އިނގިރޭސިވިލާތުގެ މަޖިލީސް މެމްބަރު އަދި އެގައުމުުގެ ސިޔާސީ ޕާޓީއެއް ކަމަށްވާ ރިފޯމް ޔޫކޭގެ ލީޑަރު ނައިޖަލް ފަރާޖް ޗާގޯސްއަށް ކުރަން އުޅުނު ދަތުރު، އިނގިރޭސިވިލާތުން ރާއްޖެ މެދުވެރިކޮށް ހުއްޓުވައިފިއެވެ.
ފަރާޖް ޗާގޯސްއަށް ކުރަން އުޅުނު ދަތުރަކީ އެ ރަށްތަކުގެ ރަށްވެހިންނަށް އެހީތެރިކަން ފޯރުކޮށްދިނުމަށް ކުރަން އުޅުނު އިންސާނީ އެހީގެ ދަތުރެކެވެ.
ޗާގޯސްގެ ފަޅު ރަށެއް ކަމަށްވާ އީލް ޑު ކޮއިންގައި ދާއިމީކޮށް ވަޒަންވެރިވުމަށް މަސައްކަތް ކުރަމުންދާ ޗާގޯސްގެ ހަތަރު މީހަކަށް ބޭނުންވާ ކާބޯތަކެއްޗާއި ބޭސް ފަދަ ޒަރޫރީ ސާމާނު ފޯރުކޮށްދިނުމަށް ދަތުރު ފެށުމަށް ފަރާޖް ރާއްޖެއަށް އައީ މިދިޔަ ހަފްތާގެ ތެރޭގައެވެ.
އެ ތަކެތި ހިފައިގެން ދަތުރުކުރާ ބޯޓު ރާއްޖޭގެ ދެކުނުން ގާތްގަނޑަކަށް 300 މޭލު ބޭރުގައި އޮންނަ އެ ރަށަށް ފުރުމަށް އޮތީ ހަމަޖެހިފައެވެ. ނަމަވެސް މިހާރު އެ ދަތުރުގައި ބައިވެރިނުވުމަށް ފަރާޖް ވަނީ ނިންމާފައެވެ.
ދަ ޓެލެގްރާފް ނޫހަށް ދިން އިންޓަވިއުއެއްގައި އޭނާ ވިދާޅުވީ ޗާގޯސްއަށް ވަޑައިގަތުން ކުރިން ހަމަޖެހިފައިވީ ނަމަވެސް މިހާރު ކެންސަލްކޮށްފައިވާ ކަމަށެވެ. އެއީ އިނގެރޭސިވިލާތުން ރާއްޖެ މެދުވެރިކޮށް އޭނާ ޗާގޯސްއަށް ދިއުން ހުއްޓުވާފައިވާތީ ކަމަށް އޭނާ ވިދާޅުވިއެވެ.
އެކަމަށް އިނގިރޭސި ސަރުކާރުން އެދުނުކަން ރާއްޖޭގެ ސަރުކާރުގެ އިސް މަސްދަރަކުން އަންގާފައިވާ ކަމަށް ވެސް ފަރާޖް ވަނީ ވިދާޅުވެފައެވެ.
ފަރާޖް ވިދާޅުވެފައިވަނީ އިނގިރޭސި ރައްޔިތަކު އިނގިރޭސި ސަރަހައްދަކަށް ދިޔަ ނުދިނުމަށް އެފަދަ މަސައްކަތެއް އެ ގައުމުގެ ސަރުކާރުން ކޮށްފާނެ ކަމަށް ގަބޫލްކުރަން ދަތިކަމަށެވެ. އަދި އޭނާ ކުރަން އުޅުނީ އިންސާނީ އެހީގެ ދަތުރެއްކަމަށާއި އެހެންކަމުން އޭނާގެ ސަބަބުން މި ދަތުރަށް ބުރޫއަރަން ބޭނުން ނުވާތީ ބައިވެރިނުވުމަށް ނިންމާފައިވާ ކަމަށް ފަރާޖް ވިދާޅުވެފައިވެއެވެ.
