ދިވެހިރާއްޖޭގެ އިގްތިޞާދީ ހާލަތު އޮތީ އަނދަވަޅެއްގައި ކަމަށް ބުނާ ވާހަކައަކީ ސަރުކާރުގައި ތިއްބެވި ފަރާތްތަކުން އިއްޔެއަކު ނުވަތަ މިއަދަކު ދައްކާ ވާހަކައެއް ނޫނެވެ. މިއީ އަބަދުވެސް ޕޯޑިއަމެއް ފެނިއްޖާ އަރައިވަޑައިގެން ރައްޔިތުންގެ މޫނުމަތި ބަނަކޮށްލާފައި ދައްކާ ވާހަކައެކެވެ.

ސަރުކާރުގެ ކުންފުނިތަކުގެ މާލީ ހާލަތު ގޯސްކަމަށް ސަރުކާރުން ބުނެއެވެ. މިކަން މިހެން ވާން ދިމާވީ ވެސް އެއްވެސް ސަބަބެއް ނެތި ނޫނެވެ. ކުރީ ސަރުކާރުން ލޯނުތައް ނެގުމުން މާލީ ހާލަތު ގޯސްވެފައި އޮއްވާ ދެން މިއައި ސަރުކާރުން ހާވަން ފެށި ހަޑިއެއްގެ ސަބަބުން ހާލަތު ރަނގަޅުވާ ގޮތްނުވެ، ހާލަތު މިވީ އިތުރަށް ގޯހެވެ. އާދެ ސަރުކާރުގެ ވުޒާރާތަކަށާއި ކުންފުނިތަކުގެ ސިޔާސީ މަގާމްތަކަށް ހައްދެއްނެތި މީހުން އައްޔަންކުރުމުން، އެމީހުންގެ މުސާރައަށް ދައުލަތުން ބޮޑު ބައެއް އެބަ ހޭދަވެއެވެ. އެގޮތުން ހަމައެކަނި މަހެއްގެ މައްޗައް ބަލާލި ކަމުގައިވީ ނަމަވެސް ފެނިގެންދާނީ ކޮންމެ ވުޒާރާ އަކުން ވެސް ކުންފުންޏަކުން ވެސް ސިޔާސީ މަގާމްތަކުގެ ފަރާތްތަކަށް މުސާރަ ދިނުމަށް މިލިއަނަކަށްވުރެ ގިނައިން ހޭދަކުރާ މަންޒަރެވެ.

ކަންކަން މިހެން ހުރެ،ޓެކްސް ޕޭޔަރުން ދައްކާ ޓެކްސް ފައިސާ ސަރުކާރުގެ ކުންފުނި ތަކުން ހޭދަކުރަން މި ނިންމީ ދައުލަތުގެ މީޑިއާ ހިންގާ ޕަބްލިކް ސާވިސް މީޑިއާ (ޕީއެސްއެމް) އިން ”ޔޫރޯ 2024“ ފުޓުބޯޅަ މުބާރާތުގެ ކަވަރޭޖު ސްޕޮންސާކުރަން ހުުޅުވާލުމުން އެކަމަށެވެ.

ހައިރާނެއް މީހަކު ނުވާނެ ނޫންތޯ؟ މިފަދަ ޒަމާނެއްގައި ”ޔޫރޯ“ ދިވެހިންނަށް ބެލޭނެ ބައިވަރު ގޮތްތައް އޮވެއެވެ. ބައިވަރު ޗެނަލްތަކެވެ. މީޑިޔާނެޓް އަކީ މިހާރު ރާއްޖޭގެ ކޮންމެ ގެޔެއްގައިހެން ވެސް ހުންނަ އެއްޗެކެވެ. މީޑިޔާނެޓް މެދުވެރިކޮށް ވެސް ”ޔޫރޯ“ ބަލާލެވޭ އިރު، ދައުލަތުގެ ކުންފުނިތަކުން ފައިސާ ހޯދައިގެން ޕީއެސްއެމްގެ އެމްޑީ ޒީނާ ކުރަން މިއުޅެނީ އެންމެ ރަނގަޅު ގޮތްތޯ؟

