ބަންޑާރ މިސްކިތް ތަޅާލަން ނިންމުމުން އެކަމާއި ދެކޮޅު އަޑުތައް ގަދަވާން ފެށުމުން އެކަމަށް ރައްދުތައް ދިނުމަށްފަހު މަޝްވަރާއަށް ދާން ބޭނުންވާކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ބިނާ ކުރިތާ އަންނަ އަހަރު ސަތޭކަ އަހަރު ފުރޭ ބަންޑާރަ މިސްކިތް ތަޅާލާ އެތަނުގައި ޒަމާނީ ފެންވަރުގެ އާ މިސްކިތެއް ހަދަން ނިންމި ކަން މިނިސްޓަރު ޝަހީމް އިއުލާން ކުރީ އިއްޔެއެވެ. އެއާއި އެކު އާސާރީ ދުވަސްވީ ތަނެއް ތަޅާލާތީ އެކަމުގެ ކަންބޮޑުވުންތައް މީހުން ފާޅުކުރަން ފެށިއެވެ.
އެގޮތުން ހެރިޓޭޖް މިނިސްޓްރީގެ ރިސާޗް އެނަލިސްޓެއްގެ ގޮތުގައި ކުރިން މަސައްކަތް ކުރެއްވި މުހައްމަދު ނާޖިހު ދީދީ އެކަމަށް ފާޑުވިދާޅުމުން ޝަހީމް ވަނީ އޭނާގެ މިސްކިތް ތަޅާލުން ދިފާއުކޮށް ސޯޝަލް މީޑިއާގައިި ނާޖިހު ދީދީއާ ޒުވާބުކުރައްވާފައެވެ.
ނާޖިހް ވިދާޅުވީ ބަންޑާރަ މިސްކިތް ފަދަ ތަނެއް ނައްތާލުމަކީ، ތާރީހަށް ދެވޭނެ އިއާދަނުކުރެވޭނެ ފަދަ ބޮޑު ގެއްލުމެއް ކަމަށާއި އެއީ ރާއްޖޭގެ ސަގާފީ ތަރިކަ ރައްކާތެރި ކުރުމަށް ހަދާފައިވާ ގާނޫނާ ވެސް ހިލާފު ކަމެއް ކަމަށެވެ.
މިނިސްޓަރު ޝަހީމް ވަނީ އޭނާގެ ވާހަކަތަކަށް ރައްދުދެއްވާފައެވެ. ޝަހީމް ވިދާޅުވީ ތަނަކަށް 100 އަހަރުވުމަކީ، ހުރި ގޮތަށް ބަހައްޓަން ޖެހޭ ސަބަބެއް ނޫން ކަމަށާއި ބަންޑާރަ މިސްކިތަކީ ރާއްޖޭގެ އާސާރީ މިސްކިތްތަކުގެ ލިސްޓުގައި ހިމެނޭ މިސްކިތެއް ވެސް ނޫން ކަމަށެވެ.
އެހެންނަމަވެސް މިނިސްޓަރު ޝަހީމް ފަހުން ރޭ ކުރި ޕޯސްޓެެއްގައި ބުނީ ބަންޑާރަ މިސްކިތަކީ ރާއްޖޭގެ އާސާރީ ތަރިކައިގެ މިސްކިތްތަކުގެ ތެރޭގައި ހިމެނާފަ އޮންނަ މިސްކިތެއްނޫންވީމާ އެތަނުގައި ބޮޑު މިސްކިތެއް ބިނާކުރަން ޤަސްތުކުރީކަމަށެވެ. އަދި މިނިސްޓްރީން ކަންކަން ކުރާނީ ރައްޔިތުންގެ އަޑުއަހާފަ. އެއާ އެއްގޮތަށްކަމަށް ވިދާޅުވެ ބަންޑާރަ މިސްކިތް ހުރިތާ އާ މިސްކިތެއް ބިނާކުރުމާމެދު ފުޅާ ދާއިރާއެއްގައި މަޝްވަރާކުރާން ބޭނުންވާކަމަށް މިނިސްޓަރު ޝަހީމް ވަނީ ވިދާޅުވެފައެވެ.
