންތެރި ތަރައްގީގެ މަގަކަށް ރުޖޫއަވުން.“ އިނާޒް ވިދާޅުވި އެވެ.
ކުރިން ފިނޭންސް މިނިސްޓަރުކަން ވެސް ކުރެއްވި އިނާޒް ޕެންޝަން އޮފީހުގެ ޗެއާޕާސަންގެ މަގާމަށް އިނާޒް އެންމެ ފަހުން އައްޔަންކުރީ މިދިޔަ އަހަރުގެ ޖޫން 29 ގަ އެވެ. އޭނަ އެ މަގާމަށް އެންމެ ފުރަތަމަ އައްޔަންކުރީ ޖޫން 20، 2022 ގަ އެވެ.
ޕެންޝަން އޮފީހުގެ ޗެއާޕާސަން މިއަދު މަގާމުން އިސްތިއުފާ ދެއްވި އިރު، ބޮންޑްގެ މައްސަލައިގައި އެ އޮފީހުގެ ބޯޑުގައި އަމިއްލަ ވިޔަފާރިތައް ތަމުސީލުކުރާ މެންބަރެއްގެ ގޮތުގައި ހުންނެވި ސަރުވަޝް އާދަމް ވެސް ވަނީ މިދިޔަ އަހަރުގެ އޮކްޓޯބަރު 22 ގައި އިސްތިއުފާ ދެއްވައިފަ އެވެ.
އަދި މިދިޔަ ނޮވެންބަރު މަހުގެ 9 ގައި، ވަކި ސަބަބެއް ހާމަ ނުކުރައްވައި، ޕެންޝަން އޮފީހުގެ ޗީފް ފައިނޭންޝަލް އޮފިސަރު (ސީއެފްއޯ) ގެ މަގާމުގައި ހުންނެވި ހައްވާ ފަޖުވާ ވެސް އިސްތިއުފާ ދެއްވާފައިވެ އެވެ.
