މިދައުރު ނިމުމުގެ ކުރިން 1000 އިމާމުން ތަމްރީނުކުރައްވާނެކަމަށް އިސްލާމީ ކަންތައްތަކާއި ބެހޭ ވަޒީރު ޑރ.މުހައްމަދު އަލީ ޝަހީމް ވިދާޅުވެއްޖެއެވެ.
ޝަހީމް މިހެން ވިދާޅުވީ ރާއްޖޭގައި އަލަށް އިމާމުންނަށް ޙާއްސަކޮށްގެން، އިސްލާމީ މަރުކަޒުގައި ބޭއްވި މަހާސިންތާ ޝަރަފުވެރިކޮށްދައްވައި ދެއްކެވި ވާހަކަފުޅުގައެވެ.މިއަދު ހެނދުނު ފެށި މި އިމާމުންގެ މަހާސިންތާގައި އިސްލާމީ މަރުކަޒުގެ އެންމެ އިސް އިމާމު ފަލީލަތުއްޝައިޚް މުހައްމަދު ލަތީފުއާއި އިސްލާމީ ކަންތައްތަކާއި ބެހޭ ވުޒާރާގެ ސީނިއާ ލީގަލް ކައުންސެލް އަލްއުސްތާޒް އާޔަތުﷲ ހުސެއިން ވެސް ވަނީ ބައިވެރިވެލައްފާއެެވެ.
މިމަހާސިންތާގައި އެކުލެވިގެންވަނީ ހަތަރު ބައެވެ. އެއީ ހަަތަރު ސެޝަންތަކަށް ބަހާލައިގެން ކުރިއަށްދާ ބައިތަކެވެ. ފުރަތަމަ ސެޝަން ބިނާވެގެންވަނީ ”އުމްމަތްތައް ބިނާކުރުމުގެ މިސްކިތްތަކުގެ ދައުރު“ ގެ މުހިއްމުކަމުގެ މައްޗަށެވެ. މި ސެޝަން ކުރިއަށް ގެންދެވީ ޑރ.މުހައްމަދު އަލީ ޝަހީމެވެ. ދެވަނަ ސެޝަން އަމާޒުވެފައިވަނީ އިމާމުންގެ މުހިއްމު ކަމާއި ރިވެރި އަޙުލާގުގެ މައްޗަށެވެ، މި ސެޝަންގައި މައުލޫމާތު ދެއްވާނީ ފަލީލަތުއްޝައިޚް މުހައްމަދު ލަތީފުއެވެ. ތިން ވަނަ ސެޝަން އަކީ ސީނިއާ ލީގަލް ކައުންސިލްގެ ފަރާތުން އިމާމުންގެ ހައްގުތަކާއި ގާނޫނުތަކާއި އަދި އިދާރީ ކަންކަމާއިގުޅިގެން ބޭނުންވާ މައުލޫމާތު ފޯރުކޮށްދިނުމުގެ ގޮތުން ބާއްވާ ސެޝަންއެކެވެ. އެ ސެޝަންގައި މައުލޫމާތު ދެއްވާނީ އަލްއުސްތާޒް އާޔަތުﷲ ހުސެއިންއެވެ.
އަތޮޅުތެރޭގައި ތިއްބެވި އިމާމުންވެސްވަނީ އޮންލައިންކޮށް މިމަހާސިންތާގައި ބައިވެރިވެލައްވާފައެވެ. މި ހަފްލާ ޝަރަފުވެރިކޮށްދެއްވައި ޑރ.މުހައްމަދު އަލީ ޝަހީމް ވިދާޅުވީ އިމާމު ކަމަކީ ވަރަށް ވެސް މަތިވެރި އަދި އަގުހުރި މަސައްކަތެއްކަމަށެވެ. ،މިކަމަކީ ނަބީ ބޭކަލުންގެ ހަޔާތްޕުޅުންވެސް ފެންނަން އޮތްކަމެއްކަމަށާއި އިިސްލާމީ އުއްމަތުގެ ތާރީޙުގައިވެސް އިމާމެއްގެ ވަޒީފާއަކީ އެންމެ މަތިވެރި ވަޒީފާކަމަށެެވެ. އިމާމުކަމުގެ މަގާމަކީ ދަށް މަގާމެއްނޫންކަމަށާއި އެ މަގާމަކީ ﷲސުބްޙާނަހޫވަތަޢާލާ ނުހަނު ލޯބިވެވަޑައިގަންނަވާ މަގާމެއް ކަމަށް ޝަހީމް ވަނީ ވިދާޅުވެފައެވެ، ދުނިޔެވީ ގޮތުން ލިބޭ މުސާރައަށްވުރެ މި މަގާމުގެ ޝަރަފު މަތިވެރިކަން ހަނދާންކޮށްދެއްވަމުން ޝަމީމް ވިދާޅުވީ އެބޭފުޅާ އެންމެ ޝައުގުވެރިވެލައްވާ އެއް ވަޒީފާއަކީ އިމާމުކަމުގެ ވަޒީފާކަމަށެވެ.
ޝަމީމް ވިދާޅުވީ މިއަހަރުގެ މިހާތަނަށް 400 އަށްވުރެ ގިނަ އިމާމުން އައު މަންހަޖެއްގެ ތެރެއިން ތާޒާކޮށްދީފައިވާނެ ކަމަށާއި 60 އިމާމުން ރާއްޖެއިންބޭރަށް ފޮނުވާފައިވާކަމަށެވެ. ނަމަވެސް އެބޭފުޅުން އަމިއްލަފުޅަށް ޓިކެޓު ހަމަޖައްސަން ޖެހުނީ މިހާރު އެވުޒާރާގެ މާލީ ހާލަތުގެ ސަބަބުންކަމަށާއި ނަމަވެސް އެހެނިހެން ހުރިހާކަމެއް ވާނީ އިންތިޒާމުކޮށްދެއްވާފައިކަމަށް ޝަމީމް ވިދާޅުވިއެވެ. އަދި ކުރިއަށް އޮތް މުސްތަގުބަލުގައި މިފަދަ ކަންކަމަށް އަމިއްލަ ޖީބުން ޙަރަދުކުރާކަށް ނުޖެހޭނެ ކަމުގެ ފުރިހަމަ ޔަގީންކަން ވެސް ޝަމީމް ވަނީ ދެއްވާފައެވެ. ޝަމީމް ވިދާޅުވީ މި ސަރުކާރުގެ އަމާޒަކީ މިއަހަރު ނިމުމުގެ ކުރިން 100 އިމާމުން ރާއްޖެއިން ބޭރަށް ފޮނުވައިގެން ތަމްރީނު ކުރުންކަމަށެވެ. އަދި މަދުވެގެން 1000 ޙަތީބުން މިއަހަރު ނިމުމުގެ ކުރިން ތަމްރީނު ކުރުމަކީ ވެސް މިސަރުކާރުން އިސްކަމެއްދީގެން ކުރާނެ ކަމެއް ކަމަށެވެ.
މިހާތަނަށް އިސްލާމިކް މިނިސްޓްރީން ވަނީ 240 ޙަތީބުންނަށް ދާއިރާގެ ސަނަދު ހަވާލުކޮށްފައެވެ. ރާއްޖޭގެ 20 އިމާމުން މިވަގުތު ބްރޫނޭ ދާރުއްސަލާމްގައި ތައުލީމް ޙާސިލްކުރަމުން އަންނައިރު ސައުދީ އަރަބިއާއިން 40 އިމާމުން މިވަގުތުދަނީ ތައުލީމްހާސިލްކުރަމުންނެވެ.
