ސިޔާސީ މަގާމުތަކުގެ މުސާރަ 10 އިންސައްތަ އަށް ކުޑަކޮށް، ރައީސުލްޖުމްހޫރިއްޔާގެ މުސާރައިގެ 50 އިންސައްތަ ނުނަންގަވާ ގޮތަށް ރައީސް ޑރ. މުޙައްމަދު މުޢިއްޒު ނިންމަވައިފިއެވެ.
ރައީސް އެފަދައިން ނިންމެވިކަން ހާމަކުރެއްވީ، މިރޭ ”އެކްސް“ގައި ކުރެއްވި ޕޯސްޓެއްގައެވެ.
އެގޮތުން ރައީސް ވިދާޅުވީ، މި އަންނަ އަހަރަށް ދައުލަތުގެ ބަޖެޓު ހުށަހަޅާއިރު، އިގްތިސާދީ އިސްލާހީ އެޖެންޑަގެ ދަށުން، ދައުލަތުގެ ބައެއް ޚަރަދުތައް ކުޑަކުރުމަށް ފިޔަވަޅުތަކެއް އެޅުމަށް ނިންމަވާފައިވާ ކަމަށެވެ. އެގޮތުން ސިޔާސީ ފަރާތްތަކާއި، ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރަ އާއި، މިނިވަން މުައައްސަސާތަކުގެ އިސްވެރިންގެ މުސާރައިގެ ވެސް ކުޑަ ކުރުމަށް ރައީސް ވަނީ ނިންމަވާފައެވެ. އަދި ޝަރުޢީ ދާއިރާގެ އިސްވެރިން އަދި ރައްޔިތުންގެ މަޖިލީހުގެ މެމްބަރުންގެ މުސާރައިން 10 އިންސައްތަ ކުޑަ ކުރުމަށް އެ ފަރާތްތަކުގައި އެދުމަށް ނިންމަވާފައިވާ ކަމުގައި ރައީސް ވިދާޅުވިއެވެ.
އެ ފަރާތްތަކުގެ މުސާރަ ކުޑަކުރަން ނިންމެވި ނަމަވެސް، 12،000 ރުފިޔާއިން މަދުން މުސާރަ ލިބޭ ފަރާތްތައް އިސްތިސްނާ ކުރުމަށް ރައީސް ވަނީ ނިންމަވާފައެވެ.
މީގެ އިތުރުން، ކުންފުނިތަކުގެ ވެރީންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމަށް ކަނޑައެޅުމަށް ވެސް ރައީސް ނިންމަވާފައިވާއިރު، ރައީސުލްޖުމްހޫރިއްޔާގެ ހައިސިއްޔަތުން ރައީސް މުޢިއްޒުއަށް ލިބިވަޑައިގަންނަވާ މުސާރައިގެ ވެސް 10 އިންސައްތަ ކުޑަ ކުރެއްވުމަށް ރައީސް ވަނީ ނިންމަވާފައެވެ.
އެ ފިޔަވަޅުތައް އެޅުއްވުމަށް ރައީސް ނިންމަވައިފައިވަނީ ކުރިއަށް އިތް ދެ އަހަރުގެ ނިޔަލަށެވެ.
ރައީސް އެފަދައިން ވިދާޅުވިއިރު، ރާއްޖޭގެ ރައީސުލްޖުމްހޫރިއްޔާ ކަމުގައި ހުންނަވާ ފަރާތަކަށް އެއް ލައްކަ ރުފިޔާގެ މުސާރައެއް ލިބިވަޑައިގަންނަވައެވެ. އަދި މަޖިލީހުގެ މެންބަރުންނަށް ކޮމެޓީ އެލަވެންސްތަކާ އެކު، 80،000 ރުފިޔާގެ މުސާރައެއް ލިބޭއިރު، ސަރުކާރުގެ އެކި ކުންފުނިތަކުގައި އެންމެ އިސްކޮށް ތިއްބަވާ ބައެއް ބޭފުޅުންނަށް އެއަށްވުރެ ބޮޑު މުސާރައެއް ވެސް ލިބެއެވެ.