ދައުލަތުގެ ކުންފުނިތަކުން ”ޔޫރޯ“ ކަވަރޭޖްއަށް ކޮށްފައިވާ ޚަރަދުތަކަށް ބަލާލާފައި ހަމަ ހައިރާންވެ އަންތަރީސްވިއެވެ. އެގޮތުން ޓައިޓަލް ސްޕޮންސާއަކީ އެސްޓީއޯ އެވެ. މެއިން ސްޕޮންސަރުންނަަކީ ސްޓެލްކޯ އާއި އެމްޕީއެލް އެވެ. ކޯ-ސްޕޮންސަރުންނަކީ އެމްޓީސީސީ އާއި އެމްޑަބްލިޔުއެސްސީ އާއި އެޗްޑީސީ އެވެ.މި ކުންފުނިތަކަށް ސްޕޮންސާރ ޕެކޭޖުތައް ވިއްކި އަގު އެއްކޮށްލުމުން ޕީއެސްއެމްއަށް 4.9 މިލިއަން ރުފިޔާ އެބަ ލިބެއެވެ.

ޕީއެސްއެމްއިން ޔޫރޯ ޕެކޭޖުތައް ވިއްކި އަގާއި ގަތް ކުންފުނިތަކުގެ އިތުރު ތަފްސީލްތަކަށް ބަލާލުން މުހިންމެވެ. އެގޮތުން ޓައިޓަލް ސްޕޮންސާ، އެސްޓީއޯ އިން ވަނީ 1،233،600ރ. ( އެއް މިލިއަން ދެ ލައްކަ ދުއި ސައްތަ ތިރީސް ތިން ހާސް ހަ ސަތޭކަ) ރުފިޔާ އިން ގަނެފައެވެ. މެއިން ސްޕޮންސާރ ތަކަށް ބަލާއިރު ކަރަންޓް ބިލްތަކުން ވައްކަންކުރި ކަމުގެ ތުހުމަތު އޮތް ސަރުކާރުގެ ކަރަންޓް ކުންފުނި ސްޓެލްކޯ އިން ވަނީ 925،200ރ. ( ނުވަ ލައްކަ ފަންސަވީސް ހާސް ދުއިސައްތަ ރުފިޔާ) އަށް ގަނެފައެވެ. ދެން އިތުރު ސްޕޮންސާރ ތަކަށް ބަލާއިރުވެސް އުޅެނީ ލައްކައިން މަތީގައެވެ.

ކަން މިހެން ހުރި އިރު ޔޫރޯ ސްޕޮންސާކުރި ކުންފުނިތަކުގެ ތެރެއިން އެމްޕީއެލް ނޫން ހުރިހާ ކުންފުނިތަކަކީ ހިންގުމުގެ ހަރަދުތަކަށާއި ދަރަނި އަދާކުރުމަށާއި ހިދުމަތް ފޯރުކޮށްދިނުމުގެ އަގު ހަމަޖެއްސުމުގެ ގޮތުން ސަރުކާރުން ފައިސާ އާއި ލޯނާއި ސަބްސިޑީ ފޯރުކޮށްދެމުންދާ ކުންފުނިތަކެކެވެ. މިއީ ކުންފުނިތަކުގެ ހާލަތު ހުރި ގޮތެވެ.

މި މުބާރާތުގެ ކަވަރޭޖް ގެނެސްދޭ ދައުލަތު މީޑިޔާގެ ވާހަކަވެސް ރަނގަޅުވާނީ ނުދެއްކިއްޔާއެވެ. ޕީއެސްއެމްއަކީ ވެސް ދައުލަތުގެ މާލިއްޔަތަށް ވަރަށް ބުރަ ބޮޑު ކުންފުންޏެކެވެ. މިކަން ސީދާ ދާދި ފަހުން ކުންފުނީގެ އެމްޑީ ޒީނާ ވަނީ ވިދާޅުވެފައެވެ.

ކަންކަން މިހެން ހުރި އިރު ޒީނާ ޖައްސަވަން މިއުޅެނީ ކޮން ޖަރީމާއެއްބާ؟